2 KWEBEKORINTE 12 - IsiNdebele 2012 Translation

Imibono nesambulo sakaPowula

¹ Kufanele ngizikhakhazise nanyana kungasizi ilitho nje. Kodwana ngizakuragela phambili emibonweni nezambulweni zeKosi.

² Ngazi umuntu othileko kuKrestu, ekwathi eminyakeni elitjhumi nane edlulileko wanyuselwa ezulwini lesithathu. Ukuthi bekangemzimbeni namkha bekangasi ngemzimbeni, angazi, kwazi uZimu.

³ Iye, ngiyazi bona umuntu loyo, nanyana bekangemzimbeni namkha bekangasi ngemzimbeni angazi, kwazi uZimu.

⁴ Nokho yena wanyuselwa epharadesi. Wezwa izinto ezingakhulumekiko, iye, izinto umuntu angakavunyelwa bona azikhulume.

⁵ Yeke ngizazikhakhazisa-ke ngomuntu onjalo, kodwana angeze ngazikhakhazisa ngokwami ngaphandle kobuthakathaka bami.

⁶ Ngitjho nanyana bengingathanda ukuzikhakhazisa, bengingeze ngaba sidlhayela ngombana bengizabe ngikhuluma iqiniso. Kodwana ngiyalisa ukuzikhakhazisa ukuze kungabikhona ocabanga khulu ngami ukudlula lokho engikwenzako namkha engikukhulumako.

⁷ Ngafakwa iliva enyameni ukuze ngingazikhukhumezi ngebanga lezambulo ezikulu engizibonako. Nje-ke ilivelo lisithunywa sakaSathana angititinya ngalo.

⁸ Kwabe kwaba mahlandla amathathu ngincenga uSomnini bonyana alikhuphe kimapha.

⁹ Kodwana wathi kimi: “Umusa wami ukwanele ngombana amandla wami apheleliswa ebuthakathakeni.” Nje-ke ngizazikhakhazisa khulu ngobuthakathaka bami ukuze amandla kaKrestu ahlale phezu kwami.

¹⁰ Kungebangelo, ngenca kaKrestu, ngiyakuthabela ukuba buthakathaka, ukuthukwa, ukuba sebudisini, ukuzunywa nokuhlupheka. Ngitjho ngombana lokha nangibuthakathaka, ngiba namandla.

Ukukhathazeka kwakaPowula ngebandla leKorinte

¹¹ Sese ngiphenduke isidlhayela, kodwana ngini eningenzisileko. Emanyeni bekumele kube ngini eningibukako ngombana anginyazeki nakancani ebapostolini abadumilekwaba, ngitjho nanyana ngingasililitho nje.

¹² Amatshwayo wobupostoli, okutjho iimbonakaliso, iimangaliso nemikarisomraro, kwenziwa phakathi kwenu ngesineke esikhulu.

¹³ Yini eyanenza bona nilulazeke kunamanye amabandla ngaphandle kobana angizange ngibe mthwalo kini na? Yeningilibalele ebutjhaphenobo!

¹⁴ Qalani, sele ngilungele ukuza kini kilelihlandla lesithathu. Angizukuba mthwalo kini ngombana angifuni ipahla yenu kodwana ngifuna nina. Angithi abantwana abakameli ukondla ababelethi kodwana babelethi ekumele bondle abantwana.

¹⁵ Ngingathaba ukuninikela koke enginakho nami bengizinikele ngokwami. Nakube nginithanda khulu, nina nizangithanda kancani na?

¹⁶ Akhe kuthatheke-ke bona azange ngibe mthwalo kini. Nokho nithi batjho njengombana ngibe nobuqili, nganidlelezela.

¹⁷ Ngakhe nganidlelezela ngamanye wamadoda engawathumela kini na?

¹⁸ Ngakhombela uTitosi bona eze kini, ngamthuma nomunye umzalwana wethu. UTitosi azange anidlelezele. Kghani wakhe wanidlelezela? Azange siziphathe njalo nathi na? Azange sikhambe emagadangweni afanako na?

¹⁹ Kghani soke isikhathesi beniseze nidlumbana bona sizivikela kini na? Awa, thina besikhuluma phambi koZimu sikuKrestu begodu koke esikwenzako, bangani abathandekako, sikwenzela ukuqinisa nina.

²⁰ Nginevalo lokobana ekufikeni kwami ngingahle nginifunyane ningasi ngilokho engikufisako, nani ningahle ningifunyane ngingasi ngilokho enikufisako. Godu nginevalo lokobana mhlambe kungaba khona ukucabana, umona, ukuthukuthelelana, umrhobholo, ukuthukana, ukuhlebana, ukuzazi nesiphithiphithi.

²¹ Iye, nginevalo lokobana nangifikako godu, uZimami angangithoba phambi kwenu, mhlambe bengililele abanengi abona ngaphambilini kodwana bangeze baphenduka ekusilaphaleni kwabo, ekuziphatheni kumbi ngokwamabhayi kanye nemanyaleni abawenzileko.