1 USAMYELA 24 - IsiNdebele 2012 Translation

UDavida ubabalela ipilo kaSawula

¹ USawula selabuyile ekuqotheni amaFilista, kwathiwa kuye: “UDavida useentabeni ze-Eni-Gedi.”

² Yeke uSawula wathatha iinkulungwana ezintathu zamadoda akhethwe kibo boke bakwa-Israyeli, waphuma bona ayokuqala uDavida nabantu bakhe eduze kwamaDwalepunzi.

³ USawula wafika esibayeni sezimvu eqadi kwendlela, bekunerholo lapho, wangena khona wazithuma. UDavida nabantu bakhe bebangaphakathi kwerholwelo!

⁴ Abantu bakaDavida bathi kuye: “Namhlanje kunamhlanje! Angithi uSomnini utjhwile kuwe wathi, ‘Ngizakunikela isitha sakho esandleni bona wenze njengokuthanda kwakho.’ ” Yeke uDavida wasikima, wakhukhutha, wafese watsepunya umphetho wephuraphura kaSawula.

⁵ Emva kwalokho uDavida wabethwa sisazela sokutsepunya umphetho wephuraphura kaSawula.

⁶ Wathi ebantwini bakhe: “USomnini akavumi bona ngenze into enje ekosinami, umzeswa kaSomnini, nanyana ngiphakamise isandla sami kiyo ngombana imzeswa kaSomnini.”

⁷ UDavida wakhalimela abantu bakhe ngokuncama. Akhange abavumele bona bathinte uSawula. USawula nasikimako aphuma ngerholweni

⁸ uDavida waphumisana naye khonokho wamlandela. Wamrhuwelela wathi: “Bayede, kosi!” USawula naqala emuva, uDavida waguqa wahloma ihloko phasi.

⁹ Wathi kuSawula: “Kosami, kubayini ulalele abantu lokha nabathi, ‘UDavida ufuna ukukulimaza?’

¹⁰ Namhlanjesi uzibonele ngawakho bona uZimu ukusindise njani ezandleni zami ngerholweni. Abantu bami bangihlohlozele bona ngikubulale, kodwana mina ngakubabalela. Ngathi kibo, ‘Angizusiphakamisa isandla sami ekosinami ngombana imzeswa kaSomnini.’

¹¹ Ubaba akaqale, naku umphetho wephuraphurakhe esandleni sami! Ngitsepunye umphetho wephuraphura kababa nokho ubaba ngangambulala. Ubaba uyabona-ke bona anginantwembi namkha ikani kuye. Akhange ngikone baba, kodwana ubaba uzumana nepilwami.

¹² UZimu akabe mgwebi phakathi kwethu. Mhlamunye yena angangibuyiselela kubaba ngalokho akwenze kimi, kodwana mina angeze ngambeka isandla ubaba.

¹³ Angithi ikulumo yabadala ithi, ‘Ziinkhohlakali zodwa ezenza ubukhohlakali’? Yeke mina angeze ngambeka isandla ubaba.

¹⁴ Kuhlekuhle ikosi yakwa-Israyeli izumana nobani? Ilandelelene nenja efileko, itsetse nje!

¹⁵ UZimu uzakuba mgwebi phakathi kwethu abe akhombe onomlandu. Ngebanga lokobana ubona koke, uzakujamela indabami angitjhaphulule kubaba.”

¹⁶ Kwathi bona uDavida aqede ukutjho lokho, uSawula wabuza wathi: “Davida ndodanami, lilizwi lakho lelo na?” Wakhihla isililokazi,

¹⁷ wathi: “Ulunge khulu kunami ngombana wangiphatha kuhle, kodwana mina ngakuphatha kumbi.

¹⁸ Ukhombisile khona nje bona awunantwembi ngami: USomnini bekanginikele esandleni sakho kodwana akhange ungibulale.

¹⁹ Abasibangaki abantu abangathi sele babambe isitha sabo ngezandla basilise sikhambe siphephile. Kwanga uSomnini angakuhlomulisa khulu ngendlela ongiphethe ngayo namhlanje.

²⁰ Sengiyazi bona ngambala uzokuba yikosi begodu umbuso wakwa-Israyeli uzokunzinza ezandleni zakho.

²¹ Nje-ke funga bona ngoSomnini awuzukubhubhisa iinzukulwani zami namkha uphelise ibizo lami endlini kababa.”

²² UDavida wafunga-ke kuSawula. USawula wabuyela ekhaya kodwana uDavida nabantu bakhe bakhuphukela eentabeni.