1 USAMYELA 13 - IsiNdebele 2012 Translation

USawula wenza iphoso ekulu

¹ USawula bekanamatjhumi amathathu weminyaka lokha naba yikosi. Wabusa u-Israyeli iminyaka ematjhumi amane nambili.

² Ekuthomeni uSawula wakhetha amadoda aziinkulungwana ezintathu kwa-Israyeli, wathatha aziinkulungwana ezimbili wahlala nawo eMikimasi nemibundwini yeBhethe-Eli, kwathi ayikulungwana eyodwa akhamba noJonathani eGibeya kwaBhenjamini. Inengi lamadoda aseleko wawabuyisela emizinawo.

³ UJonathani wasahlela isithala samaFilista eGeba, amaFilista akwizwa lokho. USawula wathi akuliliswe ipalapala enarheni yoke kubizwe amajoni wamaHebheru.

⁴ Boke abantu bakwa-Israyeli bayizwa indaba yokuthi: “USawula usahlele isithala samaFilista, nje-ke u-Israyeli sele asikhubekiso kumaFilista.” Yeke woke amadoda abizelwa eGiligali kobana ahlangane noSawula.

⁵ AmaFilista abuthana bonyana alwe no-Israyeli, aphuma ngeenkarana eziziinkulungwana ezintathu, nabakhweli bakhona abaziinkulungwana ezintathu, namajoni amanenginengi kwanga yitjhwabatjhwaba yelwandle. Enyuka ahloma eMikimasi ngepumalanga yeBhethe-Aveni.

⁶ Kuthe lokha amadoda wakwa-Israyeli nabona ukuthi ubujamo akibo bumasikizi, nokuthi ibutho lawo ligandeleleke kangangani, abhaca emarholweni, hlangana namarharha, emirhobeni, emigodini neenkhelebetheni.

⁷ Amajoni wamaHebheru ayama iJordana aya enarheni yakwaGadi neyakwaGiliyadi. USawula wahlala eGiligali amabuthwakhe athuthumela ngemva kwakhe.

⁸ Walinda amalanga alikhomba, okwakusikhathi esasibekwe nguSamyela, kodwana uSamyela akhange afike eGiligali, amadoda akhamba noSawula abe athoma ukunghala.

⁹ USawula wathi: “Ngilethelani umhlabelo wokutjhiswa newetjhebiswano.” USawula wanikela ngomhlabelo wokutjhiswa.

¹⁰ Uthe naqeda ukwenza umhlabelo wokutjhiswa, nakhuya uSamyela afika. USawula wamhlangabeza wambingelela.

¹¹ USamyela wabuza wathi: “Wenzeni?” USawula waphendula wathi: “Ngithe lokha nangibona amadoda sele anghala; ngabona nesikhathi esibekiweko sesibethe besadlula ungakabonakali, kanti namaFilista sele ahlomile eMikimasi,

¹² ngadlumbana bona amaFilista la azabe angisahlele eGiligalapha ngingakabawi isisa kuSomnini. Yeke ngazibona ngikatelelekile kobana nginikele ngomhlatjelo wokutjhiswa.”

¹³ USamyela wathi: “Wenze ubudlhadlha, awukabulungi umyalo uSomnini uZimakho akunikele wona. Nangathana bewuwubulungile, uSomnini bekazakusekela umbuswakho phezu kwaka-Israyeli ngeenkhathi zoke.

¹⁴ Kodwana umbuswakho awukazokudzimelela, uSomnini sele afune umuntu osehliziywenakhe bewamkhetha bona abe mrholi wabantu bakhe ngombana wena ubhalelwe kubulunga umyalwakhe.”

¹⁵ USamyela wasuka eGiligali waya eGibeya kwaBhenjamini. USawula wabala amadoda agade asele nawo. Imbalo yawo yayimakhulu asithandathu.

¹⁶ USawula nendodanakhe uJonathani kanye namadoda agade akhamba nawo bahlala eGibeya kwaBhenjamini, kanti amaFilista wona ahloma eMikimasi.

¹⁷ Iinqhema ezihluthulako zaphuma ekampeni yamaFilista zenza iimpondo ezintathu. Iphondo elinye laphuma lanqomba e-Ofira nca ngeTjhuwali,

¹⁸ elinye lanqomba eBhethe-Rhoroni; lesithathu lona lanqomba ngembundwini lapha ungabona khona umrhoba weTseboyimu omalungana nerhalawumba.

Izenzo zobungwenya zakaJonathani

¹⁹ Kwakutlhogeka ngitjho namunye umbumbisimbi enarheni yoke yakwa-Israyeli ngombana amaFilista athi: “Nakungasinjalo, amaHebheru azakwenza iinsabula namkha imikhonto.”

²⁰ Woke ama-Israyeli gade ehlela kumaFilista ukuyokulungisa iinkara zeemplurhu, amalembe, amazembe neensegere zawo.

²¹ Inani lokulungisa isikara seplurhu nelembe beliziinkghedlhwana ezimbili zesiliva bese kuba sikghedlhu sinye ukulungisa iforogo nezembe kanye nokuvuselela isitlhorholojakomo.

²² Ngelanga lepi bekunganajoni egade liphethe umkhonto namkha isabula esandleni kilawa agade akhamba noSawula noJonathani, ngaphandle kwakaSawula nendodanakhe uJonathani.

²³ Abogadi bamaFilista gade sele baphumile banqombe eMikimasi endleleni edlula hlangana neentaba.