2 USAMYELA 16 - IsiNdebele 2012 Translation

UDavida uhlangana noTsiba

¹ Kuthe bona uDavida akhambakhambe abe ayokufika ngaphetjheya kwesiqongolo, wahlangana noTsiba isisebenzi sakaMefi-Bhotjheti simlindile. UTsiba gade araga umjeje wabodumbana ababotjhelweko bathwele amakhulu amabili wamapani wesikwa, ikhulu lamakhekhe wamakwapa wediribe, ikhulu leenthelo ezivuthiweko nomjeka wewayini.

² UDavida wabuza uTsiba wathi: “Uzisa kwanabani izintwezi?” UTsiba waphendula wathi: “Abodumbanaba ngebekosini, kobanyana bekosini babe nento ekhwelwako; izikwa neenthelo ngezamadoda wekosini kobana agome; iwayini ngelokwehlisa ithuli kilabo abazakubulawa mrhawu erhalawumbeni.”

³ Yeke ikosi yabuza yathi: “Uphi umntwanomntwana womphathakho?” UTsiba wathi ekosini: “Usele eJerusalema ngombana udlumbana bonyana namhlanje ikumba ka-Israyeli izombuyisela umbuso kabamkhulwakhe.”

⁴ Yeke ikosi yathi kuTsiba: “Koke okungekwakaMefi-Bhotjheti kusukela gadesi kuzakuba ngekwakho.” UTsiba wathi: “Ngikhothama ngokuzithoba ndabezitha ngombana ngifunyene umusa phambi kwakho kosami!”

⁵ Kuthe lokha ikosi uDavida nayifika eBharhurimu, kwavela indoda yekoro yomndeni kaSawula, ibizo layo nguTjhimeyi umsa kaGera. Yavela ikhamba ithukana,

⁶ yathoma nokujikijela uDavida nedwendwe lakhe ngamatje. Yakwenza lokho phezu kobana loke iviyo ngitjho neentsitsirimba liphahle uDavida ngapha nangapha.

⁷ Gade ithukana irhuwelela ithi: “Sukapha! Phuma lapha mbulali ndina! Isikhothamukhwesi!

⁸ USomnini uZimu ukwehlisele isibetho ngeengazikazi ozichithe endlini kaSawula, owaba yikosi esikhundleni sakhe. USomnini udlulisele umbuswakho endodanenakho u-Absalomu. Khonanje, uzwa ubuhlungu obukufaneleko ngombana umbulali!”

⁹ U-Abitjhayi umsa kaTseruya wathi ekosini: “Ndabezitha! Umgodoyikazi lo, ungubani bona ungathukana nekosami? Angiwuphahlazilini ihlokwanyana le!”

¹⁰ Kodwana ikosi yathi: “Niyithenga ngani indaba le, nina besa bakaTseruya? Ayithukane! Mhlamunye uSomnini uyivumele bona ingithuke. Besibobani-ke thina bonyana singabuza sithi, ‘Ungenwe yini lo?’ ”

¹¹ UDavida wathi ku-Abitjhayi nakilo loke idwendwe lakhe: “Kungathi indodanami eligazi lakogazi lami ifuna ukungihlukanisa namabele, kangangani-ke ngomBhenjaminikazi lo? Mliseni athukane, sizamthini nje, mhlamunye ulayelwe nguSomnini bona enze njalo.

¹² Mhlamunye uSomnini uzakubona iinhlupheko zami bese ungibuyiselela ngobuhle godu phezu kwamanikelela engiwabona namhlanjesi la.”

¹³ Yeke uDavida nedwendwe lakhe baragela phambili nendlela, ngapha uTjhimeyi naye nangu ugega nombundu ulinganisene nabo. Ukhamba athukana, ajikijela uDavida ngamatje nangamagade.

¹⁴ Ikosi kanye nedwendwe layo, bafika sebadinwe baphelile emazibukweni weJordani. Ikosi yafese yakhokha ummoya.

U-Arhitofeli noRhutjhayi beluleka u-Absalomu

¹⁵ Ngesikhatheso, u-Absalomu nawo woke amadoda wakwa-Israyeli bafika eJerusalema, u-Arhitofeli naye gade alapho.

¹⁶ URhutjhayi umAriki, omngani kaDavida, waya ku-Absalomu wathi: “Bayede, ndabezitha! Bayede, ngwenyama!”

¹⁷ U-Absalomu wabuza uRhutjhayi wathi: “Yindlela okhombisa ngayo umnganakho ithando le na? Kubayini ungazange ukhambe nomnganakho?”

¹⁸ URhutjhayi wathi ku-Absalomu: “Awa, mina ngikhamba naloyo okhethwe nguSomnini, abantwaba nawo woke amadoda wakwa-Israyeli. Nango-ke umuntu engikakarele kuye.

¹⁹ Ukudlula lapho, kanti ngubani omunye ekumele ngimlotjhe? Akukameli bona ngilotjhe umntwanomgani na? Njengombana bengilotjha uyihlo, nawe ngizakulotjha.”

²⁰ U-Absalomu wathi ku-Arhitofeli: “Akhe useluleke. Senze njani nakunje?”

²¹ U-Arhitofeli waphendula wathi: “Lala nemingena kayihlo ayitjhiye bona itjheje isigodlo. Ngalokho woke u-Israyeli uzakuzwa bonyana uhlolele uyihlo bese woke okusekelako uqina idolo.”

²² Yeke bahlomela u-Absalomu itende esirhodlweni esingaphezulu, walala nayo yoke imingena kayise epanyameni.

²³ Ngeenkhathezo nawululekwe ngu-Arhitofeli bese kufana nalokha nawuphendulwa nguZimu. Kwakunjalo ngoDavida no-Absalomu bebathatha zoke iinluleko zaka-Arhitofeli.