2 KWEBEKORINTE 3 - IsiNdebele 2012 Translation

Iinceku zesivumelwano esitjha

¹ Kghani sele sithome ukuzibuka godu na? Nakanye, abe asidingi iincwadi zokusethula kini namkha ezivela kini njengombana abanye basenza.

² Nina ngokwenu niyincwadi yethu etlolwe eenhliziyweni zethu bona yaziwe beyifundwe babantu boke.

³ Niyabonakala bona niyincwadi kaKrestu, umphumela womsebenzethu. Iye, incwadi engakatlolwa ngomsobo kodwana ngoMoya kaZimu ophilako, engakatlolelwa emqebethwini kodwana eenhliziyweni zabantu.

⁴ Ithemba elinjalo ngelethu ngoKrestu phambi koZimu.

⁵ Akutjho bona siyakghona thina ngokwethu ukuzizuzela ilitho, kodwana nguZimu osikghonisako.

⁶ Iye, nguye osenze sakghona njengeenceku zesivumelwano esitjha, ingasi zomthetho kodwana zakaMoya ngombana umthetho uyabulala kodwana uMoya uyaphilisa.

⁷ Yeke, nakube ikonzo yokufa egobhodlhwe ngamagama emqebethwini yeza ngephazimulo kangangobana ama-Israyeli ahlulwa kuqala uMosi ebusweni ngebanga layo iphazimulo esebusweni bakhe, iphazimulo leyo esele iphelelwe mamandla,

⁸ kuzokuba kangangani-ke ukuza kwekonzo kaMoya ngephazimulo na?

⁹ Nakube bekunephazimulo ekonzweni yokulahlwa, iphazimula kangangani-ke ikonzo eletha ukulungisiswa na?

¹⁰ Ngambala lokho ebekuseze kunephazimulo, sele kulahlekelwe yiphazimulo leyo ngebanga lokufika kwephazimulo ekulu

¹¹ ngombana nakube lokho okuphelako kweza ngephazimulo, yikulu kangangani-ke iphazimulo yalokho okungapheliko na?

¹² Yeke, njengombana sinethemba elinjalo nje, sinesibindi tle.

¹³ Thina asisinjengoMosi obekazigubuzesa ngesiyaya ukuze ama-Israyeli angamgqolozeli lokha iphazimulo leyo nayinyamalalako.

¹⁴ Kodwana imikhumbulwabo yathundubazwa ngombana bekube kunamhlanjesi isiyayeso sisese njengombana besinjalo lokha nakufundwa isivumelwano esidala. Azange sisuswe ngombana sisuka kwaphela lokha umuntu nakuKrestu.

¹⁵ Iye, bekube kunamhlanjesi njalo lokha nakufundwa uMosi, isiyaya sembesa imikhumbulwabo,

¹⁶ kodwana lokha umuntu natjhugulukela eKosini, isiyaya siyasuswa.

¹⁷ Nje-ke iKosi inguMoya, lapha kunoMoya kaSomnini khona kunekululeko.

¹⁸ Yeke soke thina esinobuso obungakathweswa isiyaya, thina esibona iphazimulo kaSomnini inga ibonakaliswe esibonibonini, siyatjhugululwa bona sibe nobujamo obufanako ukusuka kelinye izinga lephazimulo ukuya kelinye ngombana lokhu kuvela eKosini, enguMoya.