1 UTHIMOTHI 2 - IsiNdebele 2012 Translation

Ukulotjha uZimu ebandleni

¹ Kokuthoma ngiyabawa bona ukuncenga, ukuthandaza, ukubawela abanye nokuthokoza kwenzelwe abantu boke,

² amakhosi nazo zoke iimphathimandla ukuze siphile kuhle nangokuthula, sikhambe ngakho koke ukwesaba uZimu nangokuhlonipheka.

³ Lokhu kuhle begodu kuyathandeka phambi kwakaZimu uMsindisi wethu,

⁴ othanda bona boke abantu basindiswe bebafikelele elwazini leqiniso

⁵ ngombana munye uZimu begodu munye umlamuli hlangana noZimu nabantu, mumuntu uKrestu Jesu;

⁶ owazinikela ukuze abe sihlengo sabo boke. Lokhu kwaba bufakazi esikhathini esifaneleko.

⁷ Ngebanga lalokho ngakhethwa bona ngibe mtjhumayeli nompostoli. Ngikhuluma iqiniso, angileyi amala, iye, ngibe mfundisi wabatjhili ngokukholwa nangeqiniso.

⁸ Nje-ke ngithanda bona eendaweni zoke amadoda athandaze aphakamise izandla ezicwengileko, anganalo ilaka nokuphikisana.

⁹ Godu ngithanda bona nabafazi bembathe kuhle nangokuhloniphekileko, kube zizambatho ezifaneleko, bazikghabise ngendlela ehloniphekako, kungabi ngeenhluthu zabo ezilukiweko namkha ngegolide namkha ngamatje aligugu nanyana ngezambatho ezibizako;

¹⁰ kodwana akube ngemisebenzi emihle, njengombana kufanele abafazi abathi besaba uZimu.

¹¹ Umfazi akafunde ngokuthula ngakho koke ukuzithoba.

¹² Angivumeli umfazi afundise namkha abe negunya phezu kwendoda kodwana akathule

¹³ ngombana u-Adamu wabunjwa qangi, kwalandela u-Efa;

¹⁴ kanti-ke godu akusuye u-Adamu owakhohliswako kodwana mfazi, waba sisephulamthetho.

¹⁵ Kodwana uzakusindiswa ngokubeletha, kwaphela nakube abantwanabo bahlala ekukholweni, ethandweni, ekucwengeni nangokuziphatha kuhle.