2 UPITROSI 2 - IsiNdebele 2012 Translation

Abaphorofidi nabafundisi bamanga

¹ Abaphorofidi bamanga bebavele bakhona hlangana nabantu, njengombana kuzakubakhona abafundisi bamanga phakathi kwenu abazakungenisa ngasese iimfundiso ezibhubhisako. Bazakuphika ngitjho noMbusi owabahlawulelako, ngalokho-ke bazilethela ngokwabo ukurhayilwa okumsinyana.

² Nanyana kunjalo, abanengi bazakulandela ukukhohlakala kwabo, begodu ngebanga labo, indlela yeqiniso izokurhubutjhwa.

³ Ngokuba marhamaru kwabo bazonidlelezela ngamezwi wobugalajani. Kwakade balengelwa kulahlwa nokubhujiswa kwabo akukayathi.

⁴ Ngitjho nakade uZimu azange ababalele iingilozi ezonako, kodwana wazilahlela ngesirhogweni, wazifaka ngemigodini enzima tshu bonyana zilindele ngapho ukugwetjwa kwazo.

⁵ Godu azange arhawukele iphasi lekadeni, kodwana wamlonda uNowa umtjhumayeli wokulunga kanye nabanye abalikhomba, ngesikhathi aletha umthwalela ephasini labangamesabiko uZimu;

⁶ iye, imizi yeSodoma neGomora wayirhayila ngokuyiphendula yaba mlotha, wayenza isibonelo salokho okuzakwenzeka kilabo abangamesabiko.

⁷ Godu wahlangula noLoti olungileko obegade asele akhamba ngamanyala wegandelelo leenkhohlakali ezinganamthetho,

⁸ ngombana ngokuhlala hlangana nazo, indoda elungileko leyo yawurubajeka emphefumulwenayo ngokubona nokuzwa ilanga nelanga imikhubabo yobuhlongandlebe.

⁹ Ngalokho uSomnini uyakwazi ukusindisa labo abamesabako ekulingweni; kuthi abangakalungi ababekele ukuhlunguphazwa ngelanga lokugwetjwa,

¹⁰ khulukhulu labo abazifaka eenkanukweni zenyama zokonakala nabangahloniphi abaphathi. Bamaphikakani, bayazitjhaya begodu abesabi nokuhlambalaza abacwengileko,

¹¹ khisibe nanyana iingilozi zizikulu ngeenkhwepha nangamandla, azibamangaleli ngehlamba phambi kwakaSomnini.

¹² Kodwana laba abahlambalazako banjengeembandana ezinganamkhumbulo, ezizalelwe ukubanjwa nokubulawa. Bahlambalaza ngezinto abangazaziko; nje-ke nabo bazokubhujiswa njengazo iimbandanezo,

¹³ bamukeliswe ukuhlupheka ngokwenza kwabo okumbi. Ukuthaba kwabo kukwenza ihlazo emini libalele. Baziingilamkhuba neembhidlamnyanya bazithabisa ngeenkanuko zabo ezimbi.

¹⁴ Banamehlo azele ukuhlobonga nanamathele ekoneni; bayenga abangakanzinzi epilweni. Ihliziywabo ijayele ukuba marhamaru; babantwana bamanikelela.

¹⁵ Batjhiye indlela enqophileko badurha, balandela indlela kaBhiliyamu umsa kaBhewori owathanda umvuzo wekohlakalo.

¹⁶ Kodwana wakhalinywa ngeemphambeko zakhe: Udumbana osimumu wakhuluma ngelizwi lomuntu wavimbela ukuhlanya komphorofidi loyo.

¹⁷ Labo bamithombo enganamanzi nekungu ephetjhulwa siwuruwuru; yeke bagcinelwe ubumnyama obuphathekako.

¹⁸ Bakhuluma amezwi wokuzitjhaya alilize, bakhohlisa ngeenkanuko zabantu benyama abasanda ukuphunyuka kilabo abaphambukileko.

¹⁹ Babathembisa ikululeko, khisibe bona ngokwabo bamakhoboka wokonakala ngombana umuntu ulikhoboka lalokho okumbusako.

²⁰ Ngambala, emva kobanyana baphunyurhe ekusilaphaleni kwephaseli ngokwazi iKosethu noMsindisi uJesu Krestu, sele godu bararelwe kikho begodu bahlulekile; nje isiphetho sabo sele sisimbi khulu kunekuthomeni.

²¹ Bekuyoba ngcono kibo thana akhange bayazi indlela yokulunga kunokuba kuthi sebayazile babuye bawufulathela umyalo ocwengileko owethulwa kibo.

²² Kubehlele njengesaga nasithi: “Inja ibuyela emahlanzenayo,” nokuthi, “Isavukazana esihlanjisiweko sibuyela edakeni.”