2 USAMYELA 13 - IsiNdebele 2012 Translation

U-Amnoni noTamari

¹ Emva kwalokho u-Amnoni umsa kaDavida wathanda umntakamanakhe uTamari. UTamari gade amuhle, angudadwabo laka-Absalomu indodana encani kaDavida.

² U-Amnoni wagula ngebanga lakaTamari udadwabo ngombana angakwazi ukumbandamela ngebanga lokobana gade aselawini labentazana.

³ Nje-ke u-Amnoni gade anomngani ibizo lakhe kunguJonadabi umsa kaTjhama, umnakwabo lakaDavida. UJonadabi loyo gade kungumaqangubana.

⁴ Wabuza u-Amnoni wathi: “Hawu! Ilanga nelanga ikosana yatjhiba kangaka? Akhese ungitjele, kwenzenjani?” U-Amnoni wathi kuye: “Ngithanda uTamari udadwabo laka-Absalomu umfowethu.”

⁵ UJonadabi wathi: “Khamba uyokulala embhedeni uzigulise. Kuzakuthi lokha uyihlo nakeza kuwe ukuzokubona, uthi kuye, ‘Bengingathaba nange udadwethu uTamari angeza azongiphekela umdokwana. Angiphekele wona ngelawini lamapha ngimqalile, angifunze.’ ”

⁶ Nje-ke u-Amnoni walala phasi wazigulisa. Kuthe lokha ikosi nayizombona, u-Amnoni wathi kiyo: “Bengingathanda nange udadwethu uTamari angeza azongenzela izikwa ezimbili ezisahliziyo, angifunze.”

⁷ UDavida wathumela ilizwi kuTamari esigodlweni wathi: “Khamba uye endlini yomfowenu u-Amnoni ufese umlungisele ukudlanyana.”

⁸ UTamari waya endlini yomfowabo u-Amnoni, ogade alele. Wathatha ihlama wayiwumela wambhagela izikwa ezisahliziyo. U-Amnoni bekasoloko amphekelela ngamehlo.

⁹ Wathatha ipani wayikghuthulela esithebeni phambi komfowabo, kodwana wala ukudla. Wathi: “Khupha boke abantu ngendlinapha.” Baphuma-ke boke.

¹⁰ U-Amnoni wathi kuTamari: “Letha ukudlokho emsamo uzongifunza.” UTamari wathatha izikwa ezisahliziyo azilungisileko waziletha ku-Amnoni umnakwabo emsamo.

¹¹ Kodwana wathi lokha nathi uyamfunza, wamuthi bhi, wathi kuye: “Yiza dadwethu, lala nami.”

¹² UTamari wathi: “Awa mfowethu! Ungangikateleli. Into enje, akukafaneli yenziwe kwa-Israyeli! Ungenzi ubudlhadlha obungaka!

¹³ Maye mina! Ngizokuphila njani nokurhubutjhwa okunje? Kazi kuzakuthiwani ngawe? Awuzukufana nesinye seendlhayela zakwa-Israyeli? Ngiyakuncenga, khuluma nekosi, angekhe ikwalele nami bona ungitjhade.”

¹⁴ Kodwana wala ukumlalela, kwathi njengombana gade anamandla kunaye, wamgagadlhela.

¹⁵ Emva kwalokho u-Amnoni wanyenya uTamari khulu, wamnyenya ukudlula indlela agade amthanda ngayo ekuthomeni. Wathi kuye: “Sikima, uphume la!”

¹⁶ UTamari wathi kuye: “Awa mfowethu, ukungiqotjha kwakho kuzakuba kumbi khulu kunobuhlola obenze kimobu.” Kodwana wala ukumlalela.

¹⁷ Wabiza isisebenzi sakhe wathi kiso: “Kghurumejela intwele ngaphandle le, uyikhiyelele.”

¹⁸ Nje-ke isisebenzeso samkhuphela ngaphandle samkhiyelela. UTamari gade embethe isambatho esikghatjisiweko ngombana bekumhlobo wesambatho owembathwa matlawu wekosini.

¹⁹ UTamari wazithela ngomlotha ehloko bewatlebhula isambatho esikghatjisiwekweso. Wathwala imikhono ehloko wakhamba arhahlawula isililo.

²⁰ U-Absalomu umnakwabo wathi kuye: “Angithi ngu-Amnoni umfowenu okurhubutjhileko? Thula wena dadwethu, ayibe ngeyomndeni. Ungayithatheli ehloko indaba le.” Yeke uTamari wahlala kwa-Absalomu asesizini elikhulu.

²¹ Lokha uDavida nakezwa koke lokho, wasilingeka khulu.

²² U-Absalomu wazonda u-Amnoni buthule ngombana arhubutjhe udadwabo uTamari.

U-Absalomu uzibuyiselela ku-Amnoni

²³ Emva kweminyaka emibili abarhuni bezimvu zaka-Absalomu bebarhuna izimvu eBhali-Rhatsori eduze nomuzi we-Efrayimu. U-Absalomu wabefuna ukumema woke amadodanekosi bona eze lapho.

²⁴ Waya-ke ekosini wathi kiyo: “Abantu bami barhuna izimvu. Alo, ikosi neenkhulu zayo beyingeza nayo na?”

²⁵ Ikosi yathi: “Awa ndodanami, sibanengi khulu bona singeza soke kwakho; singaba mthwalo kuwe.” Kwala nanyana u-Absalomu selayincenga, akhange ivume, nokho yambusisa.

²⁶ Yeke u-Absalomu wathi kiyo: “Nakungasinjalo-ke, ngibawa bona u-Amnoni umfowethu akhambe nathi.” Ikosi yabuza yathi: “Kubayini kube nguye okumele akhambe nani?”

²⁷ Kodwana u-Absalomu wayincengisisa, beyavumela u-Amnoni namadonanekosi woke bona akhambe nabo.

²⁸ U-Absalomu wayala iinceku zakhe wathi: “Lalelani-la! Lokha nasele nibona bonyana u-Amnoni wenamile ngewayini bese ngithi kini, ‘Mrhadleni phasi’, nimbulale. Ningesabi, ngizayijamela. Qinani nibe nesibindi.”

²⁹ Nje-ke, iinceku zaka-Absalomu zenza ku-Amnoni njengombana u-Absalomu aziyalile. Khonapho, woke amadodanekosi ararhuka, enye nenye yakhwela imeyilayo yarhotjha.

³⁰ Kwathi asesendleleni njalo, kwafika umbiko kuDavida othi: “U-Absalomu urhadle woke amadodanekosi phasi; akukasali neyodwa yawo.”

³¹ Ikosi yasikima, yatlebhula izambatho zayo beyazilahla phasi; boke abazenda bayo bajama bayizombeleza izambatho zayo zimanikiniki.

³² Kodwana uJonadabi umsa kaTjhama umnakwabo lakaDavida wathi: “Ikosami ingacabangi bonyana babulele woke amakhosana; ngu-Amnoni yedwa obuleweko. Lokhu kube mnqopho ka-Absalomu kusukela mhlana u-Amnoni agagadlhela udadwabo uTamari.

³³ Ikosami ingakhathazeki ngombiko othi kubulewe woke amadodanekosi. Sengu-Amnoni kwaphela obuleweko.”

³⁴ Ngesikhatheso, u-Absalomu vele gade selabalekile. Ngokuphazima kwelihlo ihloli yesigodlo yabona abantu abanengi ngendleleni engetjingalanga behla magegana nombundu.

³⁵ UJonadabi wathi ekosini: “Qalani, naka amakhosana asiza! Khengatjho musi ekosini!”

³⁶ Kuthe angakaliginyi, amakhosana angena esigodlweni, athoma akhihla isililokazi. Ikosi nabazenda bayo babibitheka kabuhlungu.

³⁷ U-Absalomu wabaleka waya kuTalimayi umsa ka-Amirhudi ikosi yeGetjhuri. Ikosi uDavida yalila mihla yoke, ililela indodanayo u-Amnoni.

UJowabi uhlelela ukubuya kwaka-Absalomu

³⁸ Wabalekela bunjalo-ke u-Absalomu eGetjhuri; wahlala lapho iminyaka emithathu.

³⁹ Ikosi uDavida beyisasophe ukulwisana no-Absalomu ngombana ihliziywayo beyisesebuhlungu ngokufa kwaka-Amnoni.