2 KWEBEKORINTE 9 - IsiNdebele 2012 Translation

Umnikelo malungana namaKrestu weJerusalema

¹ Akutlhogeki bona ngingabe nginitlolele mayelana nomnikelo omalungana nabacwengileko

² ngombana ngiyakwazi ukutjhisekela kwenu engizikhakhazisa ngakho ngani ebantwini beMasedoniya ngisithi, i-Arhaya lazilungiselela kwanyakenye. Ngalokho ukutjhisekela kwenu kudlhudlhe abanengi.

³ Nje-ke ngithumela abazalwana kini ukuze ukuzikhakhazisa kwethu ngani kungabonakali kulilize. Kufanele nilunge njengombana bengithe sele nazilungiselela kade.

⁴ Nakungasinjalo nange kungenzeka bona amaMasedoniya akhambe nami, afunyane bona anikalungisi, sizakuhlatjwa ziinhloni besivaleke imilomo ngani emsebenzini lo.

⁵ Kungakho ngibone kuqakathekile ukuncenga abazalwana kobana bakhambe ngaphambi kwenu, bayokuje balungiselela ngaphambili, isipho esikhulu enathembisa ngaso ukuze sihlale silungile njengesipho enisikhuphe ngokuthanda kwenu ingasi ngokugandelelwa.

⁶ Khumbulani lokhu: “Loyo otjala ngokunconcosela, uzokuvuna okunconcoselweko, naloyo otjala okunengi uzakuvuna okunengi.”

⁷ Ngiloyo naloyo akanikele njengokuzibekela kwakhe ehliziyweni yakhe, kungabi ngokutsitsila namkha ngokugandelelwa ngombana uZimu uyamthanda loyo onikela ngethabo.

⁸ UZimu unamandla wokwenza bona woke umusa wande kini ukuze kikho koke ngeenkhathi zoke, nasele ninakho koke enikudingako, nande ngayo yoke imisebenzi emihle

⁹ njengombana kutloliwe kwathiwa: “Wahlakaza ngokunabileko, wabela abachakileko. Ukulunga kwakhe kujame isiphelani.”

¹⁰ Loyo opha umtjali imbewu kanye nesikwa njengokudla, uzonibonelela abe andise nesilulu sembewenu, akhulise isivuno sokulunga kwenu.

¹¹ Nizakwenziwa abanjingileko ngazo zoke iindlela ukuze niphane ngeenkhathi zoke bese kuthi ngathi, ukuphana kwenu kube kuthokoza uZimu.

¹² Umsebenzi eniwenzako lo, awuphakeli iindingo zabantu bakaZimu nje kwaphela, kodwana uphuphuma iindlela ezinengi ezahlukeneko zokuletha ukuthokoza kuZimu.

¹³ Ngebanga lomsebenzi enizibonakalise ngawo lo, abantu bazakudumisa uZimu ngokuzithoba okukhambisana nokutjhumayela kwenu ivangeli lakaKrestu kanye nomusa wenu omkhulu ekwabelaneni nabo kanye nabantu boke.

¹⁴ Nabanithandazelako, iinhliziyo zabo zizakunamathela kini ngebanga lomusa omkhulu uZimu aniphe wona.

¹⁵ Akathokozwe uZimu ngesipho sakhe esingahlathululekiko!