1 UTHIMOTHI 4 - IsiNdebele 2012 Translation

Ukuyalwa kwakaThimothi

¹ UMoya oCwengileko ukutjho ngokukhanyako bona ngamalanga wokuphela abanye bayokuhlubuka ekukholweni banake imimoya ekhohlisako neemfundiso zamadimoni.

² Iimfundiso ezinjalo zifafazwa bazenzisi bamala abanesazelo esomeleliswe ngesimbi etjhisako.

³ Bakhandela ukuthathana begodu bathi akuzilwe ukudla okwadalwa nguZimu bona kwamukelwe ngokuthokoza ngilabo abakholwako nabalaziko iqiniso.

⁴ Koke okudalwe nguZimu kulungile, akukho okufanele bona kulahlwe nangabe kwamukelwa ngokuthokoza

⁵ ngombana vane sekucwengiswe ngelizwi lakaZimu nangomthandazo.

Inceku elungileko yakaKrestu Jesu

⁶ Nangabe ubeka izintwezi phambi kwabazalwana, uyokuba sisebenzi esihle sakaKrestu Jesu, esizondla ngelizwi lokukholwa nefundiso elungileko osele ukakarele kiyo.

⁷ Wale iinolwani ezisilapheleko zeenlukazi, kunalokho zijayeze ipilo yokwesaba uZimu

⁸ ngombana ukujayeza ukuthabulula umzimba kusiza kancani, kodwana ukwesaba uZimu kusiza kikho koke ngombana kunesithembiso sokuphila lokhu nalokho okuzako.

⁹ Ilizweli liqinisile begodu kufanele lamukelwe ngokupheleleko.

¹⁰ Nje-ke ngalokho sisebenza kabudisi begodu siyatjhikatjhika ngombana sibeke ithemba lethu kuZimu ophilako oMsindisi wabo boke abantu, khulukhulu labo abakholwako.

¹¹ Yewuyale ngezintwezo uphele ufundise ngazo.

¹² Akungabikhona umuntu onyaza ubutjha bakho, kodwana yiba sibonelo kabakholwako ngokukhuluma nangokuziphatha, ngethando, ngokukholwa nangepilo emsulwa.

¹³ Khuthalela ukufunda imitlolo, ukukhuthaza nokufundisa bengifike.

¹⁴ Ungasiliseleli isiphiwo esikuwe owasamukeliswa ngesiphorofido nangokubekwa izandla baphathi bebandla.

¹⁵ Khuthalela ukwenza zoke izintwezo, uzinikele kizo ukuze ukuthuthuka kwakho kubonakale kibo boke.

¹⁶ Uzeluse wena kanye nefundiso yakho, uphikelele ezintwenezo ngombana ngokwenza lokho uzazisindisa wena nabakuzwako.