2 KWEBEKORINTE 1 - IsiNdebele 2012 Translation

Ukulotjhisa

¹ Mina Powula umpostoli kaKrestu Jesu ngokwentando kaZimu, noThimothi umzalwana, silotjhisa ibandla lakaZimu eKorinte nabo boke abacwengileko abakilo loke le-Arhaya.

² Akube kini umusa nokuthula okuvela kuZimu uBaba neKosini uJesu Krestu.

UPowula uthokoza uZimu

³ Akathokozwe uZimu onguyise weKosi yethu uJesu Krestu nonguyise wesirhawu noZimu wenduduzo yoke,

⁴ osiduduza kizo zoke iinhlupheko zethu ukuze sikwazi ukududuza labo abasesizini nanyana kungelinjani ngenduduzo esiyifunyene kuZimu.

⁵ Njengombana iinhlupheko zakaKrestu zivamile kithi, nokududuzwa kwethu kwandile ngoKrestu.

⁶ Nasikhathazekako, kungebanga lokududuzwa kanye nokusindiswa kwenu; nasiduduzwako, kungebanga lokududuzwa kwenu okuveza kini ukubekezelela ngesineke iinhlupheko nathi esizithweleko.

⁷ Ithemba lethu ngani lidzimelele ngombana siyazi bonyana njengombana nihlanganyela eenhluphekweni zethu, ngokufanako nihlanganyela ekududuzweni kwethu.

⁸ Asithandi bona ningabi nelwazi bazalwana mayelana nobuhlungu esabuthwala esifundeni se-Asiya. Sagandeleleka khulu, kwaba ngaphezu kwamandla wethu besalahlekelwa nalithemba lokuphila.

⁹ Ngambala sazizwela inga sigwetjelwe ukufa. Nokho lokhu kwenzeka ukuze singazithembi thina kodwana sithembe uZimu okunguye ovusa abafileko.

¹⁰ Yena owasiphephisa ekufeni okungakaya, uzakubuye asisindise; ithemba lethu silibeke kuye bona uzakubuye asisindise godu

¹¹ njengombana nani nihlanganyele ekusisizeni ngemithandazo yenu. Nje-ke abanengi bazasithokozela malungana nomusa ongaka esiwuphiwe ngemithandazo yabanengi.

Ukutshwiliswa kwekhambo lakaPowula

¹² Iye, nakhu ukuzigqaja kwethu: Unembeza wethu uyafakaza bonyana ephasinapha, khulukhulu mayelana nobudlelwano bethu nani, saziphatha ngokucwenga nangokuthembeka okuvela kuZimu. Senza njalo ingasi ngokokuhlakanipha kwephaseli kodwana ngokomusa kaZimu.

¹³ Asinitloleli ilitho eningekhe nakwazi ukulifunda namkha ukulizwisisa. Nje-ke ngiyathemba bonyana

¹⁴ njengombana ningakasizwisisi ngokupheleleko, nizakuzwisisa ngokuzeleko bonyana ningazigqaja ngathi njengombana nathi sizozigqaja ngani ngelanga leKosi uJesu.

¹⁵ Njengombana benginesiqiniseko ngalokhu, bengifuna ukuza kini qangi ukuze nikwazi ukuba nomusa obuyelelweko.

¹⁶ Bengifuna ukudlula kinapho ngizonibona lokha nangiya eMasedoniya godu ngidlule lapho nasele ngibuya khona ukuze ningisize endlelenami yokuya eJudiya.

¹⁷ Kghani nidlumbana bona bengizaza nangihlela lokhu na? Ngenza amahlelo wami ngokwamazinga wabantu, ngilungele ukuthi, “Iye, iye”, khonapho ngithi, “Awa, awa” na?

¹⁸ Ngokuthembeka kwakaZimu, umyalezwethu kini awusi ngu: “Iye; awa”.

¹⁹ INdodana kaZimu uJesu Krestu eyatjhunyayelwa phakathi kwenu ngimi noSilasi kanye noThimothi beyingasi ngu “Iye; awa”, kodwana kiyo kuhlala kungu “Iye” kwaphela.

²⁰ Kiyo, esinye nesinye isithembiso sakaZimu singu “Iye”. Yeke ngalokho ngayo sithi “Amen” kilo idumo lakaZimu.

²¹ Kodwana nguZimu osiqinisako sikanye nani kuKrestu bewasizesa,

²² ngokusibeka itshwayo lakhe, wasipha noMoya wakhe ngeenhliziyweni zethu njengesibekiso.

²³ Nje-ke, ngibiza uZimu bona abe ngufakazi wokobana kube ngebanga lokuniphephisa ukungabuyi kwami ngize eKorinte.

²⁴ Angitjho bona sibusa phezu kokukholwa kwenu, kodwana siziinsebenzi kanye nani ukuze nithabe ngombana nidzimelele ekukholweni.