1 USAMYELA 4 - IsiNdebele 2012 Translation

¹ Ilizwi lakaSamyela lanqopha ku-Israyeli woke. Nje-ke u-Israyeli gade aphumile bona alwe namaFilista. Ama-Israyeli ahloma amatendawo e-Ebheni-Ezeri, amaFilista wona ahloma e-Afeki.

Ukufa kwakaHofni noFiniyasi

² AmaFilista akhupha ipi bona isahlelane neyama-Israyeli. Kwathi ipi isabambene kulwiwa, ama-Israyeli ahlulwa. Kwabulawa etatawini lokulwa ama-Israyeli alinganiselwa eenkulungwaneni ezine.

³ Abantu babuyela ekampeni, abaphathi bakwa-Israyeli babuza bathi: “Kubayini uSomnini asiliselele bona sihlulwe maFilista namhlanje na? Nambani siyokuthatha umfaji wesivumelwano sakaSomnini eTjhilo bona ube nathi bewusisindise esandleni sezitha zethu.”

⁴ Abantu bathumela amadoda eTjhilo. Eza nomfaji kaSomnini uMninimandlawoke ohlala phezu kwamakerubhi. Namadodana amabili ka-Eli, uHofni noFiniyasi, gade alapho hlanu komfaji wesivumelwano sakaZimu.

⁵ Lokha umfaji wesivumelwano sakaSomnini nawufika ekampeni, woke u-Israyeli warhuwelela khulu bekwadengezela iphasi.

⁶ AmaFilista ezwa itjhada lomdumo wokurhuwelela abuza athi: “Litjhada lani leli elisekampeni yamaHebheru na?” AmaFilista alemuka bona umfaji kaSomnini ufikile ekampeni yama-Israyeli.

⁷ AmaFilista esaba, athi: “UZimu ufikile ekampeni! Maye thina bo! Intwenje azange kheyenzeke ngaphambilini.

⁸ Maye babo! Sizokusindiswa ngubani kuZimu onamandla kangaka na? Nguye uZimu lo owarhadla amaGibhide erhalawumbeni ngamatshwenyeko woke.

⁹ Qinani! Yibani madoda maFilista! Ngaphandle kwalokho nizakuba makhoboka wamaHebheru njengombana nawo gade amakhoboka wenu. Khombisani ubudoda benu! Yilwani!”

¹⁰ Alwa-ke amaFilista, ama-Israyeli ahlulwa. Kwaba ngileyo naleyondoda yabalekela etendeni layo. Ukurhadlwa phasi kwama-Israyeli kwaba kukhulu khulu. Aloba amabutho aziinkulungwana ezimatjhumi amathathu.

¹¹ Umfaji kaZimu wathunjwa, namadodana amabili ka-Eli, uHofni noFiniyasi, afa.

Ukufa kwaka-Eli

¹² Kwaphuma umuntu wakwaBhenjamini etatawini lokulwa wagijima wafika khona mhlokho eTjhilo, izambatho zakhe zitlebhukile, anehlabathi ehloko.

¹³ U-Eli gade ahlezi esitulweni hlanu kwendlela alindile ngombana ihliziywakhe beyitshwenyekile ngomfaji kaZimu. Kuthe lokha umuntu loyo nangena emzini wabika okwenzekileko. Umuzi woke warhahlawula isililo.

¹⁴ U-Eli wezwa itjhada lesililo wabuza wathi: “Sitjho ukuthini isililokazesi na?” Umuntu loyo warhaba waya ku-Eli, wambikela.

¹⁵ U-Eli gade asele aneminyaka ematjhumi athobako nabunane, namehlwakhe selaphophele, angasaboni.

¹⁶ Umuntu loyo wabikela u-Eli wathi: “Mina ngingobuya etatawini lokulwa. Ngibaleke khona namhlanjesi.” U-Eli wabuza wathi: “Ndodanami, kwenzekeni?”

¹⁷ Umbiki waphendula wathi: “U-Israyeli uhlulwe maFilista wabaleka, nebutho lethu lilobe khulu kwamambala. Amadodanakho womabili, uHofni noFiniyasi, abulewe bekwathunjwa nomfaji kaZimu.”

¹⁸ Kuthe lokha umuntu loyo nakhuluma ngomfaji kaZimu, u-Eli wagenuka esitulweni agade ahlezi kiso hlanu kwesango lomuzi. Waphuka intamo bewahlongakala ngombana gade asele aluphele begodu azimukile. Ubegade asikhulu sakwa-Israyeli iminyaka ematjhumi amane.

¹⁹ Umalukazanakhe, umkaFiniyasi, gade asidisi nesikhathi sobana abelethe sesitjhidele. Kuthe lokha nezwa bona umfaji kaZimu uthunjiwe nokuthi usosokanakhe nomyenakhe bahlongakele, wasongana bewabeletha khonapho ngombana wahlulwa ziinhlabi.

²⁰ Kuthe lokha nahlongakalako, abafazi abagade bambelethisa bathi: “Ungadani! Sewubelethe umsana!” Yena akhange abaphendule namkha abatjheje.

²¹ Wathiya umsana loyo ibizo laka-Ikhabhodi, asithi: “Iphazimulo isukile ku-Israyeli.” Lokho wakutjho ngebanga lokuthunjwa komfaji kaZimu nokuhlongakala kwakasosokanakhe nomyenakhe.

²² Iye, wathi: “Iphazimulo isukile ku-Israyeli ngombana umfaji kaZimu uthunjiwe.”