2 KWEBEKORINTE 10 - IsiNdebele 2012 Translation

UPowula uvikela isikhundla sakhe

¹ Mina Powula ngenyama, ngiyanincenga ngobumnene nangokuthobeka kwakaKrestu, iye, mina engizithobako lokha nangiphambi kwenu, kodwana nginesibindi lokha nangingekho kini!

² Ngithi kini nangilapho, akungatlhogeki bona bengikhombise isibindi hlengiphikisana nalabo abadlumbana bona senza izinto ngokwenyama.

³ Ngambala siphila njengabantu, kodwana asilwi ipi ngokwenyama.

⁴ Thina iinkhali zepi yethu akusizo zenyama, kodwana zinamandla kaZimu kobana zitjhabalalise iinsekelo. Sitjhabalalisa ukuphikisana

⁵ kanye nazo zoke iinqabo ezizikhukhumezako ezijanyiswa kobana zijamelane nelwazi lakaZimu begodu yoke imikhumbulo siyithumbela ekuthobeleni uKrestu.

⁶ Silungele ukuhlunguphaza koke ukungalaleli lokha ukulalela kwenu nasele kuphelelisiwe.

⁷ Qalani lokho okuphambi kwenu. Nakube niyazithemba bona ningebakaKrestu, zikhumbuzeni bona, njengombana ningebakaKrestu, nathi singibo.

⁸ Nje-ke ngitjho nanyana ngizikhakhakhakhazisa khudlwana ngegunya lethu iKosi esiphe lona kobana sinakhe singanigirizi, angeze ngaba neenhloni ngalokho.

⁹ Angifuni ukubonakala inga ngilinga ukunithusela ngeencwadi zamezi

¹⁰ ngombana kuthiwa: “Nakuziincwadi zakhe zona, zinesisindo begodu zitjhubile, kodwana yena siqu sakhe akanasithunzi, nekulumakhe ayazisi.”

¹¹ Abanjalo abalemuke bonyana lokho esikutjho ngencwadi nasingekho kibo, sizakutjho nalokha nasinabo.

¹² Asizifanisi namkha sizilinganise nabanye balabo abazibukako. Kodwana nabazilinganisako bebazifanise omunye nomunye, ababonisi ukuhlakanipha.

¹³ Kodwana thina asizuzikhukhumeza ukudlula isilinganiso kodwana sizakuba ngaphakathi kwesilinganiso uZimu asibekele sona, besifikelele ngitjho nakini.

¹⁴ Asikadluleleli ekuzigqajeni kwethu njengombana bekuzokuba njalo nakube besingakafiki kini ngombana thina singabokuthoma abafika kini ngevangeli lakaKrestu.

¹⁵ Nje-ke asizikhakhazisi ngokudluleleko ngemisebenzi yabanye. Kodwana ithemba lethu kukobana ukukholwa kwenu nakulokhu kwanda, nomkhakha wokusebenza kwethu phakathi kwenu nawo uzakwandiswa khulu;

¹⁶ iye, ukuze sikwazi ukutjhumayela ivangeli nemazweni angaphetjheya kwenu, ngaphandle kokuzikhakhazisa ngomsebenzi osele wenziwe endaweni yomunye umuntu.

¹⁷ Umtlolo uthi: “Loyo ozikhakhazisako, akazikhakhazise kuSomnini”

¹⁸ ngombana abathokozwako akusingilabo abazibukako kodwana kuthokozwa ababukwa yiKosi.