1 USAMYELA 20 - IsiNdebele 2012 Translation

UDavida noJonathani

¹ UDavida wabaleka endlini yabaphorofidi eRama waya kuJonathani, wafese wabuza wathi: “Kanti ngenzeni? Umlandwami uyini? Ngimone ngani ubabakho ukuze afune ukungibulala na?”

² UJonathani waphendula wathi: “Nakanye! Awukazukufa! Ngiyathembisa akunalitho ubaba alenzako, nanyana likhulu nanyana lincani angakangitjeli. Alo, ubaba uzabe ayifihlelani indaba le kimi na? Akunanto enjalo.”

³ UDavida wathi: “NgoZimu uqinisile, ubabakho uyazi bona ngiyathandeka kuwe, nje-ke uzitjele wathi, ‘UJonathani akakafaneli akwazi lokhu ngombana angaphatheka kumbi.’ Nokho ngiqinisile ngithi uSomnini uyangizwa, phila ngiphile, ngisemlonyeni wokufa.”

⁴ UJonathani wathi kuDavida: “Alo-ke ungathanda bona ngikwenzeleni?”

⁵ UDavida wathi: “Qala, kusasa lilanga lomgidi wokuthwasa kwenyezi, kufanele ngihlale esidlweni kanye nekosi. Yeke ngivumela bona ngiyokubhaca emmangweni bekube lilanga laphambi kwakusasa ntambama.

⁶ Nange ubabakho angabona bona angikho, umtjele uthi, ‘UDavida ungirabhele khulu bona ngimvumele arhabele eBhethe-Lehema emzinekhabo ngombana ikoro yekhabo yoke inomhlatjelo womnyaka.’

⁷ Nangabe uthi, ‘Awa kulungile,’ khona umkhozakho uzabe aphephile. Kodwana nange angasilingeka, yazi-ke nawe bona unqophe ukungilimaza.

⁸ Ngebanga lesithembiso owasenza phambi kwakaSomnini, umkhozakho ubopheleke kuwe. Yeke nange kunento embi engiyenzileko, yewungisize ungibulale wena. Ngiyakubawa, unganginikeli ezandleni zakababakho.”

⁹ UJonathani wathi: “Awa, angeze ngakwenza lokho kuwe! Nangabe bekukhona okumbi engikwaziko ubaba akunqophe ngawe, bengizokwazisa nakanjani.”

¹⁰ UDavida wabuza wathi: “Ngubani ozongazisa nakube ubabakho uphendula ngokuhluthuka na?”

¹¹ UJonathani wathi: “Iza, namba siphume siye emmangweni.” Bakhamba-ke bobabili baya emmangweni.

¹² UJonathani wathi kuDavida: “Ngiyakuthembisa phambi kwakaSomnini uZimu wakwa-Israyeli, ngesikhathesi phambi kwakusasa, ngizakubuzisisa kubaba ngawe. Nangabe uyakwamukela ngizakuthumelela ilizwi ngikwazise.

¹³ Kodwana nangabe ubaba unqophe ukukulimaza, ngizakwazisa bengiqinisekise bonyana ukhamba uphephile. Nange ngingenzi njalo uSomnini akangibulale. “USomnini uzakuba nawe njengombana abe nobaba.

¹⁴ Nangisaphilako, yiba nomusa kimi njengombana noSomnini anomusa kuwe ukuze ngingabulawa.

¹⁵ Lokha uSomnini asusa zoke izitha zakho ephasini, yiba nesisa endlinami nawusaphilako.”

¹⁶ UJonathani wenza isivumelwano nendlu kaDavida wathi: “USomnini uzamhlunguphaza ongagcini isibopho lesi.”

¹⁷ UJonathani wenza uDavida bona abuye afunge bonyana uzakwethembeka, amkhathelele njengombana azikhathelela yena.

¹⁸ Yeke wathi uJonathani kuDavida: “Kusasa lilanga lomgidi wokuthwasa kwenyezi. Uzokukhunjulwa ngombana isihlalo sakho sizobe singanamuntu.

¹⁹ Phambi kwakusasa ntambama, iya endaweni owazifihla kiyo phambilini, ulinde elitjeni i-Ezeli.

²⁰ Ngizakudumuza imisubi emithathu ngehlangothini lalo, kubesengathi nginqophise entweni.

²¹ Ngizakuthumela umsana bese ngithi kuye, ‘Khamba uyokufuna imisubi leya.’ Lokha nangithi kuye, ‘Naso imisubi inganeno kwakho, yiza nayo la,’ ungaphuma-ke ngombana kuphephile. NgoZimu ngiqinisile akunangozi.

²² Kodwana nangithi emsaneni, ‘Imisubi ingale kwakho!’ Yewukhambe ngombana uZimu ukutjhaphululile.

²³ Mayelana nesithembiso esisenzilekwesiya, khumbula bonyana uSomnini ungufakazi phakathi kwami nawe isiphelani.”

²⁴ UDavida wazifihla emmangweni. Ngelanga lomgidi wokuthwasa kwenyezi, ikosi uSawula yahlala phasi bona igome.

²⁵ Yahlala endaweni engebodeni njengesiko layo, yalungana noJonathani, u-Abineri ahlezi hlanu kwayo; kodwana indawo kaDavida beyinganamuntu.

²⁶ USawula akhange atjho ilitho mhlokho ngombana waba nomkhumbulo othi: “Ikhona into esilapheleko eyenze uDavida angezi emgidini. Iye, kutjho bona usilaphele.”

²⁷ Kwathi ngelanga elilandelako, ilanga lesibili enyangeni, indawo kaDavida yatlhoga umuntu godu. USawula wabuza indodanakhe uJonathani wathi: “Kubayini umsa kaJese angakhange eze ekudleni izolo nanamhlanjesi na?”

²⁸ UJonathani waphendula wathi: “UDavida ungibawile warabhela bona ngimvumele aye eBhethe-Lehema.

²⁹ Wathi, ‘Yithi ngikhambe ngombana ikoro yekhethu inomhlatjelo emzinekhethu, nje-ke umnakwethu ungibawe bona ngibe khona. Nakulungileko kuwe, ithi ngikhambe ngiyokubona abafowethu.’ Kungebangelo angakezi etafuleni lekosi.”

³⁰ USawula wasilingekela uJonathani bewathi kuye: “Wena sidlhadlha somsana ndina! Udlumbana angazi bona sewukhethe ukukhambisana nomsa kaJese! Lokho kuzakuba lihlazo lakho neenhloni zakanyoko owakubelethako!

³¹ Nakusaphila umsa kaJese ephasinapha, uzasoloko ayingozi kuwe nembuswenakho. Akalethwe njenganje kimapha, kumele afe!”

³² UJonathani wabuza uyise uSawula wathi: “Kanti ubulawelani? Wenzeni?”

³³ Kodwana uSawula wamjikijela ngomkhonto bona ambulale. UJonathani walemuka bona uyise gade anqophe ukubulala uDavida.

³⁴ UJonathani wasikima etafuleni asilingeke khulu, akhange agome mhlokho ngombana gade akhubekile ngepatho eziinhloni uyise aphatha ngayo uDavida.

³⁵ Ekuseni ngakusasa uJonathani wakhamba nomsana emmangweni bona ahlangane noDavida.

³⁶ Wathi emsaneni: “Gijima uyokuqala imisubi engiyidumuzako.” Umsana asagijima wadumuza umsubela ngaphambi kwakhe.

³⁷ Kuthe lokha umsana nafika lapha umsubela kaJonathani uwele khona, uJonathani wamrhuwelela wathi: “Umsubela awusingaphambi kwakho na?”

³⁸ Warhuwelela godu wathi: “Rhaba! Ungariyadi!” Umsana wadobha umsubela wabuyela ekosinakhe.

³⁹ Umsana gade angazi litho ngalokhu; nguJonathani noDavida kwaphela egade bazi.

⁴⁰ UJonathani wanikela umsana iinhlabano zakhe wathi: “Zithathe ukhambe ubuyele nazo emzini.”

⁴¹ Emva kobana umsana akhambile, uDavida wasikima ngemva kwelitje waguqa wakhothama kathathu phambi kwakaJonathani. Base bayangana balila bobabili, kufikela lapha uDavida acola khona.

⁴² UJonathani wathi kuDavida: “Khamba uphephile kwanjesi ngombana sifunge ubuhlobo phakathi kwethu sobabili ebizweni lakaSomnini sathi, ‘USomnini ungufakazi phakathi kwami nawe, naphakathi kwesizukulwani sami nesakho isiphelani.’ ” Wakhamba-ke uDavida, noJonathani wabuyela emzinekhabo.