2 IINKRONIKE 21 - IsiNdebele 2012 Translation

UJehoramu uba yikosi

¹ UJehotjhafathi wahlongakala wabulungwa kiboyisemkhulu eMzini kaDavida. UJehoramu indodanakhe waba yikosi esikhundleni sakhe.

² Abafowabo kaJehoramu, okumadodana kaJehotjhafathi, gade kungu-Azariya, uJerhiyeli, uZakariya, u-Azariyahu, uMikayeli noTjhefathiya. Boke laba gade kumadodana kaJehotjhafathi ikosi yakwa-Israyeli.

³ Uyise gade awanikele izipho ezinengi zesiliva negolide kanye namagugu namadorobho anemithangala kwaJuda. Kodwana umbuso wona wawunikela uJehoramu ngombana gade ayindodana elizibulo.

Izenzo ezimbi zakaJehoramu nemiphumelazo

⁴ Kwathi lokha uJehoramu nazinzinzisa phezu kombuso kayise, wabulala boke abafowabo kanye namanye amakhosana wakwa-Israyeli.

⁵ UJehoramu gade aneminyaka ematjhumi amathathu nambili lokha nathoma ukuba yikosi. Wabusa eJerusalema iminyaka ebunane.

⁶ Wakhamba eendleleni zamakhosi wakwa-Israyeli njengombana kwenza indlu ka-Arhabi ngombana watjhada indodakazi ka-Arhabi. Wenza ubumbi phambi kwakaSomnini.

⁷ Nokho ngebanga lesivumelwano uSomnini asenza noDavida, uSomnini azange athande bonyana abhubhise indlu kaDavida. Wamthembisa bonyana uzamphembela umlilo iinzukulwana ngeenzukulwana isiphelani.

⁸ Ngesikhathi sakaJehoramu, u-Edomu wahlubuka uJuda ngokuzibekela ikosakhe.

⁹ Yeke uJehoramu wanqomba khonapho aphekelelwa ziinkhulu kanye neenkarana zakhe zoke. Ama-Edomu amzombeleza neenduna zeenkarana zakhe, kodwana wavuka ebusuku wahlula ama-Edomu.

¹⁰ U-Edomu soloko ahlubuka uJuda bekube namhlanjesi. Nje-ke noLibhina wahlubuka khona ngesikhatheso. Lokho kwenzeka ngombana uJehoramu wahlubuka uSomnini uZimu waboyise.

¹¹ UJehoramu nguye godu owakhe iindunduma emibundwini yakwaJuda bewabangela bonyana abantu beJerusalema bahlobonge godu wadurhisa noJuda.

Ukuhlunguphazwa nokuhlongakala kwakaJehoramu

¹² UJehoramu wamukela incwadi kumphorofidi u-Eliya ithi: “Nakhu okutjhiwo nguSomnini uZimu kaDavida uyihlomkhulu: Azange ulandele iindlela zakayihlo uJehotjhafathi namkha u-Asa ikosi yakwaJuda,

¹³ kodwana ukhambe eendleleni zamakhosi wakwa-Israyeli begodu ubangele bonyana abantu bakwaJuda nebakwa-Israyeli bahlobonge njengombana kwenza indlu ka-Arhabi. Ubulele nabafowenu, amalunga wendlu kayihlo, amadoda agade angcono kunani.

¹⁴ Ngebangelo uSomnini uzokwehlisela ihlekelele ekulu phezu kwabantu bakho, amadodanakho, abafazi bakho nakikho koke okungekwakho.

¹⁵ Wena uzakugula uphathwe bulwelwe bamathumbu. Ngokukhamba kwesikhathi isifesi sizakubhokela kufikela lapha amathumbakho aphumela khona ngaphandle.”

¹⁶ USomnini wavusa ubutha phakathi kwakaJehoramu namaFilista kanye nama-Arabhu agade ahlala eduze namaKutjhe.

¹⁷ Asahlela iJuda, afahla iinqabo zakhe abe athumba nayo yoke ipahla eyatholakala esigodlweni sekosi kanye namadodanayo nabafazi bayo. Akunandodana atjhiyelwa yona ngaphandle kwakaJehowarhazi ubuphetjhani.

¹⁸ Ngemva kwakho koke lokhu, uSomnini warhadla uJehoramu ngobulwelwe bamathumbu obungalaphekiko.

¹⁹ Ngokukhamba kwesikhathi, ekupheleni komnyaka wesibili, amathumbakhe aphumela ngaphandle ngebanga lobulwelwe. Ngebangelo wabhokelwa ziinhlabi bewahlongakala. Abantu azange bambasele umlilo ukumhlonipha njengombana benza kiboyise.

²⁰ UJehoramu gade aneminyaka ematjhumi amathathu nambili lokha naba yikosi. Wabusa eJerusalema iminyaka ebunane. Ekuhlongakaleni kwakhe azange bekube nomlilelako. Wabulungwa eMzini kaDavida kodwana ingasi emazindleni wamakhosi.