1 USAMYELA 30 - IsiNdebele 2012 Translation

UDavida ubhubhisa ama-Amalekhi

¹ UDavida namadoda agade akhamba nawo bafika eTsikhilagi ngemva kwamalanga amabili. Ngesikhatheso ama-Amalekhi gade ahlangule isewula yakwaJuda neTsikhilagi. Bebasahlele iTsikhilagi bebalitjhisa.

² Bathumba abafazi bomuzi nabo boke abakiwo. Akhange babulale noyedwa wabo, kodwana babaraga bakhamba nabo.

³ Lokha uDavida nabantu bakhe bafika eTsikhilagi, bayifunyana ibhujiswe ngomlilo. Abomkabo, amadodanabo namadodakazabo bathunjiwe.

⁴ Nje-ke uDavida namadoda agade akhamba nawo bakhihla isililo esikhulu bebabibitheka.

⁵ Bobabili abafazi bakaDavida, u-Arhinowami weJizriyela no-Abigeyili umfelokazi kaNabhali weKharameli bebathunjiwe.

⁶ UDavida gade asengozini ngombana abantu bebakhuluma ngokumkhanda ngamatje. Woke umuntu gade abilile emmoyeni ngebanga lamadodanabo namadodakazabo. Kodwana uDavida wafunyana amandla kuSomnini uZimakhe.

⁷ Yeke uDavida wathi kumphristi u-Abiyatari, indodana ka-Arhimeleki: “Akhungilethele i-efodi hle.” U-Abiyatari wamlethela yona.

⁸ UDavida wabuza kuSomnini wathi: “Ngibagijimise abasahlelaba na? Ngizabafunyana na?” USomnini waphendula wathi: “Bagijimise, uzabafunyana begodu uzakuphumelela ukusindisa abakuthumbileko.”

⁹ UDavida namakhulu amathandathu wamadoda bafika emlanjeni iBhesori, lapha amanye amadoda asala khona.

¹⁰ Amakhulu amabili gade seladiniwe angasakwazi ukuyama esikhisini iBhesori. Kodwana uDavida waragela phambili namakhulu amane wamadoda.

¹¹ Amadoda agade akhamba noDavida afunyana umGibhide emmangweni, amusa kuDavida. Amupha ukudla wagoma, wasela namanzi.

¹² Amupha igagwana lamakwapa wamakhiwani namakhekhe amabili wamakwapa wediribe. Wagoma wase ubuyelwa mamandla ngombana ubangakhange agome ukudla namkha asele amanzi amalanga amathathu nobusuku obuthathu.

¹³ UDavida wambuza wathi: “Akhusungitjele, ungowakosobani? Udabukaphi?” Yena wathi: “NgimGibhide, ikhoboka lomunye wama-Amalekhi. Ikosami ingisukele lokha nangithoma ukugula emalangeni amathathu adlulileko la.

¹⁴ Besisahlele isewula yakwaJuda lapha kuhlala khona amaFilista nekoro yamaKhalebi. Sase sitjhisa iTsikhilagi.”

¹⁵ UDavida wambuza godu wathi: “Ungehla nami uyongikhombisa abathumbabo na?” Yena wathi: “Iye, nawungafunga kimi phambi kwakaZimu bona angeze ungibulale begodu angeze unginikele ekosinami, khona ngingakwehlisela kibo.”

¹⁶ Yeke wehla noDavida. Madekhethu! Qalani, bazigedlile benze umnyanya ngezinto abazithumbe enarheni yamaFilista neyamaJuda. Bayagoma, bayasela bebayagida.

¹⁷ Ngelanga elilandelako uDavida wabasahlela kusukela ngamasa bekwaba kuntambama. Akhange kube khona noyedwa phakathi kwabo ophunyurhako, ngaphandle kwamasokana amakhulu amane akhwela amakamela abaleka.

¹⁸ UDavida wakusindisa koke obekuthunjwe ma-Amalekhi, ngitjho nabafazi bakhe ababili.

¹⁹ Bekungakalahleki litho: boke abantwana nabantu abakhulu, nepahla yoke egade ithunjwe ma-Amalekhi. UDavida wabuya nakho koke.

²⁰ Amadoda agade akhamba noDavida araga imihlambi yefuyo abayithathela ama-Amalekhi ngaphambi kweyabo abayibuyise ekuthunjweni, basithi: “Yipahla kaDavida le.”

²¹ UDavida weza ebantwini abamakhulu amabili abagade batjhiywe esikhisini iBhesori ngebanga lokudinwa. Baphuma bonyana bahlangabeze uDavida nabantu agade anabo. UDavida watjhidela ebantwinabo, wabalotjhisa.

²² Hlangana namadoda akhamba noDavida bekukhona iimbhidlamnyanya, iinkhohlakali zabantu. Zathi kilabo abangakhange baphume nazo: “Ngebanga lokobana ningazange niphume nathi, angeze sabelane nani ipahla esiyiphangileko. Nokho-ke, ngileyo naleyo indoda ingathatha umkayo nabantwabayo igoduke.”

²³ Kodwana uDavida wathi kizo: “Awa bafowethu, niyayilahla. Ningenzi njalo ngezinto uSomnini asiphe zona. USomnini usibulungile bewanikela kithi ibutho egade lijamelene nathi.

²⁴ Akunamuntu onganisekela entweni eniyitjhoko leyo. Isabelo somuntu osele nepahla sifanele silingane nesomuntu owehle nepi. Asabelaneni ngokulinganako.”

²⁵ UDavida wenza lokho kwaba mthetho kwa-Israyeli bekube namhlanjesi.

²⁶ Kuthe lokha uDavida nafika eTsikhilagi, wathumela enye yepahla ebaphathini bakwaJuda ebegade kubasekeli bakhe, wathi: “Naso isipho senu esiyipahla ethunjwe ezitheni zakaSomnini.”

²⁷ Wasithumela kilabo abagade baseBhethe-Eli neRamothi-Negebi kanye neJatiri;

²⁸ nakilabo abase-Aroweri, eSifmoti, ne-Etjhitemowa;

²⁹ nabaseRakala, emizini yamaJerarhamiyeli namaKheni;

³⁰ nabaseRhoroma, eBhori-Atjhana, e-Ataka

³¹ neRhebroni; nakilabo egade bakezinye iindawo lapha uDavida nabantu bakhe bebaphele bajikajike khona.