2 KWEBEKORINTE 2 - IsiNdebele 2012 Translation

¹ Ngaqeda nomkhumbulwami bona ngingasanithekela ngobuhlungu

² ngombana nakube nginizwisa ubuhlungu, akekho ongangithokozisa ngaphandle kwaloyo engimzwise ubuhlungu.

³ Yeke ngatlola njengombana ngenzile ukuze kuthi nasele ngifikile, ngingazwiswa ubuhlungu ngilabo ebekumele ngathana bayangithokozisa ngombana nginethemba ngani noke kobana ukuthaba kwami kuzakuba kuthaba kwenu noke.

⁴ Nganitlolela ngokukhathazeka okukhulu nangobuhlungu behliziyo kanye nangeenyembezi, ingasi ukunidabukisa kodwana ukunazisa ukuzika kwethando enginalo ngani.

Ukulitjalelwa kwesoni

⁵ Nakube kukhona obange ubuhlungu, akakabubangi kimi kodwana ngandlelathize ububange kini noke, nokho angingezeleli nangitjho njalo.

⁶ Isibetho abethwe ngaso linengi labantu simanele umuntu onjalo.

⁷ Nje-ke esikhundleni salokho kumele nimlibalele benimduduze ukuze angabhudungelwa lisizi elidluleleko.

⁸ Ngalokho ngiyanincenga bonyana nibonakalise ithando lenu kuye.

⁹ Kungebangelo ngitlolile kobana nginizizinye bengazi bona nizithobile kikho koke.

¹⁰ Enimlibalelako nami ngiyamlibalela. Engikulibaleleko, nakube kukhona, kube ngebanga lenu phambi kwakaKrestu

¹¹ ukuze uSathana angasibindi ngombana asikalalisi amehlo ngamaqhingakhe.

Ukutshwenyeka kwakaPowula eTrowasi

¹² Kuthe lokha nangifika eTrowasi kobana ngitjhumayele ivangeli lakaKrestu, ngavulelwa umnyango eKosini.

¹³ Kodwana azange ngibe nokuthula ngombana azange ngifunyane umzalwana uTitosi lapho. Yeke ngabalayelisa, ngabuyela eMasedoniya.

¹⁴ Akathokozwe uZimu ohlala asirhola njalo ngedwendwe lokuhlula kuKrestu nophutjheza ngathi iphunga elimnandi lelwazi lakhe yoke indawo.

¹⁵ KuZimu siliphunga elimnandi lakaKrestu hlangana nalabo abasindiswako nalabo ababhubhako.

¹⁶ Komunye sisivunda sokufa, komunye siliphunga lokuphila. Ngubani ongangomthwalo lo na?

¹⁷ Thina asisinjengabo abanengi, asikhambi sikhangisa ngelizwi lakaZimu ukuzenzela inzuzo. Kodwana kuKrestu sikhuluma phambi koZimu ngobuqotho njengabantu abathunywe nguye.