1 UTHIMOTHI 5 - IsiNdebele 2012 Translation

Iseluleko mayelana nabahlolokazi, abaphathi namakhoboka

¹ Ungamkhahlamezi umuntu omdala, kodwana khuluma naye njengoyihlo, nabaduna abatjha njengabafowenu,

² abadala abasikazi ubaphathe njengabonyoko kuthi abasesebatjha ubaphathe njengabodadwenu ngobumsulwa obupheleleko.

³ Hlonipha abahlolokazi abanganabani.

⁴ Nangabe umhlolokazi unabantwana namkha abazukulu, kufanele bafunde maqangi ukubonakalisa izenzo zokukholwa kwabo emndeninabo bese baba nembuyiselo kubabelethi babo ngombana lokho kuyathokozeka kuZimu.

⁵ Umhlolokazi onganabani, osele asele yedwa, ubeke ithemba lakhe kuZimu, uhlala ekuncengeni nekuthandazeni ubusuku nemini.

⁶ Kodwana umhlolokazi ozinikelele ebumnandini, ufe asaphila.

⁷ Yewuyale ngezintwezi ukuze bangasoleki.

⁸ Kodwana nangabe umuntu akabatjheji bekhabo, khulukhulu bomndenakhe, ulahle ukukholwa begodu mumbi kunongakholwako.

⁹ Umhlolokazi ongaphasi kweminyaka ematjhumi asithandathu nogade ende endodeni yinye, akangafakwa erhelweni,

¹⁰ nakube akanayo imisebenzi emihle njengokukhulisa kuhle abantwana, ukuphatha kuhle abayeni, ukuqopha iinyawo zabacwengileko, ukusiza abahlunguphaziweko nokuzinikela ekwenzeni okuhle nanyana ngayiphi indlela.

¹¹ Kodwana abahlolokazi abasesebatjha ungabatlolisi erhelweni ngombana nasele iinkanuko zemizimba yabo ziba ngaphezu kokuzinikela kwabo kuKrestu, bazokufuna ukwenda.

¹² Ngokwenza njalo bazibangela ukulahlwa ngombana basephulile isithembiso sabo sokuthoma.

¹³ Ngaphezu kwalokho bafunda ukuvilapha nokutjharhathela emizini. Abavilaphi nje kwaphela kodwana bayahleba, bathanda iindaba zabanye, bakhulume nalokho okungakafaneli bona bakutjho.

¹⁴ Nje-ke bengingathanda bona abahlolokazi abasesebatjha babuye bende babelethe, baphathe kuhle imizabo, khona inaba lethu lingazukufumana ithuba lokukhuluma kumbi ngathi.

¹⁵ Ngikhuluma nje abanye sebagwilikile balandela uSathana.

¹⁶ Nangabe umfazi okholwako unabahlolokazi emndenini, akabasize; umthwalo ungabi semahlombe webandla, khona lizakwazi ukusiza abahlolokazi abanganabani.

¹⁷ Abaphathi abaphethe kuhle kufanele bahlonitjhwe ngokubuyelelweko, khulukhulu labo abakhuthalele ukutjhumayela nokufundisa

¹⁸ ngombana umtlolo uthi: “Ungafaki ikomo isifonyo lokha nayibhula ibhali nekoroyi.” Begodu uthi: “Isisebenzi sifanelwa mrholo waso.”

¹⁹ Umlandu othweswe umphathi ungawamukeli ngaphandle kwabofakazi ababili nanyana abathathu.

²⁰ Abonako ubakhalimele phambi kwabo boke, khona nabanye bazakusaba.

²¹ Ngikuyala phambi kwakaZimu noKrestu Jesu kanye neengilozi ezikhethiweko kobana ulonde imiyalo le ngokungathandi ukubukwa, begodu ungenzi ilitho ngokukhetha.

²² Ungarhabi ubeke izandla phezu kwananyana ngubani, begodu ungahlanganyeli ezonweni zabanye; hlala umsulwa.

²³ Ungabe usasela amanzi wodwa, kodwana thatha newayini kancancani ngebanga lesisu sakho nokubogaboga kwakho okuvamileko.

²⁴ Izono zabanye zisebaleni begodu zibandulela ekugwetjweni, kanti-ke zabanye ziyabalandela.

²⁵ Godu ngokunjalo nemisebenzi elungileko isebaleni, sengitjho naleyo engabonakali kuhle ayisitheki.