2 KWEBEKORINTE 8 - IsiNdebele 2012 Translation

Ukunikela kwamakholwa

¹ Sifuna bona nazi bazalwana ngomusa kaZimu ophiwe amabandla weMasedoniya

² ukuthi ngesikhathi esinzima sokuhlukunyezwa, ithabo lawo elingapheliko kanye nobuchaka bawo obukhulu buphuphume baba mnotho wokuphana kiwo.

³ Ngingafakaza bona anikela ngokuzithandela kwawo ukuya ngamandlawo, ngitjho nangaphezu kwalokho anakho.

⁴ Asincenga khulu bona nawo aphiwe ithuba lokuhlanganyela kilomsebenzi emakholweni.

⁵ Nje-ke lokhu thina besingakakulindeli. Athoma ngokuzinikela wona qangi eKosini, kwathi ngokwentando kaZimu, azinikela nakithi.

⁶ Yeke sabawa uTitosi bona njengombana sele athomile nje, akaqedelele umsebenzi womusa lo hlangana nani.

⁷ Njengombana sele nikghona ezintweni zoke nje, ekukholweni, ekukhulumeni, elwazini, ekutjhisekeni okukhulu nethandweni lethu kini, sifuna bona nikghone nekunikeleni ngomusa.

⁸ Akutjho bona nginibethela umthetho kodwana nginitjengisa bona abanye bakhuthele kangangani. Ngithanda bona nani nibonakale bonyana ithando lenu likhulu kangangani.

⁹ Niyawazi umusa weKosi yethu uJesu Krestu kobana nanyana bekanjingile, kodwana ngebanga lenu waba sichaka ukuze kuthi ngobuchaka bakhe nina ninjinge.

¹⁰ Nje-ke endabeni le, ngibeka nasi iseluleko sami: Kunilungele nina enithome qangi, ingasi ukwenza kwaphela, kodwana ukuba netjisakalo kusukela kwemnyakeni ophelileko.

¹¹ Yeke, kuqedeleleni lokho ukuze ukutjhisekela kwenu kulinganiswe ngokukuphetha ukuya ngalokho eninakho.

¹² Nangabe ukutjhisekela kukhona, isipho siyamukeleka ukuya ngalokho umuntu anakho, ingasi ukuya ngalokho umuntu anganakho.

¹³ Angitjho bona kumele abanye bathwale ludlana khisibe nina niyagandeleleka, kodwana ngifuna ukulingalinganisa izinto phakathi

¹⁴ kwalokho okunengi eninakho nokutlhoga kwabo ukuze kuthi okunengi abanakho kwanelise iindingo zenu bese kuba nokulingalingana.

¹⁵ Njengombana kutloliwe kwathiwa: “Loyo onokunengi, azange abe nokunengi khulu, naloyo onokuncani azange abe nokuncani khulu.”

UTitosi nabaphekeleli bakhe

¹⁶ Akathokozwe uZimu obeke ehliziyweni kaTitosi ukutjhisekela okufana nalokho enginakho ngani.

¹⁷ Azange amukele isibawo sethu nje kwaphela, kodwana njengombana anokutjhisekela okudlula kwaphambilini, uzonikhambela ngokuzithandela kwakhe.

¹⁸ Simthumela kinapho kanye nomzalwana odumileko hlangana nawo woke amabandla ngokutjhumayela kwakhe ivangeli.

¹⁹ Akusikho lokho kwaphela, kodwana ukhethwe mabandla bona akhambe nathi lokha nasikhambisa indaba yomnikelo esiwunakekelako kobana sidumise iKosi ngokwayo kanye nokubonakalisa ukukhuthala kwethu ekusizeni.

²⁰ Silinga bona kungabikhona umuntu osisolako ngesipho somusa esisisebenzakwesi.

²¹ Sibinge bona senze okufaneleko, ingasi phambi kwakaZimu kwaphela kodwana naphambi kwabantu.

²² Sithumele kanye nabo umzalwana wethu esamzizinya kanengana, safumana akhuthele ezintweni ezinengi, kodwana kwanjesi sele anokutjhisekela okukhulu kunaphambilini ngebanga lokunethemba kwakhe okukhulu.

²³ Yena-ke uTitosi lo, umhlanganyeli kanye nomsebenzisani wami emsebenzini wenu lo. Nakubazalwana bethu bona, baziinthunywa zamabandla, idumo lakaKrestu.

²⁴ Nje-ke akuthi epepeneneni, nitjengise ubufakazi bethando lenu kibo nesizathu sethu sokuzikhakhazisa ngani.