1 USAMYELA 2 - IsiNdebele 2012 Translation

Umthandazo kaHana

¹ UHana wathandaza wathi: “Ihliziywami iyathaba kuSomnini, kuSomnini amandlami makhulu khulu. Ngihleka amanabami, iye, ngithatjiswa lisizo lakho.

² AkunaZimu onjengawe, Somnini; iye, akakho noyedwa ngaphandle kwakho; alikho idwala elinjengoZimethu.

³ “Lisani ukukhuluma ngokuzikhakhazisa, kungaphumi ukuzazi emilonyenenu; ngombana uSomnini unguZimu owazi koke, nguye olinganisa izenzo zoke.

⁴ “Imisubi yeentsitsirimba yephukile, nokho abakhutjwako bahlonyiswa amandla.

⁵ Abagade basuthi basebenzela isikwa, abagade balambile banenala. Ogade ayinyumba ubeletha abantwana abalikhomba, kuthi onabantwana abanengi anyefe emandleni.

⁶ USomnini uyabulala, aphilise; uSomnini wehlisela phasi kwabaleleko, abuye enyuse.

⁷ USomnini uyakhwahlisa abe anjingise, uyathobisa abe aphakamise.

⁸ Uvusa abakhwahlileko ebhudwini, asikimise abatlhogileko ezaleni; abahlalise namakhosana, abaphe isikhundla esiphakamileko. “Ngambala iinsekelo zephasi ngezakaSomnini, ubeke inarha phezu kwazo.

⁹ Ubulunga iindlela zabathembekileko bakhe; abakhohlakeleko bazakuthuliswa ekufeni. Nangambala ukuhlula komuntu akuyi ngeenqababa.

¹⁰ Abajamelene noSomnini bazakuphihlizwa. “USomnini uzabathuthumbisa ngombani asezulwini. uSomnini uzakugweba iphasi loke; anikele umzeswakhe amandla, aqinise ozesiweko wakhe.”

Abaphristi beTjhilo

¹¹ U-Elikhana wabuyela kwakhe eRama, kodwana umsana uSamyela wasala, wasiza ethempelini atjhejwe ngu-Eli, umphristi.

¹² Amadodana amabili ka-Eli gade aziinkhohlakali, angahloniphi uSomnini.

¹³ Abaphristi gade banelungelo elithileko ebantwini lokha nabazokwenza umhlabelo. Bekuthi inyama isaphekiwe, kufike isisebenzi somphristi siphethe iforogo enamazinyo amathathu,

¹⁴ sihlabe ngayo ngakugalaza namkha ngaphakathi kwananyana ngiyiphi into esapoto. Kuthi koke iforogo ephuma nakho, umphristi azithathele khona. Benza njalo kibo boke bakwa-Israyeli abagade bafika eTjhilwapho.

¹⁵ Kodwana amadodana ka-Eli gade angasinjalo. Bekuthi uSomnini angakatjhiselwa umhlwehlwe e-aldarini, afike emuntwini owenza umhlabelo, athi: “Lethapha inyama yokubaswa leyo wena, umphristi akazukwamukela inyama ephekiweko kuwe; kodwana ehlaza kwaphela.”

¹⁶ Lokha umuntu loyo nakathi: “Awa, akhese kutjhiselwe uSomnini umhlwehlwe qangi bese uthatha koke okufunako,” bamphendule bathi: “Sukapha, letha inyama leyo khona nje. Nawungafuniko ngizazithathela yona ngekani.”

¹⁷ Nje-ke isono samadodana la sabasikhulu phambi kwakaSomnini ngombana abantu badelela umnikelo kaSomnini.

¹⁸ USamyela wasebenza phambi kwakaSomnini asesemsanyana njalo, embethe isambatho somphristi selineni.

¹⁹ Qobe mnyaka unina wamenzela iphuraphurana, wamlethela yona lokha nanyuka nomyenakhe bona benze umhlatjelo weminyaka.

²⁰ U-Eli wabusisa u-Elikhana nomkakhe wathi: “Kwanga uSomnini angakwandisela imbeleko ngomma lo esikhundleni somsana enimnikele uSomnini.” Bagoduka-ke.

²¹ USomnini wamkhumbula uHana, waba sidisi wabeletha. Waba namadodana amathathu namadodakazi amabili. Umntwana uSamyela wakhulela kuSomnini.

²² U-Eli ubasele aluphele khulu. Wezwa koke amadodanakhe agade akwenza ku-Israyeli woke, nokuthi gade alala nabesifazana abagade basebenza emnyango wethempeli.

²³ Wathi kiwo: “Nenzelani izinto ezinjalo bekuthi soke isizwe sakaSomnini sibalabale kimi ngobukhohlakali enibenzako na?

²⁴ Awa madodanami! Akusiyo indaba ehle engiyizwa ngani. Nidurhisa isizwe sakaSomnini.

²⁵ Lokha umuntu nakonela omunye umuntu, uZimu angakhe amzwele. Kodwana lokha umuntu onela uSomnini, ngubani ozamlamlela na?” Kodwana amadodanakhe akhange alalele ilizwi lakayise lokha nawakhalimako. USomnini waqinta ukuwabulala.

²⁶ Umsana uSamyela waragela phambili wakhula ngejamo begodu wathandwa nguSomnini nabantu.

Isiphorofido esijamelene no-Eli nendlwakhe

²⁷ Kwafika umuntu kaZimu ku-Eli wathi kuye: “Nakhu okwatjhiwo nguSomnini, ‘Angithi ngaziveza kuhle kiyo indlu kayihlo basese seGibhide, emzini kaFaro na?

²⁸ Angithi ngamkhetha phakathi kweenkoro zoke zakwa-Israyeli bona abemphristami ukuze avele e-aldarini lami atjhise khona itjhwalo, aphathe nembada ethempelini? Azange ngiyinikele indlu kayihlo ingcenye yeminikelo yabakwa-Israyeli na?

²⁹ Manjesi niwudelelelani umhlabelwami nomnikelwami engiwujamise endlinami na? Kubayini amadodanakho aqakatheke khulu kuwe kunami? Nikhetha ukuzinonisa ngeminikelo yoke ekhethekileko yabantu bami bakwa-Israyeli abangihlonipha ngayo.’

³⁰ “Nje-ke mina Somnini, uZimu wakwa-Israyeli ngithi ngathembisa bonyana indlwakho nendlu kayihlo nizakusebenza e-aldarini lami ngeenkhathi zoke. Kodwana kwanjesi nginisuthi ngombana ngidumisa abangidumisako nginyaze abanginyazako.

³¹ Yelela, kuza isikhathi sokobana ngisuse amandlakho namandla wendlu kayihlo, bekungasaba khona oluphalako ekorwenakho.

³² Lokha u-Israyeli nakenzelwa okuhle endlinami, wena uzakubona amatlhuwiso wodwa; angeze bekusaba nomuntu oluphalako ekorwenakho.

³³ Nange kungaba nomuntu wekhenu e-aldarini lami engingakamsusi, uzakubangela iinyembezi namatlhuwo kwaphela. Zoke iinzukulwana zakho zizokufa zisaqinile.

³⁴ Lokhu kuzakuba siboniso kuwe bona uHofni noFiniyasi, amadodanakho amabili, azakwehlelwa kukufa ngalanga linye.

³⁵ “Ngizazivusela ngokwami umphristi othembekileko, ozakwenza njengombana ngithanda ehliziywenami nemkhumbulwenami. Ngizamakhela indlu eqinileko. Yena asebenze ngeenkhathi zoke phambi kwekosi engizayikhetha.

³⁶ Kuzakuthi woke osalako endlinakho amkhothamele, abawe isipaparwana sesiliva neentshutshurwana zesikwa athi, ‘Ngiyakurabhela, akhese ungizamele isikorojana sobuphristi ukuze ngikghone ukufumana uburotjhwana ngidle.’ ”