2 KWEBEKORINTE 5 - IsiNdebele 2012 Translation

¹ Siyazi bona nakudilika idladla lephasinapha esihlala ngakilweli, sinesakhiwo esivela kuZimu, ikumba engakenziwa ngezandla, engeyanini nanini ezulwini.

² Nasingaphakathi kwedladleli siyabubula, silangazelela ukwembathiswa ubuhlalo bethu bezulwini

³ ngombana nasembathisiweko, angeze safunyanwa sibulanzi.

⁴ Nasisahlezi ngedladlenapha, siyabubula begodu siyadisibezeka ngombana asifisi ukwambulwa kodwana sifuna ukumbathiswa ngobuhlalo bethu bezulwini ukuze kuthi okubhubhako kuginywe kuphila.

⁵ Yeke nguZimu owasidalela sona isizathwesi bewasipha noMoya njengesibambiso.

⁶ Nje-ke sihlala sinesibindi ngaso soke isikhathi, nanyana sisazi bonyana nasisesekhaya ngemzimbeni lo, sikude neKosi

⁷ ngombana sikhamba ngokukholwa, asikhambi ngokubona.

⁸ Iye, sinesibindi begodu sinyula bona siwutjhiye umzimba lo, siyokuhlala neKosi.

⁹ Nje-ke nanyana sisekhayapha namkha sele sikhambile, sikwenza kube mnqopho wethu ukuyithokozisa iKosi.

¹⁰ Ngitjho ngombana soke sifanelwe kuvela phambi kwesihlalo sokugweba sakaKrestu ukuze ngiloyo naloyo amukeliswe umvuzo walokho akwenzileko nasesengemzimbenapha, kungaba ngokuhle namkha okumbi.

Ikonzo yokubuyisana

¹¹ Ngalokho-ke njengombana thina sikwazi bona kuyini ukwesaba iKosi, silinga ukuzuza nabanye, nokho thina siyazeka kuZimu. Ngiyathemba bona nakunembeza wenu siyazeka.

¹² Ngalokho asizidumisi kini, kodwana sininikela ithuba lokobana nizigqaje ngathi ukuze nikwazi ukuphendula labo abazigqaja ngokubonakala emehlweni ebangeni lokobana bazigqaje ngokusehliziyweni.

¹³ Nangabe siqaleka sirhapha, akutshwenyi, sirhaphela uZimu. Nangabe asirhaphi, kungebanga lenu.

¹⁴ Ithando lakaKrestu liyasiraga ngombana siyakholelwa bona munye owafela boke, nje-ke boke bafile.

¹⁵ Wafela boke ukuze kuthi labo abaphilako bangasaziphileli bona, kodwana baphilele yena owabafelako bewavuswa.

¹⁶ Ukusukela gadesi, yeke asisazukwazi umuntu ngokwenyama ngitjho nanyana sakhe sazi uKrestu ngokwenyama nje, nokho asisamazi njalo.

¹⁷ Nje-ke umuntu nasele akuKrestu, sewunesibumbeko esitjha: koke okudala kudlulile, qala, koke sele kwenziwe kwaba kutjha.

¹⁸ Koke lokhu kuvela kuZimu owasibuyisela kuye ngoKrestu bewasinikela ikonzo yokubuyisana,

¹⁹ okutjho bona uZimu wabuyisela iphasi kuye ngoKrestu. Azange abale iimphambeko zalo, kodwana wasinikela umyalezo wokubuyisana.

²⁰ Nje-ke thina sibazenda bakaKrestu ngombana uZimu uzwakalisa isimemezelo sakhe ngathi. Yeke siyanincenga ebizweni lakaKrestu bona nibuyisane noZimu.

²¹ Wamenza bona abe sisono ngebanga lethu loyo ongazange asazi isono ukuze kuthi kuye sibe ngabalungisisiweko bakaZimu.