2 IINKRONIKE 11 - IsiNdebele 2012 Translation

UJuda uzilungiselela ukulwa no-Israyeli

¹ Kwathi uRerhobhowamu nafika eJerusalema, wabutha indlu kaJuda neyakaBhenjamini kwaba libutho leenhlabani ezilikhulu namatjhumi abunane weenkulungwana likhethelwe kobana lilwe no-Israyeli libuyise nombuso kaRerhobhowamu.

² Kodwana kwafika ilizwi lakaSomnini kuTjhemaya umuntu kaZimu lathi:

³ “Yewuthi kuRerhobhowamu umsa kaSolomoni ikosi yakwaJuda nakiwo woke ama-Israyeli akwaJuda nakwaBhenjamini,

⁴ ‘Nakhu okwatjhiwo nguSomnini: Ninganyuki ukuyokulwa nabafowenu. Godukani, omunye nomunye anqombe kwakhe ngombana lokhu kusisenzo sami.’ ” Yeke balalela amezwi kaSomnini babuya ekusahleleni uJerobhowamu.

URerhobhowamu uqinisa amadorobho wakaJuda

⁵ URerhobhowamu wahlala eJerusalema bewakha amadorobho wokuzivikela kwaJuda.

⁶ Wakha iBhethe-Lehema, i-Ethamu, iTekhowa,

⁷ iBhethe-Tsuri, iSoko, i-Adulamu,

⁸ iGathi, iMaretjha, iZifi,

⁹ i-Adorayimu, iLarhitjhi, i-Azekha,

¹⁰ iTsora, i-Ayaloni neRhebroni. Lawo bekumadorobho anemithangala kwaJuda nakwaBhenjamini.

¹¹ Waqinisa ubuvikelo bawo, wabeka iinduna kiwo kanye nebulungelo lokudla, amafutha we-oliva newayini.

¹² Godu wabeka iinhlangu nemikhonto kiwo woke amadorobho, wawenza aqina kwamambala ukuze azigcinele ikwaJuda nekwaBhenjamini.

Abaphristi namaLevi basekela uRerhobhowamu

¹³ Abaphristi namaLevi kizo zoke iimfunda zabo ezikilo loke lakwa-Israyeli bazihlanganisa noRerhobhowamu.

¹⁴ Iye, amaLevi abe asukela imirhula kanye nepahlawo ehlela kwaJuda neJerusalema ngombana uJerobhowamu namadodanakhe bekawaqotjhile ekubeni baphristi bakaSomnini.

¹⁵ Wazikhethela abaphristi kobana basebenze eendundumeni lapha bekukhona iinthombe zeembuzi nezeenkunzana azenzileko.

¹⁶ Khonapho kwavela kenye nenye ikoro yakwa-Israyeli abantu egade iinhliziyo zabo zinamathele kuSomnini uZimu wakwa-Israyeli, balandela amaLevi eJerusalema ukuyokwenza imihlabelo kaSomnini uZimu waboyise.

¹⁷ Baqinisa umbuso wakwaJuda bebasekela uRerhobhowamu umsa kaSolomoni iminyaka emithathu ngombana ngesikhatheso bakhamba ngokulandela iindlela zakaDavida noSolomoni.

Abafazi nabantwana bakaRerhobhowamu

¹⁸ URerhobhowamu watjhada noMarhalathi. UMarhalathi bekayindodakazi kaJerimothi umsa kaDavida. Unina bekungu-Abihayeli indodakazi ka-Eliyabu umsa kaJese.

¹⁹ UMarhalathi wambelethela amadodana: UJewutjhi, uTjhemariya noZahamu.

²⁰ Watjhada godu noMakha indodakazi ka-Absalomu owambelethela u-Abiya, u-Atayi, uZiza noTjhelomithi.

²¹ URerhobhowamu wathanda khulu uMakha indodakazi ka-Absalomu ukudlula abafazi bakhe abanye nemingenakhe. Waba nabafazi abalitjhumi nobunane, imingena ematjhumi asithandathu, amadodana amatjhumi amabili nobunane namadodakazi amatjhumi asithandathu.

²² Wakhetha u-Abiya indodana kaMakha njengekosana yabomnakwabo ngombana gade ahlose ukumbeka abe yikosi.

²³ Gade ahlakaniphile ngombana waphadlhalaja amanye wamadodanakhe eemfundeni zakwaJuda nakwaBhenjamini, wawabeka kiwo woke amadorobho anemithangala. Wawahlinzekela ngokunengi bewawathathela idwendwe labomalukazana.