1 USAMYELA 18 - IsiNdebele 2012 Translation

USawula akasathembi uDavida

^1-2 Kusukela mhlokho uSawula akhange asavuma bona uDavida abuyele endlini kayise kodwana wamenza bona ahlale naye. Emva kobana uDavida aqede ukukhuluma noSawula, ihliziyo kaJonathani yanamathela kuDavida ngombana wamkhathalela njengombana azikhathalela yena.

³ UJonathani wenza isivumelwano noDavida ngombana wamkhathalela njengombana azikhathelela yena.

⁴ UJonathani wahlubula iphuraphura ebegade ayembethe wayinikela uDavida. Wamnikela izambatho zakhe zepi, ngitjho nesabulakhe, nomsebe kanye nebhande lakhe.

⁵ Noma yini uSawula agade amthuma yona, uDavida wayenza ngokuphumelela okukhulu. USawula wamupha isikhundla esiphakamileko ebuthweni. Lokhu kwathabisa abantu boke ngitjho neenkhulu zakaSawula.

⁶ Ekubuyeni kwabantu emva kobana uDavida abulele umFilista, abafazi baphuma kiyo yoke imizi yakwa-Israyeli bona bahlangabeze ikosi uSawula ngokuvuma nokugida, ngeengoma zethabo, ngabosotjherere nangegatara yeenara ezintathu.

⁷ Basagida njalo gade bavuma bathi: “USawula ubulele iinkulungwana, uDavida ubulele iinkulungwana ezilitjhumi.”

⁸ USawula wasilingeka khulu, ingoma egade ivunywa le yamhlabekisa. Waba nomkhumbulo othi: “Bakhakhazisa uDavida ngamatjhumi weenkulungwana kodwana mina ngeenkulungwana nje. Sekusele nje bonyana bambeke abe yikosi!”

⁹ Kusukela lokho uSawula wathoma ukuqala uDavida ngokumrhonona.

¹⁰ Kwathi ngakusasa uSawula wangenwa ziinlwana, wadlharuma njengehlanya esigodlweni sakhe. UDavida wabetha iharibha njengombana gade asenza emihleni. USawula gade aphethe umkhontwakhe ngesandla,

¹¹ wawuphosa ngamandla azitjela athi: “Ngifuna ukuhlaba uDavida ngimhlanganise neboda.” Kodwana uDavida waphepha bekwaba kabili.

¹² USawula gade esaba uDavida ngombana uSomnini gade anoDavida kodwana amtjhiyile uSawula.

¹³ Ngebangelo wasusa uDavida eduze kwakhe, wambeka induna yekulungwana yabantu. UDavida warhola amajoni ejimeni lawo.

¹⁴ Ezintweni zoke agade azenza uDavida waphumelela khulu ngombana uSomnini gade anaye.

¹⁵ Lokha uSawula nabona indlela uDavida aphumelela ngayo, wamesaba ukudlula.

¹⁶ Kodwana u-Israyeli woke noJuda bamthanda uDavida ngombana wabarhola emajimenabo.

UDavida utjhada indodakazi kaSawula

¹⁷ Yeke uSawula wathi kuDavida: “Nangu uMerabi indodakazami elizibulo, ngizakwendisela yena abemkakho; kwaphela ngisebenzela ngesibindi ulwe izipi zakaSomnini uZimakho.” USawula wazitjela wathi: “Angingasibeki isandla sami phezu kwakhe, akube maFilista ambulalako.”

¹⁸ Kodwana uDavida wathi kuSawula: “Ngingubani mina begodu uyini umndeni wekhethu namkha ikoro kababa kwa-Israyeli, bonyana ngibe mkhwenyana wekosi na?”

¹⁹ Kwathi nakufika isikhathi sokobana uMerabi indodakazi kaSawula anikelwe uDavida, wendiselwa u-Adriyeli wakwaMerhola.

²⁰ Kwathi kusesenjalo uMikali indodakazi kaSawula wakarwa nguDavida. USawula wathaba lokha nabamtjela ngalokho,

²¹ wacabanga wathi: “Ngizomendisela yena, ngaleyondlela uzakugadanga isifu ukuze isandla samaFilista sibe phezu kwakhe.” Nje-ke uSawula wathi kuDavida: “Unethuba lesibili lokobana ube mkhwenyanami.”

²² Alo-ke uSawula wabiza iinceku zakhe wathi: “Khulumani noDavida ngemsitheleni nithi, ‘Qala ndoda, ikosi izwana nawe, neenceku zayo zoke ziyakuthanda. Yeke yiba mkhwenyanayo.’ ”

²³ Iinceku zazinande zikhobelela uDavida. Kodwana uDavida wathi: “Enjephana ukuba mkhwenyana wekosi yintwana encancani ngokucabanga kwenu na? Mina ngisichakana begodu angaziwa kangako.”

²⁴ Lokha iinceku zakaSawula zimtjela bonyana uDavida utheni,

²⁵ uSawula waphendula wathi: “Yenithi kuDavida, ‘Ikosi ifuna ukuzibuyiselela ezitheni zayo, nje-ke abe ayifuni ilitho elingako elililobolo ngomlobokazi ngaphandle kwamajwabu alikhulu wamaFilista.’ ” USawula gade anethemba lokobana uDavida uzakuwela ezandleni zamaFilista.

²⁶ Kuthe lokha iinceku zibikela uDavida iindabezi, zamthabisa kwaba kuhle kuye bonyana abe mkhwenyana wekosi. Yeke uDavida akhange asalinda bona iphole,

²⁷ waphuma nabantu bakhe wabulala amakhulu amabili wamaFilista. Waletha amajwabawo wawabeka aphelele phambi kwakaSawula ukuze abe mkhwenyanakhe. USawula wamendisela uMikali indodakazakhe bona abe mkakhe.

²⁸ Lokha uSawula alemuka bona uSomnini unoDavida nokuthi uMikali indodakazakhe uthanda uDavida,

²⁹ kwaba khona amesaba khulu gadesi begodu waba sisitha sakhe ipilwakhe yoke.

³⁰ Iinduna zamaFilista zaragela phambili nokulwa no-Israyeli; kodwana ngesikhathi soke uDavida gade aphumelela ukuzihlula ukudlula iinkhulu zakaSawula. Ngebangelo ibizo lakhe laduma khulu.