1 USAMYELA 3 - IsiNdebele 2012 Translation

USomnini ukhuluma kuSamyela

¹ Umsana uSamyela wasebenzela uSomnini atjhejwe ngu-Eli. Ilizwi lakaSomnini belingakandi amalanga lawo, nombono uyivela kancani.

² Ngesikhatheso u-Eli gade alele endawenakhe sele athoma ukuphophala, angasaboni kuhle.

³ Ikesi kaZimu beyingakacimi, uSamyela yena alele ethempelini lakaSomnini lapha bekunomfaji kaZimu khona.

⁴ USomnini wabiza uSamyela. Yena waphendula wathi: “Ngilapha!”

⁵ Wagijimela ku-Eli, wafika wathi: “Ngizwe ungibiza; ngilapha.” U-Eli wathi: “Akhange ngikubize. Khamba uyokulala.” Wakhamba-ke walala.

⁶ USomnini wabuyelela wabiza wathi: “Samyela!” USamyela wavuka waya ku-Eli wafika wathi: “Ngizwe ungibiza; ngilapha.” U-Eli wathi: “Ndodanami, akhange ngikubize. Khamba uyokulala.”

⁷ USamyela gade angakabukwazi uSomnini kuhle, nelizwi lakaSomnini belingakabukwambuleka kuye.

⁸ Godu uSomnini wabiza uSamyela ihlandla lesithathu. Yena wavuka waya ku-Eli wafika wathi: “Ngilapha ngombana ngizwe ungibiza.” U-Eli walemuka bona nguSomnini obiza umsana lo.

⁹ Wathi kuSamyela: “Khamba uyokulala. Nakukhona okubizako godu bese uthi, ‘Khuluma Somnini. Isisebenzi sakho silalele.’ ” USamyela wabuyela endawenakhe wayokulala.

¹⁰ USomnini weza wafese wajama, wabiza njengekuthomeni wathi: “Samyela! Samyela!” USamyela waphendula wathi: “USomnini akakhulume. Isisebenzi sakhe silalele.”

¹¹ USomnini wathi: “Yelela! Ngizokwenza isiga kwa-Israyeli ekuzokuthi lokha abantu nabasizwako iindlebe zabo zibe buzikazikani.

¹² Mhlokho ngizakwenza ku-Eli yoke into engayikhulumako ngendlwakhe kusukela ekuthomeni bekube sekugcineni.

¹³ Ngamtjela u-Eli bona ngizakugweba indlwakhe ngebanga lesono asaziko ngombana lokha amadodanakhe nakazinyazisako azange awakhalime.

¹⁴ Ngebangelo ngiyafunga ngiyaqinisa phezu kwendlu ka-Eli ngithi, ‘Akunamhlabelo nanyana umnikelo ongahlangula isono sendlu ka-Eli.’ ”

¹⁵ USamyela waphilelwa bekwasa. Ngomuso wavuka wavula iminyango yethempeli lakaSomnini. Wesaba ukutjela u-Eli umbono.

¹⁶ U-Eli wambiza uSamyela wathi: “Samyela, ndodanami!” USamyela wasabela wathi: “Ngilapha!”

¹⁷ U-Eli wathi: “USomnini utheni kuwe na? Ungangifihleli litho. UZimu uzakuhlunguphaza kumbi nawungangifihlela into ayikhulume kuwe.”

¹⁸ Yeke uSamyela wamtjela koke; akhange amfihlele litho. U-Eli wathi: “Yena unguSomnini. Uzakwenza akubonako.”

¹⁹ USamyela wakhula. USomnini waba naye begodu akhange avumele nelilodwa ilizwi lakhe bona liwele phasi.

²⁰ Kusukela eDani ngetlhagwini bekube seBheritjheba ngesewula, u-Israyeli woke wabona bonyana uSamyela umphorofidi wamambala kaSomnini.

²¹ USomnini waragela phambili ngokuziveza eTjhilo. Iye, waziveza ngelizwi lakhe kuSamyela.