2 IINKRONIKE 5 - IsiNdebele 2012 Translation

Umfaji wesivumelwano ungeniswa ngethempelini

¹ Kwathi nasele uSolomoni awenze woke umsebenzi wethempeli lakaSomnini, wangenisa zoke izinto uyise uDavida azahlukanisela uZimu. Wabeka isiliva negolide nezinye iinsetjenziswa ngezindlini zamagugu zethempeli lakaZimu.

² Nje-ke uSolomoni wabizela eJerusalema abaphathi bakwa-Israyeli, zoke iinhloko zeenkoro kanye nabarholi bemindeni yakwa-Israyeli bonyana basuse umfaji wesivumelwano sakaSomnini eMzini kaDavida ebuphephelweni beZiyoni.

³ Woke amadoda wakwa-Israyeli abuthana ngekosini ngesikhathi somnyanya ngenyanga yekhomba.

⁴ Kuthe bona kufike boke abaphathi bakwa-Israyeli, amaLevi aguga umfaji,

⁵ awenyusa kanye netende lokuhlanganela nakho koke okucwengileko okwakungaphakathi kwawo. Abaphristi abamaLevi bathwala koke lokho.

⁶ Ikosi uSolomoni nayo yoke ihlangano yakwa-Israyeli eyayibuthanele kiyo yeza phambi komfaji, yenza imihlabelo ngezimvu nangeenkomo ezinengi kangangobana kwakubudisi ukuzibala.

⁷ Abaphristi baletha umfaji wesivumelwano sakaSomnini endawenawo emsamo wethempeli, okuyindawo ecwenge khulu. Bawubeka ngaphasi kwamaphiko wamakerubhi.

⁸ Amakerubhi anamaphiko aphawulukele ngehla kwendawo yomfaji awugubuzesa kanye neengodo zawo zokuwuguga.

⁹ Iingodwezo zazizide kangangobana amaphelelo wazo ukusuka emfajini gade abonakala nawungaphambi komsamo kodwana ingasi nawusesirhodlweni. Umfaji usese lapho nanamhlanjesi.

¹⁰ Kwakunganalitho ngaphakathi komfajapho ngaphandle kwemiqebethu emibili eyafakwa nguMosi eRhorebe lapha uSomnini enza khona isivumelwano nama-Israyeli ngemva kokuphuma kwawo eGibhide.

^11-13 Boke abaphristi ebebalapho bazihlukanisela, ngitjho nalabo ebegade bangasi semsebenzini. Woke amaLevi agade ababhini, u-Asafa, uHemani, uJeduthuni kanye namadodanabo neenhlobo zabo bajama ngepumalanga ye-aldari ebe lingesirhodlweni. Bebavunule ilineni begodu baphethe iiwahlo nemihlobohlobo yamaharibha. Bebaphekelelwa baphristi abalikhulu namatjhumi amabili abababethi beemporompita. Ababethi beemporompita nabakhaleli bekufuze badumise begodu bathokoze uSomnini ngelizwi linye. Kuthe lokha abaphristi nabaphuma esakhiweni sethempeli beza ngesirhodlweni nalokha kuzwakala iimporompita, iiwahlo nezinye iinliliswa, abakhaleli nabathoma ukukhalela ingoma yokudumisa uSomnini basithi, “USomnini ulungile, iye, ithando lakhe ngelanini nanini”, kwavela ilifu lazala ithempeli lakaSomnini.

¹⁴ Abaphristi azange basakghona ukwenza umsebenzabo ngebanga lelifelo. Ithempeli lakaZimu lazala swi ngephazimulo kaSomnini.