1 UTHIMOTHI 6 - IsiNdebele 2012 Translation

¹ Akuthi boke abangaphasi kwejogi lobukhoboka, bahloniphe abanikazi babo kikho koke ukuze kungahlanjalazwa ibizo lakaZimu nefundiso.

² Amakhoboka asebenzela abanikazi abakholwako kufanele angabanyazi ngombana babazalwana. Kunalokho akabasebenzele khulu ngombana labo abazuzako ngemisebenzawo makholwa kanye nabathandekako. Kufanele bona ufundise bewukhuthaze ngezintwezi.

Ifundiso yamala nobunjinga bamambala

³ Umuntu onefundiso ehlukileko nengakhambisani namezwi aphilileko weKosethu uJesu Krestu kanye nefundiso ekhambisana nokwesaba uZimu,

⁴ ukhukhumele onjalo begodu akazi ilitho. Unekanuko embi yokuphikisana, godu unombango wamezwi abanga ukufelana umona, umbango, ukuhlambalaza nokuzindlekelelana ngokumbi;

⁵ iye, ubanga ukulwa phakathi kwalabo abanemikhumbulo eyonakeleko nabalahlekelwe liqiniso, abadlumbana bona ukulotjha uZimu kuyindlela yokuzuza umnotho.

⁶ Ije vele, ukumesaba uZimu nokwaneliswa kuyinzuzo ekulu

⁷ ngombana seza ephasinapha singanalitho, kusebaleni bona sizakugoduka singanalitho godu.

⁸ Kodwana nasinokudla nezambatho, asaneliswe ngilokho.

⁹ Abathanda ukunjinga bawela ekulingweni begodu balutheka ngeenkanuko ezinobudlhadlha nezilimazako, ezidosela abantu ekonakalisweni nekubhujisweni.

¹⁰ Ngombana ukuthanda imali kumrabhu wakho koke okumbi. Abanye ngokulangazela ukunjinga bahlubuke ekukholweni bebazihlaba ngeenhlungu ezinengi.

Ukulwa okuhle kokukholwa

¹¹ Kodwana wena-ke muntu kaZimu, kubalekele koke lokho uphikelele ukulunga, ukumesaba uZimu, ukukholwa, ithando, ukunyamezela nobumnene.

¹² Yilwa ukulwa okuhle kokukholwa, ubambelele ekuphileni okungapheliko owabizelwa kikho nowenza ngakho isivumo esihle phambi kwabofakazi abanengi.

¹³ Ngiyakuyala phambi kwakaZimu ophilisa koke naphambi kwakaKrestu Jesu owafakaza phambi kwakaPontiyasi Pilatu, wavuma isivumo esihle

¹⁴ kobana ulonde umyalo ngaphandle komphambo namkha ukusoleka bekube sekubonakaleni kweKosethu uJesu Krestu,

¹⁵ uZimu azakubonakalisa ngesikhathi esifaneleko, yena ongothokozwako nokunguye yedwa uMninimandla, iKosi yamakhosi noMbusi wababusi.

¹⁶ Nguye yedwa ophila isiphelani nohlala ekukhanyeni okungekhe kwatjhidelwa kikho, ongazange abonwe mumuntu nongabonwako, alibe kuye idumo namandla ngokungapheliko. Amen.

¹⁷ Bayale abanothileko esikhathini sanamhlanje bonyana bangazikhukhumezi namkha bathembele emnothweni ophelako, kodwana kuZimu osinjingisa ngakho koke bona sithokoze ngakho.

¹⁸ Bayale benze okuhle, banothe ngemisebenzi emihle; baphane babele abanye.

¹⁹ Ngalokho bazabe bazibulungela umnotho osisekelo sangomuso ukuze babambelele ekuphileni ekungikho.

²⁰ Thimothi, londa kuhle ophathiswe khona. Bethela mthalazeni ukukhuluma okulilize nokuphikisana okuthiwa kulilwazi kungasilo,

²¹ okuthe abanye balivuma balahlekelwa mnqopho wokukholwa. Umusa weKosi awube nani noke!