2 IINKRONIKE 18 - IsiNdebele 2012 Translation

UJehotjhafathi uzihlanganisa no-Arhabi ukulwa ipi

¹ UJehotjhafathi bekanomnotho omnengi begodu adumile. Wakha ubuhlobo no-Arhabi ngomtjhado.

² Emva kweminyaka ethize wakhamba wayokuthekela kwa-Arhabi eSamariya. U-Arhabi wahlabisa uJehotjhafathi nabantu akhamba nabo izimvu neenkomo ezinengi bewamtjitjizela bonyana asahlele iRamothi eGiliyadi.

³ U-Arhabi ikosi yakwa-Israyeli wabuza uJehotjhafathi ikosi yakwaJuda wathi: “Uzakuphuma nami siyokusahlela iRamothi eGiliyadi na?” UJehotjhafathi wathi: “Ngithi nginawe! Amajonami ngewakho! Sizakubambisana nawe epini.”

⁴ Kodwana uJehotjhafathi wabuye wathi ekosini yakwa-Israyeli: “Buza kuSomnini mantange.”

⁵ Yeke ikosi yakwa-Israyeli yabizela ndawonye abaphorofidi abamakhulu amane wamadoda. Yababuza yathi: “Singaphuma siyokusahlela iRamothi eGiliyadi namkha ngihlale na?” Baphendula bathi: “Ayisahlele! UZimu uzayinikela esandleni sekosi.”

⁶ Kodwana uJehotjhafathi wabuza wathi: “Akunamphorofidi kaSomnini uZimu eduzapha esingabuza kuye na?”

⁷ Ikosi yakwa-Israyeli yaphendula yathi: “Awa, ukhona yena ongasibuzela kuZimu, into nje mina uyangikghabhudlha ngombana azange akhe aphorofide into ehle ngami, sewuhlala asaphorofida kumbi ngami. Batjho nguMikaya umsa kaYimla.” UJehotjhafathi wathi: “Akusikuhle bonyana ikosi ikhulume njalo.”

⁸ Yeke ikosi yakwa-Israyeli yabiza esinye seenkhulu zayo yathi kiso: “Rhaba, uze noMikaya umsa ka-Yimla loyo!”

⁹ Ikosi yakwa-Israyeli noJehotjhafathi ikosi yakwaJuda bebahlezi eenhlalweni zabo zobukhosi eselelweni, ebungenweni besango leSamariya, bavunule baphelele ngezobukhosi, kuthe swi abaphorofidi phambi kwabo basemmoyeni wokuphorofida.

¹⁰ UTsedekhiya umsa kaKenana gade enze iimpondo zesimbi wathi: “Nakhu okutjhiwo nguSomnini, ‘Ngeempondwezi uzakutlhofoza ama-Aramu abe aphele nya.’ ”

¹¹ Boke abaphorofidi abanye nabo bebafakazela isiphorofidwesi bathi: “Sahlela iRamothi eGiliyadi bewuhlule ngombana uZimu uzayinikela ezandleni zekosi.”

¹² Isithunywa ebesiyokubiza uMikaya sathi kuye: “Qala, abaphorofidaba bakhuluma ngalizwi linye, boke baboniswa okuhle ngekosi. Vumelana nabo nawe ukhulume njengabo.”

¹³ Kodwana uMikaya wathi: “Ngiyaqinisa phambi kwakaSomnini ngithi ngizokukhuluma kwaphela lokho uZimami athi angikutjho.”

¹⁴ Kwathi lokha nafikako ikosi yambuza yathi: “Wena ongangoMikaya, singaphuma siyokusahlela iRamothi eGiliyadi namkha njani?” Waphendula wathi: “Iye, sahlela iRamothi eGiliyadi uyihlule ngombana bazakunikelwa esandleni sakho.”

¹⁵ Ikosi yathi kuye: “Ngikufungise kangaki bonyana ungitjele iqiniso kwaphela ebizweni lakaSomnini uZimu na?”

¹⁶ Yeke uMikaya wathi: “Ngibone woke u-Israyeli ahlakazeka emibundwini njengezimvu ezingenamelusi. UZimu wathi, ‘Abantwaba abanamelusi. Omunye nomunye akaziyele kwakhe ngokuthula.’ ”

¹⁷ Ikosi yakwa-Israyeli yathi kuJehotjhafathi: “Uyabona-ke! Angithi ngikutjelile bonyana abe akunalitho elihle angaliphorofida ngami? Into ayaziko sekungikhuluma kumbi.”

¹⁸ UMikaya waragela phambili wathi: “Yeke lalela okwatjhiwo nguSomnini nangimbona ahlezi esihlalweni sakhe sobukhosi aphahlwe mkhambathi woke wezulwini, ngesigomeni nangesinceleni sakhe

¹⁹ asithi, ‘Ngubani ongayokuyenga u-Arhabi ikosi yakwa-Israyeli bonyana asahlele iRamothi eGiliyadi ukuze aziphekelele yena ekufeni?’ Omunye watjho lokhu nomunye watjho lokhuya.

²⁰ Khonapho kwavela omunye womkhambathi wajama phambi kwakaSomnini wathi, ‘Ngizamyenga.’ USomnini wabuza wathi, ‘Uzamyenga njani?’

²¹ Yena wathi, ‘Ngizakukhamba fese ngibe mumoya wamala emilonyeni yabo boke abaphorofidi bakhe.’ USomnini wathi, ‘Awa, yeke nakunjalo uzakuphumelela ukumyenga. Khamba-ke ufese wenze njalo.’

²² Nje-ke, qala uSomnini ubeke ummoya wamala emilonyeni yabaphorofidi bakhwaba. USomnini ukuhlelele ihlekelele.”

²³ Yeke uTsedekhiya umsa kaKenana wakhuphuka wafese wamukula uMikaya emhlathini wathi: “Kuzenjani bonyana ummoya obuya kuSomnini usuke kimi uzokukhuluma kuwe?”

²⁴ UMikaya wathi: “Uzakwazi mhlana uyokubhaca elawini elisemsamo.”

²⁵ Ikosi yakwa-Israyeli yathi: “Thathani uMikaya lo nimbuyisele ku-Amoni oyinduna yedorobho nakuJowatjhi umntwanekosi;

²⁶ bese nithi, ‘Ikosi ithi: Phoselani umrhali lo ngesikhungweni, nimuphe isikwana nethosana lamanzi ngamalanga kufikela bengibuye ngisaphephile.’ ”

²⁷ UMikaya wathi: “Nange ngambala ungabuya uphephile, uZimu uzabe angakakhulumi ngami.” (Umphorofidi lo ufaniswa nowathi: “Yizwani noke nina bantu!” )

²⁸ Yeke ikosi yakwa-Israyeli noJehotjhafathi ikosi yakwaJuda bakhuphukela eRamothi eGiliyadi.

²⁹ Ikosi yakwa-Israyeli yathi kuJehotjhafathi: “Ngizakungena epini ngokuzitjhatjhanisa, kodwana wena yembatha izambatho zakho zobukhosi.” Yeke ikosi yakwa-Israyeli yazitjhatjhanisa, yangena epini.

³⁰ Ikosi yama-Aramu gade iyale iinduna zayo zeenkarana yathi: “Ningalwi nomunye ngaphandle kwekosi yakwa-Israyeli.”

³¹ Kuthe lokha iinduna zeenkarana nazibona uJehotjhafathi zathi: “Sayibamba inyamazana! Ngiyo ikosi yakwa-Israyeli!” Zajika bonyana zimthelekele. Kodwana uJehotjhafathi warhuwelela, uSomnini wamsiza. UZimu waphambukisa iindunezo bona zisuke kuye.

³² Kwathi bona iinduna zeenkarana zingalemuka bonyana akusiyo ikosi yakwa-Israyeli, zalisa ukumkhweza ummango.

³³ Kodwana khonapho kwase kuba nomunye odumuza umsebakhe angakanqophi muntu, wanemba ikosi yakwa-Israyeli hlangana nomphetho wesiphanga sembaji yepi. Ikosi leyo yathi kumtjhayeli wekarana: “Jikisa ikarana ungikhuphe epinapha, nakhu sele ngikhubele khulu.”

³⁴ Ipi yadlondlobala mhlokho, ikosi yakwa-Israyeli yazisama ekaraneni iqale ngehlangothini lama-Aramu bekwahlwa. Kwathi nakutjhinga ilanga yahlongakala.