1 USAMYELA 8 - IsiNdebele 2012 Translation

Ama-Israyeli abawa ikosi

¹ Lokha uSamyela naluphalako, wajamisa amadodanakhe bona abe bagwebi kwa-Israyeli.

² Ibizo lezibulo lakhe bekunguJuweli, lowesibili kungu-Abiya; womabili bekabagwebi beBheritjheba.

³ Kodwana amadodanakhe la, akhange akhambe emtlhalenakhe. Aphendukela enzuzweni yobukhohlakali, arhuluphela ukufunjathiswa abe ahlanakela neengwebo.

⁴ Abaphathi bakwa-Israyeli babuthana boke beza kuSamyela eRama.

⁵ Bathi kuye: “Qala, ubaba selaluphele; nabesabakhe napa nabo abakhambi emtlhalenakhe. Nje-ke besithi ubaba akasibekele ikosi isiphathe njengombana kunjalo nakezinye izizwe.”

⁶ Nokho kwaba kumbi kuSamyela lokha nabathi: “Sipha ikosi bona isiphathe.” Yeke wabuza uSomnini.

⁷ USomnini wathi kuye: “Lalela koke abantu abakutjhoko kuwe. Abakalahli wena, kodwana balahle mina ekubeni yikosabo.

⁸ Solo kwamhlana ngibakhupha eGibhide bekube gadesi sebenza zonezi, bayangitlhanamela balotjhe abosingazimu abatjhili; nawe-ke bakwenza zonezo.

⁹ Yeke, balalele; kodwana qinisa ubayalisise bewubahlathululele amalungelo wekosi ezokubusa phezu kwabo.”

¹⁰ USamyela wakhuluma woke amezwi kaSomnini ebantwini abathe kuye bafuna ikosi.

¹¹ Wathi: “Nanti ilungelo lekosi ezokubusa ngalo phezu kwenu. Amadodanenu izowathatha izibekele wona ekaranenayo neenjomaneni zayo, iwenze amavulandlela phambi kwekaranayo.

¹² Izowakatelela bona abe ziinduna zamabuthwayo, amanye azakulima amasimayo kanti amanye azakuvuna isivuno sayo, amanye azokwenza iinhlabano zepi bese amanye enze iimpahla zekaranayo.

¹³ Izazithathela amadodakazenu iwenze abenzi bamakha, abapheki nababhagi.

¹⁴ Izithathele okukhethekileko kwamasimenu, iindiribe zenu nemithenu yamafutha we-oliva, inikele iimphathiswa zayo.

¹⁵ Izithathele kwetjhumi kwembewu yenu nokwesivuno sesidiribe senu ikunikele iinkhulu neemphathiswa zayo.

¹⁶ Iinceku neencekukazi zenu kanye namagade weenkomo zenu nabodumbana benu, izithathele khona; kusebenzele yona.

¹⁷ Izazithathela kwetjhumi komhlambenu. Nina nibe makhobokayo.

¹⁸ Ngesikhatheso nizakulilela uSomnini ngebanga lekosi enazikhethela yona, nokho uSomnini akazuniphendula mhlokho.”

¹⁹ Kodwana abantu bala ukulalela uSamyela bathi: “Awa, kufanele kube nekosi esibusako,

²⁰ ukuze nathi sifane nezinye izizwe sibe nekosi esiphetheko nezokhamba phambi kwethu nasiya epini.”

²¹ Kwathi bona uSamyela ezwe koke abantu abakutjhoko, wakufikisa lokho eendlebeni zakaSomnini.

²² USomnini wathi kuSamyela: “Lalela ilizwi labo ubanikele ikosi.” USamyela wathi ebaphathini bakwa-Israyeli: “Omunye nomunye akaye emzinekhabo.”