1 USAMYELA 21 - IsiNdebele 2012 Translation

UDavida eNobi

¹ UDavida watjhinga eNobi ku-Arhimeleki umphristi. U-Arhimeleki wabethwa livalo nahlangana naye, wabe wabuza wathi: “Alo, kubayini ube wedwa, unganamkhambisani na?”

² UDavida waphendula u-Arhimeleki umphristi wathi: “Ikosi, uSawula ingiphe umyalo beyathi kimi, ‘Kungabi nomuntu owaziko bona ngikuthumeni nokuthi ngikuyale ngathini.’ Amadoda engikhamba nawo ngiwatjele bona angihlangabeze endaweni ethileko.

³ Alo, ungiphatheleni egonywako? Yewungiphe iimpani ezihlanu zesikwa, nanyana yini ongayifunyana.”

⁴ Kodwana umphristi waphendula uDavida wathi: “Anginaso isikwa esijayelekileko, nokho kukhona izikwa zethempeli kwaphela. Ungazifumana kwaphela nakube amadoda lawo azahlukanisile ebafazini ngokwamabhayi.”

⁵ UDavida wathi kumphristi: “Iye, vane sizahlukanise nabafazi ngokujayelekileko lokha nasiya epini. Imizimba yamadoda ayinasici nanyana singayi epini. Kangangani-ke nakube ikhambo liqakatheke njengelanamhlanje!”

⁶ Umphristi wamnikela izikwa zethempeli ngombana bezingekho ezinye ngaphandle kwalezo ezisuswe etafuleni lakaSomnini nakubekwa ezitjha.

⁷ Mhlokho enye yeenceku zakaSawula gade isethempelini ngamabanga athileko. Ibizo layo bekunguDowegi umEdomu. Yona beyiyinduna yabelusi bakaSawula.

⁸ UDavida wabuza u-Arhimeleki wathi: “Awunamkhonto namkha isabula kuwapho na? Akhange ngize nesabula nanyana ngisiphi seenhlabano zami ngombana iindaba zekosi bezirhabekile.”

⁹ Umphristi waphendula wathi: “Isabula kaGoliyadi umFilista, owambulala emrhobeni we-Ela, ikhona. Isongwe ngetjhila ngemva kwe-efodi. Nawuyifunako ithathe ngombana ayikho enye ngaphandle kwaleyo.” UDavida wathi: “Ayikho enjengayo; nginikela yona.”

UDavida eGathi

¹⁰ Mhlokho uDavida wabalekela uSawula waya ku-Akhitjhi ikosi yeGathi.

¹¹ Iinsebenzi zaka-Akhitjhi zathi kuye: “AkusinguDavida ikosi yenarha lo na? Akusuye, abafazi abakhalele ngaye nabagidako bathi, “ ‘USawula ubulele iinkulungwana, uDavida ubulele iinkulungwana ezilitjhumi.’ ”

¹² Kuthe uDavida nacabanga amezwi la, wesaba khulu u-Akhitjhi ikosi yeGathi.

¹³ Yeke wazenza kwanga uphambene phambi kwabo. Warhuhla amabadi wesango ngamazipho, wawuluka neendenda esilevini, waba sengathi lihlanya.

¹⁴ U-Akhitjhi wathi eensebenzini zakhe: “Qalani umuntu lo! Uphambene! Nimlethelani kimapha na?

¹⁵ Nicabanga bonyana ngifuna amahlanya bona ningangilethela umuntu ozanande agila imikhuba phambi kwamapha na? Nimfunisani umuntu onje esigodlweni samesi?”