1 USAMYELA 22 - IsiNdebele 2012 Translation

UDavida e-Adulamu neMitsiphe

¹ UDavida wasuka eGathi wayokubhaca erholweni le-Adulamu. Kwathi bona abomnakwabo nebekhabo bezwe ngalokho, behlela kuye khonapho.

² Boke ebegade basemtlhagweni, eenkolodweni neenghonghoyilweni bakghubelelana kuye, waba mrholabo. Bekungaba babantu abamakhulu amane.

³ Kusukela lapho uDavida waya eMitsiphe kwaMowabi, wafese wathi ekosini yakhona: “Bewungeze wavumela ubaba nomma bona bagugubale nawe lapha, bengizwisise bona uZimu ufuna ukungenzelani na?”

⁴ Nje-ke wabatjhiya nekosi yakwaMowabi, bahlala nayo isikhathi soke yena agade asabhace ngaso eentabeni.

⁵ Kodwana umphorofidi uGadi wathi kuDavida: “Ungahlali eentabenapha. Khamba uye enarheni yakwaJuda.” Wasuka-ke uDavida waya ehlathini leRhereti.

USawula ubulala abaphristi beNobi

⁶ USawula wezwa bona kuyaziwa bonyana uDavida nabantu bakhe bakuphi. USawula wahlala ngaphasi komuthi womtamariski aphethe umkhontwakhe entatjaneni yeGibeya, zoke iinkhulu zakhe zazijamile zimzombile.

⁷ USawula wathi kizo: “Lalelani, madoda wakwaBhenjamini! Nicabanga bona umsa kaJese uzaninikela noke nje amasimu neemvande zediribe? Uzanenza noke nje bona nibe ziinduna zeenkulungwana neenduna zamakhulu na?

⁸ Kungebangelo noke nenze isibopho sokujamelana nami na? Akakho noyedwa ongitjelako lokha indodanami yenza isivumelwano nomsa kaJese. Akakho noyedwa kinapha otjhejako ngami nanyana angitjele bona indodanami itjitjizele incekwami bona ingilalele endleleni njengombana yenza namhlanje.”

⁹ Nje-ke uDowegi umEdomu ogade ajame neenkhulu zakaSawula wathi: “Ngiyibonile indodana kaJese ifika ku-Arhimeleki umsa ka-Arhithubi eNobi.

¹⁰ U-Arhimeleki wayibuzela kuSomnini bona ifanele yenze njani. Wayipha nomphako nesabula kaGoliyadi umFilista.”

¹¹ Ikosi uSawula yathumela bona kubizwe umphristi u-Arhimeleki umsa ka-Arhithubi nendlu kayise yoke, ebekubaphristi beNobi. Boke beza ekosini uSawula.

¹² USawula wathi: “Nje-ke lalela wena msa ka-Arhithubi.” Yena wathi: “Iye kosami, ngilalele.”

¹³ USawula wathi kuye: “Kubayini wenze isibopho ngami ninomsa kaJese? Umuphe izikwa nesabula, bewambuzela kuZimu ukuze angihlubuke, abe ngongilalela endleleni njengombana enzile namhlanjesi?”

¹⁴ U-Arhimeleki waphendula wathi: “Awu kosami, ngubani eencekwini zoke zekosi othembeke njengoDavida umkhwenyana wekosi, induna yamabutho agada ikosi, nohlonipheke kangaka esigodlweni soke sekosi?

¹⁵ Nokho bebekungathomi mhlokha bona ngimbuzele kuZimu. Iye awa, bengingathomi! Ikosi ayingabeki incekwayo nanyana indlu kayise umlandu ngombana inceku yekosi ayazi litho ngendaba le.”

¹⁶ Kodwana uSawula wathi: “Ngiqinisile uzokufa Arhimeleki, wena nendlu kayihlo yoke!”

¹⁷ USawula walayela abogadi ebebajame hlanu kwakhe wathi: “Bulalani abaphristi bakaSomninaba ngombana nabo bahlangene noDavida! Bebazi bonyana uyabaleka, kodwana akhange bangitjele.” Kodwana iinkhulu ezinye zakaSawula akhange zithande ukuphakamisa isandla phezu kwabaphristi bakaSomnini.

¹⁸ Yeke uSawula walayela uDowegi wathi: “Rhayila abaphristaba!” UDowegi umEdomu waphendukela kibo wabarhayila. Mhlokho wabulala amadoda amatjhumi abunane nahlanu embatha iphuraphura yobuphristi.

¹⁹ Waragela phambili wasahlela neNobi umuzi wabaphristi. Amadoda nabafazi, abantwana namasana, iinkomo, abodumbana nezimvu kwabulawa ngesabula.

²⁰ Kodwana u-Abiyatari, umsa ka-Arhimeleki omsa ka-Arhithubi, wasinda bewabaleka bona ayokuhlangana noDavida.

²¹ Wafese watjela uDavida bona uSawula ubulele abaphristi bakaSomnini.

²² Nje-ke uDavida wathi ku-Abiyatari: Mhlokha, mhlana uDowegi umEdomu asethempelini, ngazile bona uzokwenza ngakho koke bona atjele uSawula. Ngimi onomlandu wokufa kwayo yoke indlu kayihlo.

²³ Hlala nami, ungesabi. Umuntu ofuna ubuphilo bakho ufuna mina. Uphephile nawunami.