2 IINKRONIKE 3 - IsiNdebele 2012 Translation

Ukwakhiwa kwethempeli

¹ USolomoni wathoma ukwakha ithempeli lakaSomnini eJerusalema entabeni iMoriya lapha uyise uDavida afumana khona isambulo. Gade kuseselelweni saka-Arawuna umJebusi, indawo eyathengwa nguDavida.

² Wathoma ukwakha elangeni lesibili lenyanga yesibili emnyakeni wesine wokubusa kwakhe.

³ Lezi ziinlinganiso ezaquntwa nguSolomoni mayelana nokwakhiwa kwethempeli lakaZimu ukuya ngokweenlinganiso zaphambilini: Kwakumamitha amatjhumi amathathu ubude namamitha alitjhumi ububanzi.

⁴ Ubude bethempeli bebululwe ngamathuri anobubanzi bethempeli obumamitha alitjhumi, namamitha alitjhumi ukuphakama. Wanameka ilingaphakathi lawo ngegolide elitsengileko.

^5-7 Wavala ilawu elikhulu ngomsayipurusi bewalinameka ngegolide elitsengileko elivela eParivayimu. Walikghabisa ngomuthi wesundu, ngemikghabiso yeketani nangamatje aligugu. Godu wabaza namakerubhi emabodeni. Wanameka loke ilawelo ngegolide: amabhaluga, amagoseni, amaboda kanye neminyango.

⁸ Indawo ecwenge khulu beyingenelele emsamo ngamamitha alitjhumi ilingana nobubanzi bethempeli. Ububanzi bayo nabo bebumamitha alitjhumi. Wanameka ilingaphakathi layo pheze ngeenkulungwana ezimatjhumi amabili zamakhilogremu wegolide elitsengileko.

⁹ Iinkhonkhwani zegolide bezinobudisi obungaphezu kwamakhilogremu amatjhumi amabili nabunane. Godu wanameka namalawu angaphezulu ngegolide.

Ukwenziwa kwamakerubhi

¹⁰ Wabumba amakerubhi amabili endaweni ecwenge khulu bewawanameka ngegolide.

¹¹ Ubukhulu bamaphiko wamakerubhi gade bumamitha alitjhumi. Iphiko elilodwa lekerubhi gade limamitha amabili nesiquntu ubude lithintene neboda lethempeli, khibe iphiko elinye lalo nalo elimamitha amabili nesiquntu ubude liphawulukeleke ephikweni lekerubhi elinye.

¹² Ngokunjalo iphiko elilodwa lekerubhi lesibili belimamitha amabili nesiquntu ubude begodu lithinte iboda elinye lethempeli, iphiko lalo elinye nalo elimamitha amabili nesiquntu belinamathelene nephiko lekerubhi lokuthoma.

¹³ Nje-ke amaphiko wamakerubhi lawo gade amamitha alitjhumi. Bekajame ngeenyawo zawo aqale ngelawini elikhulu.

¹⁴ USolomoni waluka irharideni ngelineni emhlophe nangewulu ehlaza komkayi, ebubende netlerebede linomfanekiso wamakerubhi.

Iinsika zekoporo

¹⁵ Wakhela icabazi lethempeli iinsika ezimbili. Isika ngayinye sele ihlangene nepundwayo beyimamitha amatjhumi amabili ukuphakama. Ipundu ngayinye beyimamitha amabili nesiquntu.

¹⁶ Wenza iinketani njengombana uDavida ambulelwa, wazirhorheja eempundwini zeensika. Godu wenza amarharinada alikhulu wawakghwayeja eenketanini.

¹⁷ Wajamisa iinsikezo ecabazini lethempeli, enye yaba ngesewula, enye yaba ngetlhagwini. Kwathi engesewula wayithiya bona yiJakini, engetlhagwini wathi yiBhowazi.