1 USAMYELA 9 - IsiNdebele 2012 Translation

USamyela uzesa uSawula

¹ Kwakukhona indoda kwaBhenjamini, ibizo layo kunguKhitjhi; injingile. Uyise u-Abiyeli naboyisemkhulu aboTserori, uBhekhorathi, no-Afiyarhi bebamaBhenjamini.

² Gade anendodana okuthiwa nguSawula, isokana ebelihlamazana kunawo woke kwa-Israyeli begodu lidephile kunamanye.

³ Nje-ke abodumbana bakaKhitjhi uyise kaSawula balahleka. UKhitjhi wathi kuSawula indodanakhe: “Thatha inceku eyodwa ukhambe nayo uyokuqala abodumbanabo.”

⁴ Badundubala njalo badlula iintatjana zenarha yakwa-Efrayimu baqamula nemimango yeTjhalitjha, kodwana akhange babafunyane. Baqamula nemimango yeTjhalima, nalapho do. Baqamula nemimango yeJemina, nalapho godu akhange babafunyane.

⁵ Kuthe lokha nabafika emmangweni weTsufi, uSawula wathi encekwinakhe agade akhamba nayo: “Namba sibuyele emuva, ubaba angahle alise ukucabanga ngabodumbana bese athome ukutshwenyeka ngathi.”

⁶ Inceku yaphendula yathi kuye: “Qala, ngemzinapha kunomuntu kaZimu ohloniphekileko; nanyana yini ayitjhoko iyenzeka. Namba siye khona gadesi. Mhlambe angasitjela bona sifunele ngakuphi.”

⁷ USawula wathi encekwinakhe: “Iye, singakhamba, kodwana sizomphani umuntu loyo? Ukudla ngemigodlaneni yethu kuyile. Asinanto esingayiphathela umuntu kaZimu. Kghani sinani?”

⁸ Inceku yamphendula godu yathi: “Qala, ngiphethe isipaparwana sesiliva. Ngizasinikela umuntu kaZimu ukuze asitjele bona sifunele ngakuphi.”

⁹ (Ekadeni kwa-Israyeli lokha umuntu nayokubuza kuZimu gade asithi: “Namba siye kumboni.” Ngombana lo okuthiwa mphorofidi namhlanje, endulo gade abizwa bona mboni.)

¹⁰ USawula wathi encekwinakhe: “Kulungile, namba sikhambe.” Bakhamba-ke baya edorobheni lapha gade kunomuntu kaZimu khona.

¹¹ Basakhuphuka intatjana leyo banqombe edorobheni, bahlangana nabantazana bayokukha amanzi, bababuza bathi: “Umboni ukhona na?”

¹² Bona babaphendula bathi: “Iye, ukhona. Niseenthendeni zakhe. Nange ningarhaba khona nje ningamfunyana, ususandukufika khona namhlanjesi ekhethwapha ngombana abantu banomhlatjelo esidulini.

¹³ Nisangena nje edorobheni nizamfunyana angakenyukeli esidulini ukuyogoma. Abantu abazukuthoma ukugoma angakafiki ngombana ufanele abusise umhlabelo bese ngemva kwalokho abamenyiweko bagome-ke. Yenyukani khona nje ngombana nizamfunyana.”

¹⁴ Benyukela edorobheni, bathi basangena nje, nango uSamyela anqombe ngakibo eza ngendlela elunge esidulini.

¹⁵ Ufika nje uSawula uSomnini besele akwambule ngayizolo kwakhona kuSamyela ukuza kwakhe wathi:

¹⁶ “Ngeenkhathezi kusasa ngizokuthumela umuntu obuya enarheni yakwaBhenjamini kuwapha. Umzese abe mbusi wabantu bami u-Israyeli ukuze abasindise esandleni samaFilista ngombana isililo sabo sifikile kimi, bona ngibatjheje.”

¹⁷ Kuthe lokha uSamyela nabona uSawula, uSomnini wathi kuye: “Nangu-ke umuntu ebengikutjela ngaye, nguye ozakubusa abantu bami.”

¹⁸ USawula wanqomba kuSamyela esangweni wabuza wathi: “Ngiyakubawa, angeze wangitjela bona indlu yomboni ikuphi na?”

¹⁹ USamyela waphendula wathi: “Umboni ngimi. Yewenyuke phambi kwami uye esidulini ngombana namhlanjesi nizokugoma nami bese kuthi kusasa ekuseni nginiphekelele sele ngikutjele koke okusehliziywenakho.

²⁰ Nakubodumbana okusele kumalanga amathathu balahlekile, ungasatshwenyeka ngabo sebafunyenwe. Kanti umuntu ofunwa khulu kwa-Israyeli akusinguwe nendlu kayihlo na?”

²¹ USawula waphendula wathi: “Angisuye umBhenjamini ophuma ekorweni encancani kwa-Israyeli na? Nomndeni wakwethu akusingomncancani kiyo yoke ikoro yakwaBhenjamini? Alo-ke, kubayini ukhulume nami njalo?”

²² USamyela wangenisa uSawula nencekwakhe ngekumbeni wafese wabahlalisa ngaphambi kwabamenyiweko ebebangaba matjhumi amathathu.

²³ USamyela wathi kumpheki: “Letha isabelo senyama engikunikele sonesiya, ngitjho lesiya engithe usibekele eqadi.”

²⁴ Umpheki waguga isabelo somlenze esikhethekileko wasibeka phambi kwakaSawula. USamyela wathi: “Nakhu ebegade ubekelwe khona. Yewugome-ke ngombana gade kuvele kubekelwe wena, emnyanyeni lo kusukela ekuthomeni.” Mhlokho uSawula wagoma noSamyela.

²⁵ Emva kobana sebehlile esidulini bangena emzini, uSamyela wakhuluma noSawula angaphezulu kwephahla.

²⁶ Bavuka ngamasa, uSamyela wabiza uSawula angaphezulu kwephahla, wathi: “Vuka ngikuphekelele ukhambe.” Wavuka-ke uSawula baphuma bobabili noSamyela.

²⁷ Basakhamba behlela emaphelelweni wedorobho, uSamyela wathi kuSawula: “Tjela incekwakho bonyana ikhe isigadunge kancazana, kodwana wena jama kancani ngikutjele umlayezo ovela kuZimu.” Inceku yenza njalo.