2 IINKRONIKE 4 - IsiNdebele 2012 Translation

I-aldari lekoporo nebhada yekoporo

¹ USolomoni wayala bona kwenziwe i-aldari lekoporo elimamitha alitjhumi ubude, amamitha alitjhumi ububanzi namamitha amahlanu ukuphakama.

² Kwenziwa nebhada ekulu okwakuthiwa lilwandle. Beyibunjwe yaba ndulungu ngalendlela: imamitha amabili nesiquntu ukuphakama, inomqoqo omamitha alitjhumi nahlanu ukuzomba, amamitha amahlanu ukusuka komunye umqoqo ukuya komunye ukuvundla.

³ Ngaphasi komqoqo bekunemifanekiso yeenkunzi ezizombelezileko. Zazilitjhumi esiquntwini ngasinye semitha, zimijeje emibili. Bezibunjelelwe ebhadeni.

⁴ Ibhada beyinzinze phezu kweenkunzi ezilitjhumi nambili, ezintathu ziqale ngetlhagwini, ezintathu ziqale ngetjingalanga, ezintathu ziqale ngesewula begodu ezintathu ziqale ngepumalanga. Ibhada beyinzinze phezu kwazo, zona zifulathelene.

⁵ Beyimabhombo ngangesandla inomqoqo ofana newebhegere kwanga ngewelikhwa lommango. Gade ithwele amalitha aziinkulungwana ezimatjhumi asithandathu nesithandathu.

Ezinye izinto ezenzelwa ukusetjenziswa ngethempelini

⁶ Kwenziwa izitja zokuhlambela ezilitjhumi, kwabekwa ezihlanu ngesewula, ezihlanu ngetlhagwini. Ngezitjenapho bekuhlanzelwa izinto ezazifanele ukusetjenziswa emhlabelweni wokutjhiswa, kodwana abaphristi bona bahlambela ngaphakathi kwebhada ekulu.

⁷ Kwenziwa izinti zeembani zegolide ezilitjhumi ukuya ngendlela okufanele zenziwe ngakhona. Zabekwa ngethempelini, zaba zihlanu ngesewula, zaba zihlanu ngetlhagwini.

⁸ Kwenziwa amatafula alitjhumi abekwa ngethempelini. Aba mahlanu ngesewula, aba mahlanu ngetlhagwini. Godu kwenziwa izitja zokunyenyeza zegolide ezilikhulu.

⁹ Kwenziwa isirhodlo sabaphristi, nesirhodlo esikhulu kanye neminyango yakhona. Kwanamekwa iminyango leyo ngekoporo.

¹⁰ Ibhada ekulu yabekelwa ngeqadi kwethempeli ukuyela ngejikeni elingesewula-pumalanga.

¹¹ Godu uRhuramu wenza iimbiza neenrharafu kanye nezitja zokunyenyeza. Ngaleyondlela uRhuramu waphetha umsebenzi athembisa ukuwenzela ikosi uSolomoni ethempelini lakaZimu.

¹² Iinsika ezimbili, iimpundu ezisamjeka phezu kweensika ezimbili, imiluko emibili ezombeleze imijeka ephezu kweensika,

¹³ amakhulu amane wamarharinada malungana nemiluko emibili (imijeje emibili yamarharinada emlukweni ngamunye) ikghabise imijeka egade iphezu kweensika,

¹⁴ iinjamiso azenzako nezitja zazo zokuhlambela,

¹⁵ ibhada ekulu ekhethekileko neenkunzi ezilitjhumi nambili ezingaphasi kwayo,

¹⁶ iimbiza, iinrharafu, iimforogo kanye nazo zoke iintlabagelo eziphathelene nazo, koke lokhu ngokwenziwa nguRhuramu osisazi ngekoporo emanyako. Wazenzela uSolomoni mayelana nethempeli lakaSomnini.

¹⁷ Izintwezo bezibunjelwe emdakeni ngemrhobeni weJordani phakathi kweSukothi neTsereda ngelizwi lekosi uSolomoni.

¹⁸ Zoke izinto ezenziwa nguSolomoni lezi zaba zikulu kangangobana azange kukghoneke ukubala ubudisi bekoporo yakhona.

¹⁹ Ngaleyondlela uSolomoni wenza koke okwakusethempelini lakaZimu: i-aldari legolide, amatafula okwakubekwe kiwo izikwa zobukhona,

²⁰ izinti zeembani ezenziwe ngegolide etsengileko kanye neembani zakhona, ezazivutha ngaphambi kwendawo ecwenge khulu njengombana gade kuhleliwe;

²¹ amathuthumbo aseembanini kanye nesicimasibani ebe kwenziwe ngegolide ekhethekileko,

²² iinquntapete, izitja zokunyenyeza, izitja ezinye namadengela ebe kwenziwe ngegolide etsengileko; godu neminyango yegolide engenela ethempelini kanye neminyango yegolide engenela endaweni ecwenge khulu.