2 KWEBEKORINTE 11 - IsiNdebele 2012 Translation

UPowula nabapostoli bamala

¹ Sengathi beninganginyamezelela ebudlhadlheni bami obuncanobu, iye, akhese ningibekezelele hle!

² Nginetjhisakalo ngani, iye, nginetjhisakalo kaZimu ngombana nganendisa endodeni eyodwa, enguKrestu ukuze nginethule kuye nilitlawu lakotlawu.

³ Kodwana nginevalo ngani kobana njengombana u-Efa akhohliswa yinyoka enobuqili, imikhumbulo yenu nayo ingahle iyengwe ekuzinikeleni kwenu kuKrestu okuqotho nokumsulwa.

⁴ Ngitjho ngombana nakufika umuntu afese atjhumayele omunye uJesu ohlukileko kilo esimtjhumayelako, namkha nanamukela omunye ummoya ohlukileko kilowo eniwamukeleko, namkha ivangeli elihlukileko kilelo esele nilamukele, niba msinyana ekuzinikeleni kokunjalo.

⁵ Angikhumbuli nokho bona ngingonyazeka kunabo boke abapostoli abadumilekwabo.

⁶ Mhlambe iye, ngilitjhapha ekukhulumeni, kodwana angisilo itjhapha elwazini; lokhu sakubonakalisa kini ngazo zoke iindlela, nakizo zoke izinto.

⁷ Kghani ngonile ngokuzithoba kwami ukuze nina niphakanyiswe ngebanga lokobana ngatjhumayela ivangeli lakaZimu kini ngesihle na?

⁸ Ngaphamba amanye amabandla ngokwamukela isekelo kiwo ukuze ngisize nina.

⁹ Ngesikhathi ngisesenani begodu ngiswele, azange ngitlhagele namunye wenu ngombana iindingo zami bezithwelwe bangani bami beMasedoniya. Ngaleyondlela ngazibamba begodu ngizokuragela phambili nokuzibamba ekubeni mthwalo kini.

¹⁰ Njengombana iqiniso lakaKrestu lingaphakathi kwami nje, ukuzikhakhazisa kwami angeze kwathuliswa eemfundeni ze-Arhaya.

¹¹ Kubayini na? Kghani kungombana nginganithandi na? Awa, uZimu uyazi bona nginithanda tle.

¹² Engikwenzako ngizokuraga ngikwenze ukuze ngingabaphi ithuba labo abalifunela ukuthathwa inga balingana nathi kilokho abazikhukhumeza ngakho.

¹³ Abazikhukhumezakwabo babapostoli bamala, iinsebenzi ezinekohliso, bazenza inga babapostoli bakaKrestu!

¹⁴ Akumangazi lokho! Ngitjho noSathana uyazitjhatjhanisa azenze ingilozi yokukhanya.

¹⁵ Nje-ke akurari lokha iinceku zakhe nazo nazizitjhatjhanisako zizenze inga ziziinceku zokulunga. Isiphetho sazo sizakufanelana nezenzo zazo.

Ukutlhaga kwakaPowula ekubeni mpostoli

¹⁶ Ngiyabuyelela ngithi akungabi noyedwa odlumbana bona ngisidlhayela. Kodwana nakube kunjalo, khona-ke ngamukelani njengesidlhayela ukuze nami ngikwazi ukuzikhakhakhakhazisa.

¹⁷ Lokho engikutjhoko mayelana nesibindi sokuzikhakhazisesi, angikutjho ngegunya leKosi, kodwana ngikutjho njengesidlhayela.

¹⁸ Njengombana abanengi bazikhukhumeza ngokwephaseli nje, nami-ke ngizozikhukhumeza

¹⁹ ngombana ninyamezelela iindlhayela ngethabo, khisibe nina nihlakaniphile.

²⁰ Lokha umuntu nanenza amakhoboka, adla ngani, adlala ngani, adlhodlhomela ngani namkha aniwakala ebusweni, seniyambekezelela.

²¹ Ngivuma ngeenhloni kobana saba buthakathaka khulu kilokho. Kodwana nanyana yini umuntu angazikhukhumeza ngakho, ngikhuluma njengesidlhayela, nami ngizikhukhumeza ngakho lokho.

²² BamaHebheru na? Nami nginguye. Bama-Israyeli na? Nami nginguye. Baziinzukulwana zaka-Abrahamu na? Nami ngingiso.

²³ Baziinceku zakaKrestu na? Ngikhuluma njengehlanya, ngiyinceku engcono kunabo. Ngisebenze ukudlula bona, ngabanjwa kanengi kunabo, ngabethwa kanenginengi begodu kube kanengi ngijika emlonyeni wokufa.

²⁴ Kwaba mahlandla amahlanu ngirithwa maJuda imivuvu ematjhumi amathathu nethoba.

²⁵ Ngadulwa bekwaba kathathu ngeentonga. Ngakghadlhwa ngamatje ihlandla elilodwa. Amahlandla amathathu ngaphahlazelwa umkhumbi, kwathi ubusuku nemini ngasunduzelwa ngelwandle.

²⁶ Ngibe sekukhambeni kanenginengi, ngaba sengozini yemilambo. Ngibe sengozini yabagongodi, ngaba sengozini yabantu bekhethu. Ngibe sengozini yabatjhili, ngaba sengozini nangingedorobheni. Ngibe sengozini nangiselwandle, ngaba sengozini kubazalwana bamala.

²⁷ Ngisebenze nzima ngazikhandla, ngasikhathi ngingalali. Ngiphethwe yindlala nomrhawu, ngahlala nginganakudla. Ngiququdwe makhaza nginganazambatho.

²⁸ Ngaphandle kwakho koke lokhu, ngihlala ngiqalene nokukhathazeka kwami okukhulu ngamabandla woke.

²⁹ Ngubani obuthakathaka mina ngingabi buthakathaka na? Ngubani okhubekiswako mina ngingatjhi na?

³⁰ Nakube kufanele ngizikhakhazise, ngizozikhakhazisa ngezinto ezikhombisa ubuthakathaka bami.

³¹ UZimu onguYise weKosi uJesu, ekumele adunyiswe isiphelani, uyazi bonyana angileyi amala.

³² Ngemzini weDamaseku, umbusi ongaphasi kwekosi u-Areta wathumela abalindi bona balinde umuzi wamaDamaseku ukuze ngibotjhwe.

³³ Kodwana ngehliswa ngesiqwebu ngefesidere elisemthangaleni, kwaba kuphunyurha kwami njalo ezandleni zakhe.