2 USAMYELA 10 - IsiNdebele 2012 Translation

UDavida ulwa nama-Amoni nama-Aramu

¹ Kwathi emva kwalokho ikosi yakwa-Amoni yahlongakala. URhanuni indodanayo waba yikosi esikhundleni sayo.

² UDavida wadlumbana wathi: “Ngizakuba nomusa kuRhanuni umsa kaNarhatjhi kanjengombana uyise waba nomusa kimi.” Nje-ke uDavida wathumela abazenda bakhe bona bayomtjhiriyela kuRhanuni ngoyise. Kwathi lokha abantu bakaDavida nabafika enarheni yama-Amoni,

³ abaphathi bakwa-Amoni bathi kuRhanuni ikosabo: “Ikosi icabanga bona uDavida uhlonipha usokosi kangangobana angabe athumele abantwaba bona bazokutjhiriya na? Uthi akakabathumeli nje bona bazozihlolisa idorobheli, bekuthi emva kwesikhathi balibhubhise?”

⁴ Yeke uRhanuni wabamba abantu bakaDavida wabarhuna, ngiloyo naloyo ingcenye yesilevu sakhe. Waqunta izambatho zabo ngehla kwedini iindunu zabo zaba semtarini, wabalisa-ke bakhamba.

⁵ Kuthe lokha uDavida nakatjelwako lokho, wathumela iinthunywa bona zihlangabeze abantu bakhe ngombana gade barhubutjhwe kabuhlungu. Ikosi uDavida yathi: “Hlalani eJerikho iintjebe zenu bezikhule kuhle bese niyabuya-ke.”

⁶ Lokha ama-Amoni nalemukako bona atlhorholoje uDavida ngesidunwini, aqatjha amajoni weenyawo wama-Aramu aziinkulungwana ezimatjhumi amabili eBhethe-Rerhobu neTsoba, nekulungwana yabantu ekosini yeMakha, kanye neenkulungwana ezilitjhumi nambili zabantu eTobu.

⁷ Lokha uDavida nezwa lokho, wathumela uJowabi bona aphume nebutho loke leengorho zamajoni.

⁸ Bakwa-Amoni baphuma bazihlela bona babe yipi ekungeneni kwesango ledorobhabo, ukube ama-Aramu weTsoba neRerhobu namadoda weTobu neweMakha bekathiyelele emrhuleni.

⁹ Lokha uJowabi nabona bonyana ubhodwe yipi ngaphambili nangemuva, wakhetha abomakadebona beengorho kwa-Israyeli, wabahlela bona baqalane nama-Aramu.

¹⁰ Wabeka inengi lamajoni ezandleni zaka-Abitjhayi umnakwabo, wawahlela bona aqalane nebakwa-Amoni.

¹¹ UJowabi wathi ku-Abitjhayi: “Nakube ama-Aramu anamandla kunami, ubuye uzongisiza; kodwana nakube bakwa-Amoni banamandla kunawe ngizakuza bona ngikusize.

¹² Qina ndoda, silwele isizwe sethu namadorobho wakaZimethu ngesibindi. UZimu uzakwenza okulungileko kuye.”

¹³ Yeke uJowabi nebutho lakhe baphuma basahlela ama-Aramu, bawahlula abe abaleka.

¹⁴ Lokha bakwa-Amoni nababona bonyana ama-Aramu ayabaleka, nabo babaleka phambi kwaka-Abitjhayi bangena ngaphakathi kwedorobhabo. Nje-ke uJowabi wajika ekusahleleni bakwa-Amoni wabuyela eJerusalema.

¹⁵ Emuva kokobana ama-Aramu abone bona ahlulwe ngu-Israyeli, azihlela ngobutjha godu.

¹⁶ UHadadi-Ezeri wabuyisa ngitjho nama-Aramu angaphetjheya komlambo iYufrathe, eza eRhelamu. Ayerholwa nguTjhobaki induna ekulu yebutho lakaHadadi-Ezeri.

¹⁷ Lokha uDavida natjelwa lokho, wahlanganisa woke u-Israyeli, wayama iJordani waya eRhelamu. Ama-Aramu azihlela bona ahlangabeze uDavida alwe naye.

¹⁸ Kodwana abaleka phambi kwaka-Israyeli. UDavida wabulala amakhulu alikhomba wabakhweli beenkarana nabakhweli beenjomani abaziinkulungwana ezimatjhumi amane. Wamadlha phasi noTjhobaki induna yebutho labo bewafela khonapho.

¹⁹ Kwathi lokha amakhosi ebegade angaphasi kwakaHadadi-Ezeri nakabona bonyana u-Israyeli uhlulile, enza ukuthula no-Israyeli abe akhosela ngaphasi kwakhe. Nje-ke, ama-Aramu esaba ukubuye asize bakwa-Amoni godu.