2 IINKRONIKE 16 - IsiNdebele 2012 Translation

U-Asa wenza isivumelwano nama-Aramu

¹ Emnyakeni wamatjhumi amathathu nesithandathu wokubusa kwaka-Asa, uBhatjha ikosi yakwa-Israyeli wenyuka wayokulwa noJuda bewakha nomthangala magegana neRama ukuze u-Asa ikosi yakwaJuda akhandeleke ngenarhenakhe.

² Yeke u-Asa wakhupha igolide nesiliva ngendlini yamagugu wethempeli lakaSomnini nesigodlweni sakhe wayithumela kuBhen-Hadadi ikosi yama-Aramu ogade ahlala eDamaseku, wathi:

³ “Akube nesivumelwano phakathi kwami nawe njengombana kwakunjalo phakathi kwakababa nobabakho. Qala, ngikuthumelela isiliva negolide. Nje-ke qeda isivumelwano sakho noBhatjha ikosi yakwa-Israyeli ukuze angigadunge.”

⁴ UBhen-Hadadi wavumelana nekosi u-Asa bewathumela abaphathi bamabuthwakhe kobana asahlele amadorobho wakwa-Israyeli. Wahlula i-Iyoni, iDani, i-Abela-Mayimu nawo woke amadorobhobulungelo wakwaNafitali.

⁵ Kwathi bona uBhatjha ezwe lokho, walisa ukwakha umthangala eRama bewajamisa umsebenzakhe.

⁶ Yeke ikosi u-Asa yaletha woke amadoda wakwaJuda eRama bonyana azokuthatha amatje neengodo ebezisetjenziswa nguBhatjha. Yakha ngazo iGeba neMitsipha.

⁷ Ngesikhatheso uRhanani umboni weza ku-Asa ikosi yakwaJuda wathi kuye: “Ngebanga lokobana uthembele ekosini yama-Aramu kodwana ingasi kuZimu iKosakho, ibutho lekosi ye-Aramu liphunyurhile esandleni sakho.

⁸ Angithi amaKutjhe namaLibhiya gade alibutho elinamandla begodu aneenkarana ezinengi nabakhweli beenjomani abanengi? Kodwana kwathi lokha nawuthembela kuSomnini, wabanikela esandleni sakho.

⁹ Ngombana amehlo kaSomnini athalaza ephasini loke ukuqinisa labo abanhliziyo zabo zinamathele kuye. Wena-ke wenze ubudlhadlha. Nje-ke ukusuka gadesi uzakuphila ngepi.”

¹⁰ U-Asa wathukuthelela umboni ngebanga lamezwi la. Wasilingeka kangangobana wamfaka esikhungweni. Kanti-ke ngesikhatheso, wagandelela nabanye babantu.

Ukugula nokufa kwaka-Asa

¹¹ Izehlakalo zokubusa kwaka-Asa ukusuka ekuthomeni bekube sekupheleni zitlolwe encwadini yamakhosi wakwaJuda newakwa-Israyeli.

¹² Emnyakeni wamatjhumi amathathu nethoba wokubusa kwakhe, wasahlelwa sisifo seenyawo sambhokela khulu. Ekuguleni kwakhe azange abe afune isizo lakaSomnini, kodwana wafuna isizo lamagedla kwaphela.

¹³ Yeke wahlongakala u-Asa. Walala emnyakeni wamatjhumi amane nanye wokubusa kwakhe.

¹⁴ Bambulunga ezindleni azakhela lona eMzini kaDavida. Bamlalisa emsemeni ogade ufafazwe ngeenthako ezilungiswe muvangi weenhlahla. Bamhlonipha ngokubasa ikehla yomlilo.