2 KWEBEKORINTE 4 - IsiNdebele 2012 Translation

Amagugu ezitjeni zomdaka

¹ Yeke, njengombana kungomusa kaZimu bona sibe nekonzo le, asililahli ithemba.

² Kunalokho silahle iindlela zokufihla izinto eziphathisa iinhloni, salile ukwenza ubuqili namkha ukuphambanisa ilizwi lakaZimu, kodwana ngokubeka iqiniso epepeneneni, siyazibuka kunembeza womuntu woke phambi koZimu.

³ Ngitjho nanyana ivangeli lethu lifihlakele, lifihlakele kilabo ababhubhako.

⁴ Uzimu wesikhathesi ufiphaze imikhumbulo yabangakholwako ukuze bangaboni umkhanyo wevangeli lephazimulo kaKrestu omfuziselo kaZimu.

⁵ Asizitjhumayeli thina, kodwana sitjhumayela uJesu Krestu njengeKosi, thina sibe makhoboka wenu ngebanga lakhe.

⁶ Yeke uZimu owathi: “Umkhanyo awukhanye ebumnyameni,” nguye owakhanyisa eenhliziyweni zethu ukusinikela umkhanyo welwazi lephazimulo kaZimu ebusweni bakaJesu Krestu.

⁷ Kodwana sinamagugu la ngezitjeni zomdaka ukuze kutjengiswe bonyana amandla amakhulu la ngewakaZimu begodu akaveli kithi.

⁸ Siyahlunguphazwa ngeendlela zoke kodwana asitshidlhwa, siyakakamala kodwana asipheli amandla.

⁹ Siyazunywa kodwana asilahlwa, simadlhwa phasi kodwana asibhujiswa.

¹⁰ Sihlala sithwele emizimbeni yethu ukufa kwakaJesu ukuze kuthi ukuphila kwakhe nakho kwembulwe emizimbeni yethu.

¹¹ Thina esiphilako sihlala sinikelwa ekufeni ngebanga lakaJesu ukuze ukuphila kwakhe kwembulwe emizimbeni yethu efako.

¹² Ngaleyondlela, kithi kusebenza ukufa kodwana kini kusebenza ukuphila.

¹³ Kutloliwe kwathiwa: “Ngakholwa, ngalokho ngakhuluma.” Nathi sakholwa, yeke sakhuluma

¹⁴ ngombana siyazi bona loyo owavusa iKosi uJesu nathi uzosivusa kanye noJesu begodu uzosiletha sikanye nani ebukhoneni bakhe.

¹⁵ Iye, koke kungebanga lenu ukuze kuthi umusa wandise ukuthokoza, kilo idumo lakaZimu, njengombana ufikelela abantu ngobunengi.

Ukuphila ngokukholwa

¹⁶ Ngalokho asipheli amandla. Nanyana umzimba wethu ngaphandle uluphala, ingaphakathi lethu livuselelwa imihla ngemihla.

¹⁷ Iinhlupheko zethu ezilula nezesikhatjhana zisilungiselela isilinganiso esikhulu sephazimulo engaphezu kokulinganiswa

¹⁸ ngombana asiqali lokho okubonwako kodwana siqale okungabonwako. Okubonwako kungekwesikhatjhana kodwana okungabonwako kungekwanini nanini.