2 IINKRONIKE 25 - IsiNdebele 2012 Translation

U-Amatsiya uba yikosi yakwaJuda

¹ U-Amatsiya gade aneminyaka ematjhumi amabili nahlanu lokha naba yikosi. Wabusa eJerusalema iminyaka ematjhumi amabili nethobako. Ibizo lakanina gade kunguJehowadani weJerusalema.

² Wenza okuhle phambi kwakaSomnini, kodwana ingasi ngehliziywakhe yoke.

³ Wathi bona aqinise umbuso ezandleni zakhe, wabhubhisa iinkhulu ezabulala uyise ogade ayikosi.

⁴ Nokho azange abulale amadodanazo, kodwana wenza njengombana kutlolwe emthethweni kaMosi lapha uSomnini ayala khona wathi: “Aboyise bangafeli imilandu yabentwababo, nabentwana bangafeli imilandu yaboyise. Kodwana akube ngiloyo naloyo afele izono zakhe. ”

⁵ U-Amatsiya wabizela abantu bakwaJuda ndawonye wabahlela ukuya ngemindenabo kobana babe ziinduna zekulungwana neenduna zekhulu kilo loke lakwaJuda nakwaBhenjamini. Wabala abaneminyaka yobudala ematjhumi amabili nangaphezulu, wafumana bona bamakhulu aziinkulungwana ezintathu zamadoda aziinhlabani alungele ipi nanekghono lokusebenzisa umkhonto nesihlangu.

⁶ Godu waqatjha nekhulu leenkulungwana zeengorho kwa-Israyeli ngeenkulungwana ezintathu namakhulu amahlanu wamakhilogremu wesiliva.

⁷ Kodwana kweza umuntu kaZimu kuye wathi: “Kosami, amabutho wakwa-Israyeli la angaphumi nawe ukuya epini ngombana uSomnini akakajami ngaku-Israyeli, ngitjho boke bakwa-Efrayimu.

⁸ Wena udlumbana bonyana uzakukghona ukuqalana nepi ngabantwaba, kodwana uZimu uzokurareja phambi kwesitha sakho. Ngiqinisile nguZimu onamandla wokukwenza uphumelele namkha uhluleke.”

⁹ U-Amatsiya wabuza umuntu kaZimu wathi: “Alo, uthi kwenziweni ngeenkulungwana ezintathu namakhulu amahlanu woke wamakhilogremu wesiliva engiwakhuphele amabutho wakwa-Israyeli la na?” Umuntu kaZimu waphendula wathi: “USomnini angakunikela ngaphezu kwalokho.”

¹⁰ Yeke u-Amatsiya watjhaphulula amabutho agade eze kuye abuya kwa-Efrayimu bona aye emakhaya. Amabutho adla uJuda ahlaza, aya emakhaya agcwele ipotjwana.

¹¹ U-Amatsiya wavuselela amandlakhe wakhupha ibutho lakhe wanqomba emrhobeni weTswayi. Lapha afese wabulala khona itjhumi leenkulungwana zamadoda weSeyiri.

¹² Ibutho lakwaJuda labamba elinye itjhumi leenkulungwana zamadoda asaphila lawasa esiqongolweni serharha lafika lawakghurumejela phasi amadlheka sele aziinquqwana.

¹³ Ngesikhatheso amabutho u-Amatsiya awabuyisele emuva nangazange awavumele bonyana abe nesandla epini, avimbezela imizi yakwaJuda ukusuka eSamariya ukuya eBethe-Rhoroni. Abulala abantu abaziinkulungwana ezintathu abe abamuka nentundu yepango.

¹⁴ Lokha u-Amatsiya nabuya ukubhubhisa ama-Edomu, weza nabosingazimu babantu beSeyiri. Wabajamisa bona babe bosingazimu bakhe, wabaguqela bewabenzela nomhlabelo wokutjhiswa.

¹⁵ Itukuthelo kaZimu yaba phezu kwaka-Amatsiya. UZimu wathumela umphorofidi kuye wafika wathi: “Kubayini uyokubuza kibosingazimu babantu ababhalelwe ngitjho nokusindisa abantu babo esandleni sakho?”

¹⁶ Kuthe umphorofidi loyo asakhuluma njalo, ikosi yathi kuye: “Sukapha wena! Njekhona ubekwe ngubani bona ube mluleki wekosi? Uzibizela ukufa wena, ngiyakutjela!” Yeke umphorofidi wayilisa indaba leyo kodwana wathi: “Ngiyazi bonyana uZimu uqunte ukukubulala ngombana wenze lokhu begodu wangalaleli iinluleko zami.”

¹⁷ Ngemva kokobana u-Amatsiya ikosi yakwaJuda athintene nabeluleki bakhe wathumela isitjhijilwesi kuJowatjhi umsa kaJehowarhazi omsa kaJehu ikosi yakwa-Israyeli wathi: “Yewize, sizokuzwana amandla!”

¹⁸ Kodwana uJehowatjhi ikosi yakwa-Israyeli waphendula u-Amatsiya ikosi yakwaJuda wathi: “Umtjhatjhana ogade useLibhanoni wathumela umlayezo emthini womsedari eLibhanoni wathi, ‘Yendisela umntazana wakwakho esokaneni lakwami.’ Nje-ke isibandana sommango eLibhanoni seza safihliza umtjhatjhana lowo ngeenyawo zaso.

¹⁹ Wena uzitjela bonyana uhlule u-Edomu, ngikho nje sewuzikhakhazisa kangaka. Zikhakhazise ekuhluleni kwakho kodwana uhlale kwakho! Uzidoselelani amanzi ngomsele bona uzikhube wena kanye nabantu bakwaJuda?”

²⁰ Kodwana u-Amatsiya azange alalele ngombana uZimu gade sele ahlele bonyana abanikele esandleni sakaJehowatjhi ngebanga lokubuza kwabo kibosingazimu bakwa-Edomu.

²¹ Nje-ke uJehowatjhi ikosi yakwa-Israyeli yasahlela u-Amatsiya ikosi yakwaJuda. Zabambana ngeemfuba zizwana amandla eBhethe-Tjhemetjhi kwaJuda.

²² UJuda wamadlhwa ngu-Israyeli. Enye nenye indoda yabalekela emzinayo.

²³ UJehowatjhi ikosi yakwa-Israyeli wathumba u-Amatsiya ikosi yakwaJuda, umsa kaJowatjhi omsa kaJehowarhazi, eBhethe-Tjhemetjhi. UJehowatjhi wamletha eJerusalema bewagiriza umthangala wakhona ukusukela esangweni i-Efrayimu ukuya esangweni okuthiwa siKghudlhu okuyingcenye engaba mamitha alikhulu namatjhumi abunane ubude.

²⁴ Wathatha loke igolide nesiliva nayo yoke enye ipahla eyatholakala ethempelini lakaZimu ebegade itjhejwe ngu-Obede-Edomu kanye namagugu wesigodlo neembotjhwa, wabuyela eSamariya.

²⁵ U-Amatsiya umsa kaJowatjhi ikosi yakwaJuda waphila iminyaka elitjhumi namihlanu ngemva kokufa kwakaJehowatjhi umsa kaJehowarhazi ikosi yakwa-Israyeli.

²⁶ Ezinye izehlakalo zokubusa kwaka-Amatsiya, ukusuka ekuthomeni bekube sekupheleni, zitlolwe encwadini yamakhosi wakwaJuda newakwa-Israyeli.

²⁷ Kwathi bona u-Amatsiya athome ukuphambuka ekulandeleni uSomnini uZimu, bamakhela ubukhwebetjhana eJerusalema. Wabalekela eLarhitjhi kodwana bathumela abantu eLarhitjhapho bambulalela khona.

²⁸ Wabuyiswa athwelwe ngeenjomani kobana azokubulungwa kiboyisemkhulu edorobheni lakwaJuda.