1 USAMYELA 16 - IsiNdebele 2012 Translation

USamyela uzesa uDavida

¹ USomnini wathi kuSamyela: “Uyokukhathazeka bekube nini ngoSawula? Ngimlahlile ekubeni yikosi phezu kwaka-Israyeli. Zalisa iphondo lakho ngamafutha we-oliva bese ungena indlela; ngikuthuma kuJese weBhethe-Lehema. Ngikhethe omunye wamadodanakhe kobana abe yikosi.”

² Kodwana uSamyela wathi: “Ngingaya njani lapho? Indaba le izakufika eendlebeni zakaSawula bese uyangibulala.” USomnini wathi kuye: “Thatha ithole bese nawufika khona uthi, ‘Ngize ukuzokwenzela uSomnini umhlabelo.’

³ Umemele uJese emhlabelweni, yeke ngizakukhombisa ofanele ukwenze. Ngifuna bonyana uzese loyo engizakukhombisa yena.”

⁴ USamyela wenza njengombana ikosi imtjelile. Nakafika eBhethe-Lehema, iinkhulu zedorobho zatatazela nazihlangana naye. Zambuza zathi: “Uze ngobuhle na?”

⁵ USamyela waphendula wathi: “Iye, ngize ngobuhle; ngize ukuzokwenzela uSomnini umhlabelo. Zicwengiseni bese nikhuphuka nami siyokwenza umhlabelo.” Nje-ke wacwengisa uJese namadodanakhe wabe wabamemela emhlabelweni.

⁶ Kuthe lokha nabafikako, uSamyela wabona u-Eliyabu wathi: “Ngambala nangu ozesiweko kaSomnini ajame phambi kwakaSomnini.”

⁷ Kodwana uSomnini wathi kuSamyela: “Ungaqali ubunjalo bakhe namkha ijamo lakhe ngombana ngimalile loyo. USomnini akaqali izinto eziqalwa babantu. Abantu batjheja ijamo lomuntu kodwana uSomnini utjheja ihliziyo.”

⁸ Yeke uJese wabiza u-Abinadaba kobana azokubingelela uSamyela. Kodwana uSamyela wathi: “Awa, naye lo akusuye okhethwe nguSomnini.”

⁹ UJese wabiza uTjhama bona naye azokubingelela uSamyela. Kodwana uSamyela wathi: “Awa, nalo godu akusuye uSomnini amkhethileko.”

¹⁰ UJese wabiza amadodanakhe alikhomba bonyana nawo azokubingelela uSamyela. Kodwana uSamyela wathi kuye: “Akakho namunye uSomnini amkhethileko kilaba.”

¹¹ Wase ubuza uJese wathi: “Amadodanakho aphelele na?” UJese wathi: “Awa, kusesekhona omunye ongumaswaphela, nokho uselusa izimvu.” USamyela wathi: “Akabizwe ngombana angeze sagoma angakafiki.”

¹² Bambiza-ke bafika naye. Bekakhanya begodu aqaleka, anamehlo amahle. USomnini wathi: “Nangu-ke engimkhethileko. Sikima umzese.”

¹³ Yeke uSamyela wathatha iphondo lamafutha we-oliva wamzesa phambi kwabafowabo. Kusukela mhlokho uMoya kaSomnini wehlela phezu kwakaDavida. USamyela wanqomba eRama.

UDavida usebenzela uSawula

¹⁴ UMoya kaSomnini wemuka kuSawula, kwathi ummoya omumbi owathunywa nguSomnini wamhlunguphaza.

¹⁵ Abatlhogomeli bakaSawula bathi kuye: “Qala, ummoya omumbi othunywe nguZimu uyakuhlunguphaza.

¹⁶ Ikosi ayitjho, iinceku zayo zizakufuna umuntu ongakghona ukubetha iharibha. Umuntu loyo uzakubetha iharibha lokha ummoya omumbi othunyelwe nguZimu nawehlela phezu kwakho, yeke uzakuqaquluka.”

¹⁷ USawula wathi kubatlhogomeli bakhe: “Iye, funani umuntu onekghono lokubetha iharibha, nimlethe kimapha.”

¹⁸ Omunye wabatlhogomeli wathi: “Ngibone umsa kaJese weBhethe-Lehema okwazi ukubetha iharibha. Usihlabani begodu unesibindi. Uhlamazana kanti nekulumo uyayilonda. USomnini unaye.”

¹⁹ USawula wathumela iingijimi kuJese wathi: “Yewungithumelele indodanakho uDavida osekweluseni.”

²⁰ UJese wathatha izikwa nekwana yewayini, wazikhweza phezu kwakadumbana wazithumela kanye nembuzana kuSawula ngendodanakhe uDavida.

²¹ UDavida wafika kuSawula wathoma wasebenza. USawula wamthanda tle uDavida bewamenza usonkhande wakhe.

²² Yeke uSawula wathumela ilizwi kuJese wathi: “Akhese uvumele uDavida kobana ahlale kimapha ngombana nganelisekile ngaye.”

²³ Njalo lokha ummoya omumbi owathunywa nguZimu wehlela phezu kwakaSawula, uDavida gade athatha iharibha ayibethe. Yeke uSawula aqaquluke, azizwe angcono bese ummoya omumbi uyamgadunga.