2 USAMYELA 1 - IsiNdebele 2012 Translation

UDavida ubikelwa ngokufa kwakaSawula

¹ Emva kokufa kwakaSawula, uDavida wabuya ekubulaleni ama-Amalekhi, wahlala amalanga amabili eTsikhilagi.

² Ngelanga lesithathu kwafika umuntu etatawini lokulwa lakaSawula, izambatho zakhe bezidabukile, azele ithuli ehloko. Lokha nafika kuDavida, wawa ngamadolo wahloma ihloko phasi.

³ UDavida wambuza wathi: “Ubuyaphi?” Yena waphendula wathi: “Ngibaleke etatawini lokulwa lama-Israyeli.”

⁴ UDavida wambuza wathi: “Akhe ungitjele, kwenzekeni?” Yena wathi: “Abantu babalekile epini. Inengi labo lirabhalalisiwe belafa. USawula nendodanakhe uJonathani nabo bahlongakele.”

⁵ UDavida wabuza isokana elimlethele umbikwelo wathi: “Alo, wena wazinjani bona uSawula nendodanakhe uJonathani bahlongakele?”

⁶ Isokana laphendula lathi: “Kwenzekile bona ngifike entabeni iGilibowa, ngabona uSawula aziyame ngomkhontwakhe, ikarana yeenjomani kanye nabakhweli sekutjhidele bona zimgadange.

⁷ Uthe nathi rhedlu wangibona, wangibiza. Mina ngathi, ‘Ngingakwenzelani?’

⁸ Wangibuza wathi, ‘Ungubani wena na?’ Ngamphendula ngathi, ‘NgingumAmalekhi.’

⁹ Nje-ke wathi kimi, ‘Nanyana ngisaphefumula nje, sekusele isikhohlela. Yeke bandamela kimapha ungiqedelele.’

¹⁰ Ngambandamela-ke ngamqedelela ngombana ngazile bona ubangekhe asasinda ngemva kokuhlulwa kwakhe. Ngathatha umbhode wekosi obusehlokwakhe nebhengela emkhonwenakhe, ngakulethela ikosi.”

¹¹ Ngalokho uDavida watjhuba izambatho zakhe wazidabula, nabo boke ebegade banaye benza njalo.

¹² Batlhuwa barhahlawula bazilela uSawula nendodanakhe uJonathani nebutho lakaSomnini uZimu kanye nekumba ka-Israyeli bekwaba kuntambama ngombana bebabulewe ngesabula.

¹³ UDavida wathi esokaneni ebelimlethele umbiko: “Udabukaphi?” Laphendula lathi: “Ngiyindodana yesikhonzi, umAmalekhi.”

¹⁴ UDavida wambuza godu wathi: “Waba nesibindi-ke sokuphakamisela umzeswa kaSomnini isandla!”

¹⁵ UDavida wabiza enye yeenceku zakhe wathi kiyo: “Mbandamele, umsuse!” Yeke inceku yadula isokanelo phasi, lafa.

¹⁶ UDavida wathi esokaneni: “Iingazi zakho azibe phezu kwehlokwakho ngombana namezwi womlomakho ayakufakazela nawuthi, ‘Ngibulele umzeswa kaSomnini.’ ”

UDavida uvuma ingoma yesililo ngoSawula noJonathani

¹⁷ UDavida wavuma ingoma yesililo elandelako ngoSawula nendodonakhe uJonathani.

¹⁸ Wakhupha umyalo bona abantu bakwaJuda bafunde ingoma le. Isihloko sengoma leyo Msebe. Itlolwe encwadini kaJatjhara.

¹⁹ Iintsitsirimba zakho Israyeli, zibulewe emibundwini. Maye ukuwa kweenkutani zakho!

²⁰ Lokhu ningakubiki eGathi, kungakhulunywa eentaradeni ze-Atjhikeloni; ukuze abafazi bamaFilista bangathatjiswa, abafazi balabo abangasokiko bangathakasi.

²¹ Nina ntaba zeGilibowa, kwanga ningatlhoga umbethe namkha izulu, iye, eendaweni zenu eziphakamileko; ngombana iinhlangu zeentsitsirimba zirhubutjhiwe; isihlangu sakaSawula asisatjhatjhwa ngamafutha.

²² Umsebe kaJonathani bewuhlala ulungile, bewuhlaba uhlukanisa umhlwehlwe esiswini seengorho, kuphalake iingazi. Isabula kaSawula nayo beyinemba.

²³ USawula noJonathani bebathandeka begodu bebaligugu nabasaphilako, nekufeni akhange bahlukane. Bebanebelo ukudlula amadlanga, banamandla ukudlula amabhubezi.

²⁴ Nina bafazi bakwa-Israyeli, lilelani uSawula, indoda enembathise ezibubende, yanikghabisa ngezambatho ezirutjelwe ngegolide.

²⁵ Maye ukuwa kweenkutani epini! UJonathani ubulewe eentabeni zakho.

²⁶ Ngibuhlungu ngawe mfowethu Jonathani, bewuligugu kimi! Ukungikhathalela kwakho bekukarisa ukudlula kwabantu bengubo.

²⁷ Maye iinkutani ziwile! Iinhlabano zepi zitjhabalele!