1 USAMYELA 27 - IsiNdebele 2012 Translation

UDavida usemaFilisteni

¹ UDavida wadlumbana wathi: “Ngelinye ilanga, uSawula uzongibamba. Okungcono angibalekele enarheni yamaFilista, ngisinde. Nangenze njalo, uSawula uzakudinwa ukufunana nami nanyana kukuphi kwa-Israyeli. Ngizabe ngiphunyurhile-ke esandleni sakhe.”

² UDavida nabantu abamakhulu asithandathu abagade banaye, bakhamba bayamela ku-Akhitjhi umsa kaMawoko ikosi yeGathi.

³ UDavida nabantu bakhe banzinza eGathi no-Akhitjhi. Omunye nomunye gade anomndenakhe, noDavida anabafazi bakhe ababili: U-Arhinowami weJizriyela no-Abigeyili weKarameli, umfelokazi kaNabhali.

⁴ Lokha uSawula natjelwa bona uDavida ubalekele eGathi, akhange asamfuna.

⁵ Yeke uDavida wathi ku-Akhitjhi: “Kungaba njani nange ikosi ingangipha indawo komunye wemizi esemaphandleni ukuze ngihlale khona? Incekwakho ingahlala njani nekosayo edorobheni na?”

⁶ Nje-ke mhlanokho u-Akhitjhi wamabela iTsikhilagi. Yona yaba ngeyamakhosi wakwaJuda kusukela mhlokho.

⁷ UDavida wahlala emkhawulweni wamaFilista umnyaka neenyanga ezine.

⁸ Ngesikhatheso uDavida nabantu bakhe benyuka basahlela amaGetjhuri, amaGirizi nama-Amalekhi. Abantwaba bebahlala endaweni le ukusuka eThelamu ukuya eTjhuri emaphethelweni weGibhide.

⁹ Ngesikhathi soke lokha uDavida nasahlela inarha gade abulala boke abantu. Kodwana izimvu, iinkomo, abodumbana namakamela kanye nezambatho azithathele zona. Kuthi emva kwalokho abuyele ku-Akhitjhi.

¹⁰ U-Akhitjhi ubephele ambuze athi: “Bewusahlelephi namhlanje, wena Davida?” Ubephendula athi: “Esewula yakwaJuda”, nanyana “Isewula yeJerarhamiyeli”, nanyana “Isewula yamaKheni.”

¹¹ Gade angalethi umuntu aphila eGathi ngombana wacabanga wathi: “Bangasikhaphela bathi, ‘UDavida wenze lokhu nalokhu.’ ” Lokhu bekumumukghwakhe ngesikhathi soke asahlala enarheni yamaFilista.

¹² U-Akhitjhi wathemba uDavida bewazitjela wathi: “Uzondeke khulu ebantwini bekhabo kwa-Israyeli, yeke sewuzaba yincekwami isiphelani.”