2 AMAKHOSI 3 - IsiNdebele 2012 Translation

UJoramu ikosi yakwa-Israyeli ulwa noMowabi

¹ UJoramu umsa ka-Arhabi waba yikosi yakwa-Israyeli eSamariya emnyakeni wetjhumi nabunane wokubusa kwakaJehotjhafathi ikosi yakwaJuda. Wabusa iminyaka elitjhumi nambili.

² Wenza ubumbi phambi kwakaSomnini, kodwana ingasi njengombana uyise nonina benza. Wasusa ilitje lakaBhali elisikhumbuzo elalijanyiswe nguyise.

³ Nokho wanamathela ezonweni zakaJerobhowamu umsa kaNebathi, abangela ngazo bonyana u-Israyeli one; akhange aphambuke kizo.

⁴ Nje-ke uMetjha ikosi yakwaMowabi gade afuye izimvu begodu bekufuze anande anikela ikosi yakwa-Israyeli ikhulu leenkulungwana leemvana nekhulu leenkulungwana lamaqama angakarhunwa.

⁵ Kodwana emva kokuhlongakala kwaka-Arhabi, ikosi yakwaMowabi yahlubuka ikosi yakwa-Israyeli.

⁶ Yeke ngesikhatheso ikosi uJoramu yaphuma eSamariya yahlomisa woke u-Israyeli.

⁷ Yathumela umlayezo lo nakuJehotjhafathi ikosi yakwaJuda yathi: “Ikosi yakwaMowabi ingihlubukile. Uzokukhamba nami siyosahlela uMowabi na?” Waphendula wathi: “Ngizakukhamba nawe. Ngimunye nawe, abantu bami banjengabakho neenjomani zami zinjengezakho.”

⁸ UJoramu wabuza wathi: “Sizokusahlela ngayiphi indlela?” UJehotjhafathi wathi: “Ngendlela yerhalawumba le-Edomu.”

⁹ Nje-ke ikosi yakwa-Israyeli yaphuma nekosi yakwaJuda kanye neyakwa-Edomu. Emva kokobana sele bagege amalanga alikhomba, gade kungasenamanzi webutho neweembandana ezikanye nalo.

¹⁰ Ikosi yakwa-Israyeli yathi: “Madekhethu! UZimu usibize sobathathu bonyana asinikele esandleni samaMowabi!”

¹¹ UJehotjhafathi wabuza wathi: “Akunamphorofidi kaSomnini, esingabuza uSomnini ngaye lapha na?” Esinye seenkhulu zekosi yakwa-Israyeli saphendula sathi: “Iye, kuno-Elitjha umsa kaTjhafathi, ogade anande aqongela u-Eliya.”

¹² UJehotjhafathi wathi: “Loyo-ke ilizwi lakaSomnini likuye.” Nje-ke ikosi yakwa-Israyeli, uJehotjhafathi nekosi yakwa-Edomu behlela kuye.

¹³ U-Elitjha wathi ekosini yakwa-Israyeli: “Alo, wena-ke ngihlangene ngani nawe? Iya emphorofidini kayihlo nanyana wakanyoko.” Ikosi yakwa-Israyeli yaphendula yathi: “Awa, qala nguZimu osihlanganise sobathathu bonyana asinikele esandleni samaMowabi!”

¹⁴ U-Elitjha wathi: “NgoZimu uMninimandlawoke engimlotjhako ngiqinisile ngithi, ukube thana uJehotjhafathi ikosi yakwaJuda, engimhloniphako gade angekho la, bengingeze ngakuqala namkha ngikuyelele.”

¹⁵ Waragela phambili wathi: “Yewungilethele usonodo.” Kwathi lokha usonodo ancinza iharibha, isandla sakaSomnini saba phezu kwaka-Elitjha

¹⁶ wabe wathi: “Nakhu okutjhiwo nguSomnini, ‘Yembani iinkghidlhi emilanjeni eyomileko le.’

¹⁷ Ngombana nakhu okutjhiwo nguSomnini, ‘Anizukubona ummoya namkha izulu, nokho umlambo owomileko lo uzakugcwala amanzi bese nina, nefuywenu ebotjhelwako nethwalako niyasela.’

¹⁸ Zincani lezi emehlweni kaSomnini, uzokunikela noMowabi esandleni senu.

¹⁹ Nizokuhlula elinye nelinye idorobho elinomthangala nayo yoke imizi ekhethekileko. Nizokugawula yoke imithi emihle, nidibizese yoke imithombo benibhubhise woke amasimu avundileko ngamatje.”

²⁰ Ngakusasa ekuseni, pheze ngesikhathi sokuletha umnikelo, baba-ke, naka amanzi ehla ncaya nge-Edomu! Inarha beyigcwele amanzi!

²¹ Nje-ke boke bakwaMowabi gade bezwile bona amakhosi eze ukuzokulwa nabo; woke umuntu ogade angakghona ukuthwala iinhlabano ngitjho nolupheleko wabizwa wajanyiswa ngemkhawulweni.

²² Kwathi lokha nabavukako ekuseni ngakusasa, ilanga beliphazima phezu kwamanzi. EmaMowabini agade angaphetjheya kwamanzi, amanzi abonakala abomvu inga ziingazi.

²³ AmaMowabi athi: “Ziingazi leziya! Kutjho bona amakhosi lawa alwile, abulalana wodwa. MaMowabi, asiyozikholisa ngepahlabo!”

²⁴ Kodwana lokha amaMowabi afika ekampeni yama-Israyeli, ama-Israyeli arubhuluka alwa nawo abe awagijimisa. Ama-Israyeli ayisahlela inarha leyo abulala amaMowabi.

²⁵ Agiriza amadorobho anomthangala. Athatha amatje awaphosa kiwo woke amasimu avundileko abe awavala. Adibizesa yoke imithombo abe agawula yoke imithi emihle. YiKiri-Rhareseti yodwa eyasala nomthangalayo, kodwana abantu ebegade bahlome ngeensarayi bayizombeleza nayo bayisahlela.

²⁶ Kuthe lokha ikosi yakwaMowabi nayibonako bonyana iyahlulwa epini, yathatha amadoda amakhulu alikhomba akwazi ukulwa ngesabula ukuze iphundlukele ekosini yakwa-Edomu kodwana yabhalelwa.

²⁷ Yeke yathatha indodanayo elizibulo ebe kuzokuba ngiyo ethatha ubukhosi bayo, yanikela ngayo phezu komthangala wedorobho njengomhlabelo. Ama-Israyeli akghabhudlheka khulu abe ajika abuyela enarhenekhabo.