1 UTHIMOTHI 3 - IsiNdebele 2012 Translation

Okufunekako ebaphathini bebandla

¹ Liqinisile ilizwi elithi: Nangabe umuntu ulangazelela ukuba mbonisi, usuke athanda umsebenzi omuhle.

² Nje-ke umbonisi akabe ngongasolekiko, onomfazi munye, onommoya ophasi, ovuthiweko, ohloniphekako, ophatha kuhle iinkhambi nonekghono lokufundisa.

³ Angabi sidakwa nesilwi, kodwana abe ngozothileko nongananturhu, angabi ngothanda imali.

⁴ Abe ngowazi ukuphatha umzakhe kuhle nabantwana bakhe balawuleke babe nehlonipho.

⁵ Nangabe umuntu akakwazi ukuphatha umzakhe kuhle, alo, angaliphatha njani ibandla lakaZimu na?

⁶ Akungabi mumuntu osanda ukuphenduka, nakanjalo angahle azikhukhumeze bese uwela esigwebeni sinye noSathana.

⁷ Kufanele abe mumuntu onebizo elihle kabangaphandle, khona angazukuhlazeka abanjwe sisifu sakaSathana.

Ukuziphatha kwamadikoni

⁸ Ngokunjalo namadikoni. Nawo kufanele ahlonipheke, angabi mamenemene, azinikelele ewayinini elinengi namkha abe marhamaru ngemalini;

⁹ kufuze akakarele efihlakalweni yokukholwa ngesazelo esimsulwa.

¹⁰ Akahlolisiswe ntangi, kuthi nangasolekiko avunyelwe ukuba magosa.

¹¹ Ngokunjalo-ke nabafazi kufanele bahlonipheke, bangabi ngabahlebako kodwana babe nommoya ophasi, bathembeke kikho koke.

¹² Amadikoni akabe nomfazi oyedwa, akwazi ukuphatha kuhle abantwana nemizi yawo.

¹³ Labo abasebenze kuhle njengamadikoni, bazizuzela ubujamo obuhle nesibindi esikhulu ekukholweni kuKrestu Jesu.

Ifihlo yokukholwa kwethu

¹⁴ Ngethemba ukuza kuwe msinyana kodwana ngikutlolela imiyalo le ukuze kuthi

¹⁵ nakungenzeka ngiriyade, wazi bona umuntu kufuze aziphathe njani endlini kaZimu, okulibandla lakaZimu ophilako noyisika nesisekelo seqiniso.

¹⁶ Ngaphandle kokuzaza, yikulu ifihlo yokukholwa kwethu ethi: Owazibonakalisa enyameni, walungisiswa ngoMoya, wabonwa ziingilozi, wamenyezelwa hlangana nabatjhili, ephasini abantu bakholwa kuye, wenyuselwa ephazimulweni.