2 USAMYELA 11 - IsiNdebele 2012 Translation

UDavida noBhathi-Tjheba

¹ Kwathi ngesilimela, ngesikhathi amakhosi aphuma ngaso ipi, uDavida wathumela amajonakhe noJowabi nabo boke abantu bakwa-Israyeli kobana bayokulwa. Babhubhisa bakwa-Amoni bebaminyezela iRabha. Kodwana uDavida yena wasala eJerusalema.

² Ngelinye ilanga kusihlwa uDavida wavuka embhedenakhe wakhambakhamba esirhodlweni esingaphezulu sesigodlo. Khonapho wabona umfazi ahlamba. Umfazi lo, gade angasimuhle athoma phasi.

³ UDavida wathumela umuntu othileko bona abuzisise ngaye. Umuntu loyo wathi: “Ndabezitha, umfazi lo nguBhathi-Tjheba indodakazi ka-Eliyamu omka-Uriya umHite.”

⁴ UDavida wathumela iinthunywa bona zimbize. Wafika-ke kuDavida, uDavida wamlala. (UBhathi-Tjheba gade asanda ukuzihlambulula esifazini.) Wabuyela ekhaya-ke.

⁵ UBhathi-Tjheba wazibona bona uzithwele, wathumela ilizwi kuDavida wathi: “Kazi ngisebantwini.”

⁶ UDavida wathumela nanti ilizwi kuJowabi wathi: “Thumela u-Uriya umHite kimi.” Mbala wamthumela-ke kuDavida.

⁷ Kwathi lokha u-Uriya nafika kuye, uDavida wambuza bona uJowabi namadoda bavuke njani, nokuthi ipi iraga njani.

⁸ Nje-ke uDavida wathi ku-Uriya: “Khamba uyokusela amanzi kwakho.” U-Uriya waphuma esigodlweni, walandelwa ziinkhanakhana zekosini.

⁹ Kodwana u-Uriya walala neenceku zekosakhe zoke esangweni lesigodlo, akhange ehlele kwakhe.

¹⁰ Kuthe lokha uDavida natjelwa bona u-Uriya akakayi kwakhe, wambuza wathi: “Alo, njengombana uyafika ubuya kude nje, kubayini ungayi kwakho?”

¹¹ U-Uriya waphendula wathi: “Ngingaya njani kwami ngifese ngidle, ngisele bengilale nomkami khibe umfaji kaZimu, u-Israyeli noJuda bahlezi ematendeni, ikosami nabantu bayo basemmangweni. Ngifunga uDavida ikosami ngithi, angisoze ngayenza into enjalo mina.”

¹² UDavida wathi kuye: “Hlala lapha ilanga libe linye godu, kuzakuthi kusasa ngikubuyisele emuva.” Mhlokho, u-Uriya wahlala eJerusalema. Ngelanga elilandelako

¹³ uDavida wamema u-Uriya bona azokudla abe asele naye, enzelela bona adakwe. Kodwana nangobusukobo u-Uriya akhange ehlele kwakhe, wasuka wayokulala neenceku zekosakhe esigodlweni.

¹⁴ Ekuseni ngakusasa uDavida watlolela uJowabi incwajana bewayithumela ngaye u-Uriya.

¹⁵ Encwajaneni leyo, gade atlole wathi: “Beka u-Uriya ngaphambili lapha ipi itjhisa khulu khona bese uyamliselela wenzelele bona adulwe phasi afe.”

¹⁶ Kwathi lokha uJowabi navimbezela idorobho, wabeka u-Uriya ngapha azi khona bona ziyabenya.

¹⁷ Kwathi lokha abantu bedorobho nabaphumako bona balwe noJowabi, amanye wamajoni wakaDavida adulwa phasi; u-Uriya umHite, wabulawa nawo.

¹⁸ UJowabi wathumela kuDavida woke umbiko ngepi.

¹⁹ Wayala isithunywa wathi: “Tjela ikosi koke okwenzekileko epini.

²⁰ Ikosi ingahle ibhoke ngobukhali beyikubuze ithi, ‘Kubayini nibandamele idorobho kangaka nanilwa nalo? Beningazi bona bebanganijikijela basemthangaleni na?

²¹ Niyakhohlwa bonyana kwenzakalani ngo-Abimeleki umsa kaJerubhetjhethi na? Angithi wabulawa mfazi ngokumjikijela ngembokotho asemthangaleni, bewafela eThebezi! Benibandamelelani-ke nina eduze komthangala?’ Lokha nakubuza koke lokhu, yithi kuye, ‘Nencekwakho u-Uriya umHite uhlongakele.’ ”

²² Saphuma-ke isithunywa, kwathi lokha nasifika kuDavida sabika koke uJowabi agade asithume bona sikutjho.

²³ Isithunywa sathi kuDavida: “Ibuthwelo lalidlondlobele khulu kunathi begodu laphuma lasisahlela ebaleni. Kodwana thina salidudulela emuva sayolibeka ebungeneni besango ledorobho.

²⁴ Yeke abanembi bakhona bajikijela abantu bakho ngemisubela basemithangaleni, abanye babantu bekosi bafa. Ngaphezu kwalokho nenceku yekosi u-Uriya umHite, ihlongakele.”

²⁵ UDavida wathi esithunyweni: “Yithi kuJowabi, ‘Ungazikhathazi khulu ngendaba le; abantu bahlala bafa epini. Qinisa usahlele idorobho bewulibhubhise.’ Tjela uJowabi bona uyibambe ngesibhukwini.”

²⁶ Lokha umka-Uriya nakezwa bona umyenakhe uhlongakele, wamzilela.

²⁷ Kwathi isikhathi sokumzilela sesiphelile, uDavida wathi akayokuthathwa angeniswe esigodlweni sakhe. Yeke waba mkakhe wambelethela indodana. Kodwana into eyenziwe nguDavida le, yaba yimbi kuSomninini.