2 KWEBEKORINTE 6 - IsiNdebele 2012 Translation

¹ Njengeensebenzi zakaZimu ezisebenza ndawonye, siyanincenga bona ningawamukeleli ilize umusa kaZimu

² ngombana uthi: “Ngesikhathi esifaneleko ngakulalela, ngelanga lesindiso ngakusiza.” Qalani, kwanje kusikhathi esifaneleko, qalani, kwanje kulilanga lesindiso!

³ Asibeki isiqabo endleleni yomuntu ukuze kungafunyanwa iphoso emsebenzini wethu.

⁴ Kodwana njengeenceku zakaZimu sizibuka ngazo zoke iindlela: ngokunyamezela okukhulu, ngokuhlunguphazwa, ngobudisi, ngamatlhuwiso,

⁵ ngokubethwa, ngokubotjhwa, ngemiguruguru, ngokutjhikatjhika, ngokungalali ebusuku kanye nangendlala.

⁶ Iye, sizibuka ngokuhlanzeka, ngelwazi, ngokubekezela, ngobumnene, ngokucwengeka kuMoya oCwengileko, ngethando lamambala

⁷ nangokukhuluma iqiniso emandleni kaZimu. Lokho sikwenza ngeenkhali zokulunga ngesidleni nangesinceleni.

⁸ Ekuhlonitjhweni nekurhubutjhweni, ebumbini nebumnandini. Siphathwa njengabakhohlisi nanyana sineqiniso nje;

⁹ siphathwa njengabantu abangaziwako nanyana saziwa nje; siphathwa njengabantu abafako, kodwana qalani siyaphila; siphathwa njengabantu abahlunguphaziweko, kodwana abangakabulawa.

¹⁰ Siphathwa njengabantu abanesizi, kodwana sihlala sinamile; sinjengabadududu, kodwana senza abanengi babe ziingwili; sinjengabanganalitho khisibe sinakho koke.

¹¹ Sikhulume sitjhaphulukile kini maKorinte, sanivulela iinhliziyo zethu.

¹² Asikanigodleli amazizo wethu kodwana nina nisigodlele wenu.

¹³ Nje-ke ngokwenana, ngikhuluma nani njengabantwana, nani-ke vulani iinhliziyo zenu ngokupheleleko.

Ithempeli lakaZimu ophilako

¹⁴ Ningazihlanganisi nabangakholwako. Kunabudlelwano bani phakathi kwabalungileko nabangakalungi na? Namkha kunahlanganyelo bani phakathi komkhanyo nobumnyama na?

¹⁵ Unasivumelwano bani uKrestu noBheliyara na? Namkha yini ikholwa elingayabelana nomuntu ongakholwako na?

¹⁶ Linasivumelwano bani ithempeli lakaZimu nabosingazimu na? Thina silithempeli lakaZimu ophilako, njengombana uZimu wathi: “Ngizokuhlala ngaphakathi kwabo bengikhambe hlangana nabo, ngibe nguZimabo, bona babe babantu bami.”

¹⁷ Ngalokho-ke: “Phumani phakathi kwabo, nizahlukanise nabo; ningathinti ilitho elisilapheleko, yeke ngizakuza kini. Kutjho uSomnini.

¹⁸ Mina ngizakuba nguYihlo, nina-ke nibe madodana namadodakazami. Kutjho uSomnini uMninimandla woke.”