1 USAMYELA 15 - IsiNdebele 2012 Translation

USomnini ulahla uSawula ekubeni yikosi

¹ USamyela wathi kuSawula: “Ngimi engithunywe nguSomnini bonyana ngikuzese, ngikubeke ube yikosi yabantu bakhe u-Israyeli; nje-ke lalela umlayezo uSomnini awutjhoko.

² Nakhu-ke okwatjhiwo nguSomnini uMninimandlawoke uthi, ‘Ngizokudula ama-Amalekhi ngombana aqaba indlela yama-Israyeli lokha naphuma eGibhide.

³ Yewukhambe-ke, ufese usahlele ama-Amalekhi bewubhubhise koke okungekwawo. Ungawababaleli; ubulale kwandoda, kwamfazi, kwamntwana ngitjho namasana, iinkomo, kwamvu, kwakamela ngitjho nabodumbana bakhona.’ ”

⁴ USawula wenza imbizo eThelayimi, wahlela abantu ngeengaba; kwakuziinkulungwana ezimakhulu amabili zamadoda wakwa-Israyeli nabantu abaziinkulungwana ezilitjhumi abavela kwaJuda.

⁵ USawula waya edorobheni le-Amalekhi wabhaca ngedongeni wenza amaqhinga wokuwakhukhuthela.

⁶ Wathi kumaKheni: “Khambani nisukele ama-Amalekhi la ukuze nangiwabhubhisako ningachaphazelwa ziingazi ngombana nina naba nomusa kiwo woke ama-Israyeli naphuma eGibhide.” AmaKheni aphuma-ke kuma-Amalekhi.

⁷ USawula wasahlela ama-Amalekhi ukusukela eRhavila bekwaba seTjhuru; hlanu kweGibhide.

⁸ Wabamba u-Agagi ikosi yama-Amalekhi wangambulala, kodwana boke abantu bakhe wababhubhisa ngesabula.

⁹ Kodwana uSawula nebutho lakhe bambabalela u-Agagi kanye nezimvu neenkomo zekhethelo, kwathi keziqalekako bababalela amaqama anonileko, kwaba ngehle yodwa ifuyo. Koke lokhu azange bathande ukukubulala bakubhubhise, kodwana yoke imikgherana bayibhubhisa nya.

¹⁰ Ilizwi lakaSomnini lafika kuSamyela lathi:

¹¹ “Ngiyazisola kobana ngambekelani uSawula njengekosi ngombana ungitlhanamele begodu azange aphethe ilizwi lami.” USamyela wakhathazeka; walila ubusuku boke bamhlokho phambi kwakaSomnini.

¹² Kusasa ngovivi uSamyela wavukela indlela, wayokubonana noSawula, kodwana wafumana igama lokuthi: “USawula uye eKaramela. Uzafese ajamise ilitje lakhe lesikhumbuzo kileyondawo bese wehlela enzasi eGiligali.”

¹³ Kuthe lokha nabahlanganako, uSawula wathi kuSamyela: “USomnini akubusise! Ngiliphethile ilizwi lakaSomnini.”

¹⁴ Kodwana uSamyela wathi: “Alo-ke kubayini ngizwa kulila izimvu? Iinkomezi zona zibongolelelani?”

¹⁵ USawula wathi: “Madoda eze neenkomo zama-Amalekezi lapha, ababalele izimvu neenkomo ezinefutha kobanyana azokuhlabela uSomnini uZimakho, nokho okunengi sikubhubhisile.”

¹⁶ USamyela wathi kuSawula: “Thula! Yithi ngikutjele bonyana uSomnini utheni kimi izolo ebusuku ngawe.” USawula wathi: “Yiza nazo.”

¹⁷ USamyela wathi: “Angitjho bewuzinyaza; akusinjalo na? Nokho-ke ugcine uyihloko yeenkoro zakwa-Israyeli ngombana uSomnini wakubeka waba yikosi yakwa-Israyeli.

¹⁸ USomnini wakuthuma wathi, ‘Khamba ufike ubhubhise zoke iinkhohlakali zama-Amalekhi, ulwe nazo uziqede nya.’

¹⁹ Kubayini ungazange ulalele ilizwi lakaSomnini? Kubayini wenze ubumbi phambi kwakaSomnini ngokuziphosa phezu kwepango?”

²⁰ USawula wathi: “Kodwana ngimlalele uSomnini. Ngiliphethile ilizwi lakhe, ngabhubhisa ama-Amalekhi nya bengeza no-Agagi ikosawo.

²¹ Amadoda athatha izimvu neenkomo, akhetha ezinefutha ezilungele uZimu ukuze enzele uSomnini uZimakho umhlabelo eGiligali.”

²² Kodwana uSamyela wathi: “USomnini uthabiswa mihlabelo yokutjhiswa neminikelo kunokuthobela ilizwi lakhe na? Ukulalela kungcono kunemihlabelo, begodu nokuyelela kungcono kunamafutha wamaqama.

²³ Yeke ukuhlubuka uSomnini umuntu alalele ihlokwakhe le, sekufana nokulalela abosomthwadlana nanyana umphristi wabosingazimu. Njengombana ulahle ilizwi lakaSomnini nje, naye-ke ukulahlile ekubeni yikosi.”

²⁴ USawula wathi kuSamyela: “Maye mina ngonile. Nginyaze umyalo kaSomnini namezwakho. Ngesabe abantu, ngenza intandwabo.

²⁵ Nje-ke ngiyakurabhela, libalela isono sami ujike nami siyokuguqa phambi kwakaSomnini.”

²⁶ USamyela wamphendula wathi: “Angeze bengakhamba nawe. Unyaze ilizwi lakaSomnini, yeke noSomnini naye ukulahlile ekubeni yikosi phezu kwaka-Israyeli!”

²⁷ Kuthe lokha uSamyela nathi uyakhamba, uSawula wagugudlhela umphetho wephuraphurakhe beyadabuka.

²⁸ USamyela wathi kuye: “USomnini urharhule ubukhosi bakwa-Israyeli ezandleni zakho namhlanjesi, wabunikela umakhelwanakho ongcono kunawe.

²⁹ OngaTjhugulukiko ka-Israyeli akaleyi amala namkha atjhugulule umkhumbulwakhe ngombana akasinjengomuntu kobana angaloko atjhugulula umkhumbulwakhe.”

³⁰ USawula waphendula wathi: “Iye, kazi ngonile. Kodwana ngiyakubawa bonyana khese ungihloniphe eemphathimandleni zabantu bami naphambi ko-Israyeli, jika nami ukuze ngiyoguqa phambi kwakaSomnini uZimakho.”

³¹ Ngambala uSamyela wabuyela emva noSawula; uSawula waguqa phambi kwakaSomnini.

³² USamyela wathi: “Yenilethapha u-Agagi ikosi yama-Amalekhi leyo.” U-Agagi weza athwele ihloko adlumbana bonyana: “Nakumahlungu wokufa aphele kade.”

³³ USamyela wathi kuye: “Njengombana isabulakho yenza bonyana abafazi balobe abantwababo, nonyoko-ke kuzakuba nguye hlangana nabafazi oloba umntwanakhe namhlanjesi.” USamyela wambulala u-Agagi phambi kwakaSomnini eGiligali.

³⁴ USamyela waya eRama, kodwana uSawula yena wakhuphukela kwakhe eGibeya.

³⁵ USamyela wabe wahlongakala angazange akhe abonane noSawula godu. USamyela wakhathazeka ngoSawula, noSomnini wazisola ngokubeka kwakhe uSawula bona abe yikosi phezu kwaka-Israyeli.