1 USAMYELA 28 - IsiNdebele 2012 Translation

¹ Emalangeni lawo, amaFilista ahlanganisa ibutho lawo bona alwe no-Israyeli. Yeke u-Akhitjhi wathi kuDavida: “Yazi bona wena nabantu bakho nizakukhamba nami siyokulwa ipi.”

² UDavida wathi: “Khona-ke uzazibonela ngokwakho bona incekwakho yenzani.” U-Akhitjhi waphendula wathi: “Kulunge khulu nakunjalo, ngizakwenza ube mtjhejami nakusaliwako.”

USawula ufuna isizo esangomeni

³ USamyela gade sele ahlongakele, no-Israyeli woke sele ambeka emzinakhe eRama bewamlilela. Ngesikhatheso uSawula naye gade aqothe zoke izangoma neenyanga enarheni yakwa-Israyeli.

⁴ AmaFilista ahlangana enza ikampawo eTjhunemi; uSawula naye wahlanganisa woke ama-Israyeli wenza ikampa eGilibowa.

⁵ Kwathi lokha uSawula nabona ipi yamaFilista, wesaba khulu bewathuthumela.

⁶ Wabuza kuSomnini, kodwana uSomnini akhange amphendule ngitjho ngamabhudango nanyana nge-urimi nangabaphorofidi.

⁷ Yeke wathi uSawula eencekwini zakhe: “Ngifunelani isangoma somfazi ukuze ngiye ngiyokuphengula kiso.” Iinceku zathi kuye: “Sikhona esinye e-Eni-Dori.”

⁸ Nje-ke uSawula wazitjhatjhanisa, wembatha izambatho ezijayelekileko, wakhukhutha ebusuku akhamba namadoda amabili baya emfazini loyo. Wafese wathi kuye: “Ngibawela ebezimini bona ngikhulume naloyo engizakumutjho ngebizo.”

⁹ Kodwana isangoma sathi: “Afeke! Angithi uyazi bona uSawula wenzeni: Uqothe zoke iinyanga nezangoma enarheni. Alo, ungibekelelani isifu bona ngibulawe na?”

¹⁰ USawula wafunga ngoSomnini wathi: “NgoZimu ngiqinisile ngithi, awukazukubethwa ngesibanga sentwele.”

¹¹ Nje-ke isangoma sathi: “Ngikubawele bani?” USawula wathi: “Ngibawela uSamyela.”

¹² Kuthe bona isangoma sibone kuvela uSamyela, sarhuwelela khulu sathi kuSawula: “Alo, ungirhwaleleni? Angithi wena unguSawula!”

¹³ USawula wathi kuye: “Ungesabi! Ubonani?” Isangoma sathi: “Ngibona isithunzi sikhuphuka sivela kabaphasi.”

¹⁴ Wasibuza wathi: “Sinjani?” Sona sathi: “Liqhegu elilupheleko, lembethe iphuraphura liyakhuphuka.” Yeke uSawula wazi bona nguSamyela, waguqa bewahloma ihloko phasi.

¹⁵ USamyela wathi kuSawula: “Ungiphazamiseleni ngokungenyusa na?” USawula wathi: “Ngitshwenyeke khulu. AmaFilista alwa nami noZimu ungihlanukele. Akasangiphenduli ngitjho ngabaphorofidi namkha ngamabhudango. Nje-ke ngibize wena bona ungitjele bonyana ngifanele ngenzeni?”

¹⁶ USamyela wathi: “Alo, uzelani kimi nakube uSomnini ukuhlanukele waba sisitha sakho?

¹⁷ USomnini wenze akukhuluma kimi ngawe ngaphambili: USomnini uwususile umbuso esandleni sakho, wawunikela uDavida, umakhelwanakho, ongcono kunawe.

¹⁸ USomnini wenze lokhu kuwe namhlanjesi ngebanga lokobana ungakhange umlalele. Bekasilingekele ama-Amalekhi, nje-ke bewufanele uwarhayile nya.

¹⁹ USomnini uzokunikela kanye no-Israyeli esandleni samaFilista. Kusasa wena nabesabakho nizobe nikimapha. Begodu ibutho laka-Israyeli uSomnini uzolinikela emaFilisteni.”

²⁰ Khonokho uSawula wadusuka phasi azele ukwesaba ngebanga lamezwi kaSamyela. Gade aphelelwe mamandla ngombana loke ilangelo nobusukobo, ubengakhange agome ilitho.

²¹ Kuthe lokha isangomeso nasifika kuSawula simbona bonyana uyarutharutha, sathi: “Kosami, nginikele ukuphila kwami ngakulalela, ngenza koke othe ngikwenze.

²² Nje-ke ngiyakubawa, lalela incekukazakho. Yithi ngikunikele ukudla ugome ukuze ube namandla wokukhamba indlela.”

²³ USawula wala wathi: “Angifuni ukudla.” Kodwana amadoda agade akhamba naye asiza isangoma, amncenga wawalalela. Wavuka, wahlala emkghadini.

²⁴ Isangoma besinethole elinonisiweko ekhaya, salihlaba masinyana. Sathatha iflowuru sayibhica, sabhaga isikwa esinganangumelo.

²⁵ Sase sibeka phambi kwakaSawula neenceku zakhe, bagoma. Khona ngobusukobo basikima bagoduka.