2 IINKRONIKE 9 - IsiNdebele 2012 Translation

Indlovukazi yeTjheba ithekela uSolomoni

¹ Kwathi bona indlovukazi yeTjheba izwe ngendumela kaSolomoni, yeza eJerusalema kobana izomrareja ngeenrarejo ezibudisi. Yafika ikhamba nedwendwe elikhulu, ize namakamela athwele iinungo, umhlumba wegolide namatje aligugu. Yakhuluma noSolomoni ngakho koke eyayikucabanga.

² USolomoni waphendula yoke imibuzo yendlovukazi, akunalitho elalibukhuni kuye abhalelwa kuliphendula endlovukazini.

³ Kuthe lokha indlovukazi yeTjheba nayibona ubuhlakani bakaSolomoni kanye nesigodlo asakhileko,

⁴ ukudla okwakusetafuleni lakhe, ihlelo lokuhlala kweenkhulu zakhe, ubujamo beensebenzi zesigodlo nevunulwazo, abaphathikapho bakhe ngevunulwabo kanye nemihlabelo yokutjhiswa ayenza ethempelini lakaSomnini, yaphelelwa mamandla.

⁵ Yathi ekosini: “Umbiko engiwuzwe ngisesenarhenami ngawe kanye nobuhlakani bakho kutjho bona uliqiniso.

⁶ Uyazi, azange ngikholwe abakutjhwileko, kufikela bengifike ngizozibonela mina ngamehlwami. Angikatjelwa ngitjho nengcenye yobukhulu bobuhlakani bakho obungaka. Wena udlula umbiko engiwuzwe ngawe kude.

⁷ Agu! Abantu bakho bayajekezela uyazi! Maye! Zinetjhudu kangangani iinsebenzi zakho ezihlala zizwa ukuhlakanipha kwakho!

⁸ Akudunyiswe uSomnini uZimakho okarekileko ngawe, bewakwenza waba yikosi ngokukubeka esihlalweni sakhe sobukhosi kobana ubuse esikhundleni sakaSomnini uZimakho. UZimakho uthanda u-Israyeli begodu unetjisakalo yokobana abe sisizwe esinzinze isiphelani. Ngebangelo ukujamise waba yikosi phezu ko-Israyeli kobana ulethe ukulunga nobulungiswa.”

⁹ Yanikela ikosi uSolomoni igolide elimakhilogremu angaphezu kweenkulungwana ezine, umhlumba weenungo namatje aligugu. Azange khekube neenungo ezinengi kangako njengalezo indlovukazi yeTjheba eyazipha ikosi uSolomoni.

^10-12 Ikosi uSolomoni yapha indlovukazi yeTjheba koke eyayikufisa neyakubawako. Izipho uSolomoni azipha indlovukazi zazidlula lezo eyamupha zona. Yagoduka-ke yabuyela enarhenayo ikhamba nedwendwe layo. Abantu bakaRhiramu nabantu bakaSolomoni beza negolide elivela e-Ofira, godu beza neengodo ze-almugi namatje aligugu. Ikosi yasebenzisa iingodo ze-almugi ukwakha iintepisi zethempeli lakaSomnini nezesigodlo, yenzela nababhini imihlobohlobo yamaharibha. Amabono anjengalawa azange akhe abonwe kwaJuda.

Umnotho kaSolomoni

¹³ Ubudisi begolide elalifunyanwa nguSolomoni minyaka yoke lalimakhilogremu aziinkulungwana ezimatjhumi amabili nantathu.

¹⁴ Lokhu bekungafaki inzuzo elethwa barhwebi nabathengisi. Woke amakhosi we-Arabhiya kanye nabaphathi benarha nabo baletha igolide nesiliva kuSolomoni.

¹⁵ Ikosi uSolomoni yenza amakhulu amabili weenhlangu ezikhandwe ngegolide elisipara. Isihlangu ngasinye besenziwe pheze ngamakhilogremu alikhomba wegolide.

¹⁶ Godu wakhanda namakhulu amathathu wamakhande ngegolide elisipara. Ikhande ngalinye laba namakhilogremu amabili wegolide. Ikosi yawabeka esigodlweni okwakuthiwa liHlathi leLibhanoni.

¹⁷ Ikosi uSolomoni yenza isihlalo sobukhosi esikhulu yasikghabisa ngamazinyo wendlovu godu yasembesa ngegolide ecolisiweko.

¹⁸ Isihlalo sobukhosi gade sineentepisi ezisithandathu nesinabelo seenyawo segolide esasinamatheliswe lapho. Ngemaqadi kwesihlalo gade kuneemphumuzamkhono, ngapha nangapha kwakhona kujame ibhubezi.

¹⁹ Kwakujame amabhubezi alitjhumi nambili eentepisini ezisithandathu, kujame linye ngapha nangapha komqoqo wesitepisi ngasinye. Akunabukhosi obakhe benzelwa into efana nale.

²⁰ Zoke iinqoko zekosi uSolomoni gade zenziwe ngegolide, nazo zoke iinsetjenziswa ebezisesigodlweni seHlathi leLibhanoni gade ziyigolide etsengileko. Ngeenkhathi zakaSolomoni isiliva belingakaqakatheki.

²¹ Ikosi uSolomoni gade inemijeje yemikhumbi yokurhweba ebegade ikhanjiswa ngokulawulwa babantu bakaRhiramu. Njalo ngemva kweminyaka emithathu beyibuya ithwele igolide, isiliva, amazinyo wendlovu, iimfene kanye neenkghabu.

²² USolomoni gade anjinge khulu begodu anobuhlakani obukhulu ukudlula woke amakhosi wephasi.

²³ Woke amakhosi wephasi eza kuSolomoni ukuzokulalela ubuhlakani uZimu abubeke kuye.

²⁴ Omunye nomunye wabantwabo gade eza nesibiko, okuyipahla yesiliva negolide, izambatho, amakha neenungo kanye neenjomani neemeyila. Lokhu bekwenzeka umnyaka nomnyaka.

²⁵ USolomoni gade aneenkulungwana ezine zeendawo lapha agcina khona iinjomani neenkarana zakhe, godu aneenkulungwana ezilitjhumi nambili zabakhweli beenjomani. Koke wakugcina emadorobheni weenkarana nakuye eJerusalema.

²⁶ Wabusa woke amakhosi ukusuka emlanjeni iYufrathe ukuya enarheni yamaFilista emikhawulweni yeGibhide.

²⁷ Ikosi uSolomoni yenza bonyana eJerusalema isiliva lijayeleke inga mamatje, nomsedari ube mnengi inga mimithi yamakhiwani wommango eentatjaneni zenarha.

²⁸ Iinjomani zakaSolomoni zazithethwe eGibhide nakizo zoke iinarha ezinye.

²⁹ Izehlakalo zokubusa kwakaSolomoni, ukusuka ekuthomeni bekube sekupheleni, zitlolwe emitlolweni kaNathani umphorofidi, emphorofidweni zaka-Arhiya umTjhilo nemibonweni ka-Ido umboni owakhuluma ngoJerobhowamu umsa kaNebathi.

³⁰ USolomoni wabusa phezu kwaka-Israyeli woke iminyaka ematjhumi amane.

³¹ Ngemva kwalokho wahlongakala, wabulungwa eMzini kayise uDavida. URerhobhowamu indodanakhe wabusa esikhundleni sakhe.