2 KWEBEKORINTE 13 - IsiNdebele 2012 Translation

Isiyeleliso sokugcina

¹ Sekungekwesithathu ngisiza kini: “Yoke indaba kumele iqiniswe ngabofakazi ababili namkha abathathu.”

² Ngabayelelisa labo abonako ngaphambilini kanye nabo boke abanye, godu ngisabayelelisa nanje nanyana ngingekho phakathi kwabo, njengombana ngenza lokha nangiphakathi kwenu nanginikhambele kwesibili. Ngithi angisoze ngaba nesirhawu

³ njengombana nithi nifuna ubufakazi bona uKrestu ukhulume ngami. Yena akasibuthakathaka ekusebenzeni ngani kodwana unamandla hlangana nani.

⁴ Yena wabethelwa ebuthakathakeni kodwana waphila ngamandla kaZimu. Sibuthakathaka kuye, kodwana ekusebenzeni kwethu ngani, sizokuphila naye ngamandla kaZimu.

⁵ Zihlolisiseni bona nisaphila ekukholweni na. Zizizinyeni. Kanti anilemuki bonyana uJesu Krestu ungaphakathi kwenu na? Nakungasinjalo khona-ke kutjho bona anikayiphumeleli ihlolo.

⁶ Ngiyathemba bona nizakufunyana bonyana thina azange sibhalelwe.

⁷ Sithandaza kuZimu bona ningenzi ilitho elingakalungi. Ingasi bona sibonakalise ebantwini bonyana siphumelele ihlolo, kodwana kobana nenze okulungileko ngitjho nanyana kubonakala inga sibhalelwe.

⁸ Ngitjho ngombana akunalitho esingalenza ukujamelana neqiniso ngaphandle kobana silijamele,

⁹ ngombana sihlala sithabile njalo lokha nasibuthakathaka kodwana nina ninamandla. Nje-ke imithandazwethu kukobana nipheleliswe.

¹⁰ Kungalokho ngitlola izintwezi nangingekho phakathi kwenu ukuze kuthi nangizako ngingafiki ngibe bukhali ekusebenziseni kwami igunya, iye, igunya engaliphiwa yiKosi kobana nginakhe ingasi bona nginigirize.

Ukulayelisa

¹¹ Kokugcina bazalwana, yenisale kuhle. Phikelelani ukupheleliswa, nilalele isibawo sami. Yibani hliziyonye, nihlale ngokuthula. UZimu wethando nokuthula uzakuba nani.

¹² Lotjhisanani ngokwangana okukhethekileko.

¹³ Boke abazalwana bayanilotjhisa.

¹⁴ Umusa weKosi uJesu Krestu, ithando lakaZimu nobudlelwana bakaMoya oCwengileko, akube nani noke.