2 IINKRONIKE 34 - IsiNdebele 2012 Translation

Amatjhuguluko alethwa nguJosiya

¹ UJosiya gade aneminyaka ebunane lokha naba yikosi. Wabusa eJerusalema iminyaka ematjhumi amathathu nanye.

² Wenza okuhle phambi kwakaSomnini, wakhamba eendleleni zakayisemkhulu uDavida, azange aphambukele ngesinceleni namkha ngesidleni.

³ Kuthe emnyakeni wobunane wokubusa kwakhe, asesemncani njalo, wathoma ukufuna uZimu kayisemkhulu uDavida. Emnyakeni wetjhumi nambili wokubusa kwakhe wathoma ukuhlwengisa ikwaJuda neJerusalema ngokususa iindunduma, imifanekiso yabo-Atjhera, iinthombembazwa neenthombembunjwa.

⁴ Waqinisekisa bonyana kubhuruzwa ama-aldari waboBhali, kwagawulwa nama-aldari wetjhwalo ebegade angehla kwaboBhalabo. Waphohloza imifanekiso yabo-Atjhera, abosingazimu neenthombembunjwa. Wathatha zoke izintwezo wazephulaphula zaba ziinquqwana wazirhatjha phezu kwamathuna wabagade bazenzela imihlabelo.

⁵ Watjhisa amathambo wabaphristi ema-aldarenabo, ngalokho wahlwengisa ikwaJuda neJerusalema.

⁶ Waphenya amathempedlana asemabhodulukweni wamadorobho wakwaManase, kwa-Efrayimu nakwaSimiyoni ukuyokufika kwaNafitali.

⁷ Wabhuruza ama-aldari, wafahlaza imifanekiso yabo-Atjhera neenthombembazwa bewagawula ama-aldari wetjhwalo aba ziinquqwana kilo loke lakwa-Israyeli. Yeke wabuyela eJerusalema.

⁸ Emnyakeni wetjhumi nabunane wokubusa kwakaJosiya lokha nasahlambulula inarha nethempeli, wathumela uTjhafani umsa ka-Atsaliya noMaseya oyinduna yedorobho noJowarhi umsa kaJowarhazi unobhala wekosi kobana bayokuvuselela ithempeli lakaSomnini.

⁹ Bona baya kuRhilikhiya umphristi omkhulu bamnikela imali egade ilethwe ethempelini lakaZimu. AmaLevi agade abogosa bekabuthelele imali leyo ebantwini bakwaManase, bakwa-Efrayimu, kiyo yoke imisalela yakwa-Israyeli, ebantwini bakwaJuda, bakwaBhenjamini kanye nezakhamuzini zeJerusalema.

¹⁰ Imali leyo yanikelwa amadoda agade akhethelwe ukutjheja umsebenzi ethempelini lakaSomnini. Amadoda lawo ayinikela iinsebenzi ezazilungisa begodu zivuselela ithempeli,

¹¹ okutjho abafuleli nabakhi kobana bathenge amatje abaziweko kanye neengodo zamabalelo namabhaluga malungana nemakho eyafadalaliswa makhosi wakwaJuda.

¹² Amadoda enza umsebenzi ngokwethembeka. Wona gade eluswe nguJarhathi no-Obadiya amaLevi aziinzukulwana zakaMerari, noZakariya noMetjhulamu iinzukulwana zakaKhehathi. Woke amaLevi agade anekghono lokudlala iinliliso zombhino,

¹³ gade anikelwe umsebenzi wokwelusa abasebenza ngezandla kanye neensebenzi ngokuhlukahlukana komsebenzi. Amanye wamaLevi gade abososiba, abomabhalana nabogosa.

Ukufunyanwa kwencwadi yomthetho

¹⁴ Kwathi lokha aboTjhafani nabasakhuphela ngaphandle imali egade ingeniswe ngethempelini lakaSomnini, uRhilikhiya umphristi wafumana incwadi yomthetho kaSomnini eyatlolwa nguMosi.

¹⁵ URhilikhiya wathi kuTjhafani umabhalana: “Ngifunyene nasi incwadi yomthetho ethempelini lakaSomnini.” Wamnikela yona.

¹⁶ Yeke uTjhafani wathatha incwadi leyo wayisa ekosini, wayibikela wathi: “Iinkhulu zekosami zenze koke ezinikelwe bona zikwenze.

¹⁷ Ziyikhuphile imali egade ingethempelini lakaSomnini zayinikela iinduna zomsebenzi kanye nabasebenzi.”

¹⁸ UTjhafani ongumabhalana godu wathi ekosini: “URhilikhiya umphristi unginikele nasi incwadi.” Wayifundela ikosi.

¹⁹ Kuthe lokha ikosi nayizwa amezwi womthetho, yadabula izambatho zayo.

²⁰ Yakhupha nasi imiyalo ngoRhilikhiya, u-Arhikhamu umsa kaTjhafani, u-Abidoni umsa kaMika, uTjhafani umabhalana nango-Asaya isandla sekosi yathi:

²¹ “Khambani niyosibuzela kuSomnini, mina nemisalela yakwa-Israyeli nakwaJuda, ngokutlolwe encwadini efunyenweko le. Maye, yikulu kangangani itukuthelo kaZimu phezu kwethu ngebanga labobamkhulu abangazange balonde ilizwi lakaSomnini! Azange benze njengokutjho kwakho koke okutlolwe encwadinapha.”

²² URhilikhiya nalabo ikosi egade imthume nabo bakhamba bayokubona umphorofidikazi uRhulda ogade amfazi kaTjhalumu umsa kaTokehathi omsa kaRhasira usompherho. URhulda gade ahlala engcenyeni etja yeJerusalema. Kuthe bona bamtjele amezwi kaJosiya

²³ yena wathi kibo: “Nakhu okutjhiwo nguSomnini uZimu wakwa-Israyeli, ‘Tjelani umuntu onithumele kimi loyo

²⁴ bonyana ngithi ngizokwehlisela ihlekelele phezu kwendawo le nebantwini bayo, okutjho woke amanikelela atlolwe encwadini efundwe phambi kwekosi yakwaJuda.

²⁵ Ngizokwenza lokhu ngombana bangihlubukile bebatjhisela abosingazimu itjhwalo ukuze bangihlabekise ngazo zoke iinthombe abazenze ngezandla zabo. Yeke ubukhali bami ngizabuthululela endaweni le begodu angeze bacinywa mumuntu.’

²⁶ Ikosi yakwaJuda enithumileko leyo bona nizoyibuzela kuSomnini uZimu, itjeleni naku umyalezo kaSomnini uZimu wakwa-Israyeli uthi, ‘Uwalalele kuhle amezwi wencwadi leyo.

²⁷ Ihliziywakho ithintekile wazithoba phambi kwakaZimu lokha nawuzwa lokho akukhulume ngokujamelana nendawo le nabantu bayo. Ngebanga lokuzithoba kwakho phambi kwami bewadabula nezambatho zakho walila phambi kwami, ngithi ngikuzwile.’ Lawa mamezwi kaSomnini uZimu.

²⁸ “Begodu uSomnini uZimu wathi, ‘Lokha nangizokubuthelela kiboyihlomkhulu, ngiqinisile bona uzokubulungwa ngokuthula. Amehlwakho akasoze abona yoke ihlekelele engizoyehlisela phezu kwendawo le nebantwini abahlala lapha.’ ” Yeke bathatha amezwi womphorofidikazi loyo bawasa ekosinabo.

Ukuvuselelwa kwesivumelwano

²⁹ Yeke ikosi uJosiya yabiza boke abaphathi bakwaJuda nebeJerusalema.

³⁰ Yakhuphukela ethempelini lakaSomnini ikhambisana namadoda wakwaJuda, abantu beJerusalema, abaphristi namaLevi, boke abantu ukusukela kwabakhulu ukuya kwabancani. Wabafundela bona bezwe woke amezwi wencwadi yesivumelwano efunyenwe ngethempelini lakaSomnini.

³¹ Ikosi yajama endawenayo yenza isivumelwano phambi kwakaSomnini uZimu bona izakulandela uZimu nokobana izakulonda imiyalwakhe, iimfuneko neemiso zakhe ngehliziywayo nangomphefumulwayo woke. Ngalokho beyiqinisa bona izakukhamba ngokwamezwi wesivumelwano agade atlolwe encwadinapho.

³² Yasuka lapho yayala bona woke umuntu eJerusalema nakwaBhenjamini enze isibopho ngencwadi leyo. Yeke abantu beJerusalema bakwenza lokho ngokukhambisana nesivumelwano sakaZimu, uZimu waboyisemkhulu.

³³ UJosiya wasusa zoke iinthombembazwa ezinyenyisako kizo zoke iinarha zama-Israyeli, wayala boke ebegade bakhona kwa-Israyeli bonyana balotjhe uSomnini uZimabo. Azange bahluleke ukulandela uSomnini uZimu waboyisemkhulu emihleni yoke yokuphila kwakhe.